गोंय कोंकणी अकॅडमी आयज दर्जेदार वा दर्जात्मकरित्या बरी नाटकां घेवन तुमचे गावात येतात. ती नाटकां मुजरत पळयात, तातूंतल्यान बोध घेयात आनी कलाकारांक प्रोत्साहन दियात, अशे आवाहन कुंभारजुवे मतदारसंघाचे आमदार राजेश फळदेसाय हाणी करमळी हांगा उलयतना केले. करमळी हांगा हालीच २९ वो कोकणी नाट्य महोत्सव व्हडा दबाज्यान आनी उमेदीन साजरो जालो.
गोवा कोकणी अकादमी आनी साई पूर्वा आर्ट्स, करमळी हांचे जोड पालवान करमळी हांगा आशिल्ल्या ग्रामपंचायत मैदान हे सुवातेर पाच दिसाचो कोकणी नाटकांचो महोत्सव जालो. हे वेळार मुखेल सोयरे म्हूण कुंभारजुवेचे आमदार राजेश फळदेसाय व्यासपीठाचेर उलयताले. हे वेळार फळदेसाय हाणी फुडें उलयतना म्हटलें, नाटकांपसून बोध घेतना ती कला लोकांनी आत्मसात करपाक जाय आनी आमचे संस्कृतीचीय बी जतनाय करची.
पाच दिसांच्या हे नाट्य महोत्सवाचे उद्घाटन गावचे जेश्ठ नागरिक वासुदेव मूळगावकार हाणी दीपप्रज्वलन करून केले. व्यासपीठाचेर मुखेल सोयरे म्हूण राजेश फळदेसाय हांचे सयत गोवा कोकणी अकादमीचे प्रभारी अध्यक्ष वसंत सावंत, निमंत्रक म्हूण श्रीधर कामत बांबोळकार, साई पूर्वा आर्ट्स संस्थेचे अध्यक्ष चिदानंद मडकयकार आनी आदिवासी कल्याण खात्याचे अधिकारी दत्ताराम तारी हाजीर आशिल्ले. कोकणी अकादमीचे प्रभारी अध्यक्ष वसंत सावंत हाणी आपले मनोगत हे वेळार उक्तायले.
अकादमी पुराय वर्स तरेतरेचे उपक्रम राबयत आसता आनी ते लागून अकादमी आयज दर एका गावांत पाविल्ली आसा. ताचे एक बेसबरे अशे उदाहरण म्हटल्यार नाट्यमहोत्सव जावन आसा. अशे जायते उपक्रम अकॅडमी राबयत आसता आनी तांचो लाव लोकांनी घेवचो अशे मत सावंत हाणी हे वेळार उक्तायले.
ह्या वेळार उलयतना जेश्ठ नाट्यकर्मी श्रीधर कामत बांबोळकार हाणी म्हटले, अकादमी उत्कृश्ट पद्दतीन आपले काम करत आसा आनी लोकांनी तांका साथ दिली जाल्यारच आपली कोकणी संस्कृती तिगोवन उरतली. देखुन लोकांनी अकादमीक साथ दिवची, असो उलो कलाकार श्रीधर कामत बांबोळकार हाणी लोकांक मारलो.
चिदानंद मडकयकार हाणी सुरवेक येवकाराचे उलोवप केले. हे वेळार अकॅडमीच्या म्हायती पुस्तिकेचे प्रकाशन आमदार राजेश फळदेसाय हांचे हस्तूकी जालें. हे वेळार साईपूर्वा आर्ट्स संस्थेचे ” नटसम्राट” अशी ख्याती मेळील्ले नाट्य कलाकार भालचंद्र उजगावकर हांचो स्मृतिचिन्ह दिवन सन्मान जालो.
महोत्सवाचे उद्घाटन ” फुक्या सवाय” हे नाटकान जाली. रसिक प्रेक्षक हे वेळार व्हड संख्येन हाजीर आशिल्ले. कार्यावळीचे सूत्रसंचालन सोनिया वेर्लेकार हाणी केले जाल्यार भिकू नायक हाणी उपकाराचे उलोवप केले.
✒️
सनतकुमार फडते
