“आदले काळात टीव्ही नाशिल्ल्या कारणान आमी नाटका रेडिओचे माध्यमातल्यान आयकली. तातुंत कोकणी लेखक पुंडलिक नायक हांचे नाटकांचो आस्पाव आसतालो. पुंडलिक नायक हांचे नाटकांचे संवाद आयकून आमी कर्णसुख मेळे. फुडें श्रीधर कामत बांबोळकार हांची नाटकां आमी पळयली. कामत बांबोळकार हांचे नाटकांनी आमका नेत्रसुख दिले. आयचे युवावर्गाक श्रीधर कामत बांबोळकार हांची नाटकां “कोकणी नाट्यरंग ” हे पुस्तकाचे माध्यमातल्यान फुडें खूब मार्गदर्शक जावपाची आसा” अशे म्हणून गोयचे नामनेचे कवी, एकांकिका आनी नाट्यलेखक प्रा. राजय पवार हाणी श्रीधर कामत बांबोळकार हांचे नवे पुस्तकाचो गौरव केलो.
फोंडे वाठारांत बांदोडे हांगचे स्नेहमंदिर आवारात कुसुमाग्रज सभाघरात गोयचे नामनेचे तैलचित्रकार, कवी, लेखक आनी नाटककार श्रीधर कामत बांबोळकार हांचे “कोकणी नाट्यरंग ” हे पुस्तकाचे लोकार्पण सुवाळो व्हड उमेदीन जालो. व्यासपीठाचेर मुखेल सोयरे हे नात्यान फामाद सिनेमा निर्माते आनी दिग्दर्शक राजेंद्र तालक हांचेसयत नाट्यलेखक दीपराज सातार्डेंकार, तन्वी कामत बांबोळकार हांची उपस्थिती आशिल्ली.
राजेंद्र तालक हाणी उलयतना कलाकार, लेखक हो निःस्वार्थी आसता अशे नमूद केले तशेच कलावंत मनशान निःस्वार्थी जावनच काम करपाक जाय अशे मत उक्तायले. आपल्यो आनी श्रीधर हांचेसयत म्हाविद्यालयीन काळात जावपी एकांकिका सर्तीचे वेळार जावपी निकोप स्पर्धा आनी इश्टागत हांच्यो यादी तालक हाणी ताज्यो केल्यो. पुस्तकाचे मुखपृष्ठ आनी हेर गजालींक हातभार लावपी चित्रकार आनी नट कलानंद बांबोळकार आनी हेर मानेस्त हांचो सन्मान जालो. सुवाळ्याक साहित्य आनी नाट्यमोगी प्रेक्षकांची बेसबरी उपस्थिती आशिल्ली.
