आपले जिणेत जे लोकांकडेन दृष्टी आसना, जे काय वाचूंक शकानात वा सैमाची सुंदरताय पळोवंक शकानात, तांकाच दृष्टी आसपा वा दोळे आसप आनी तातूंतल्यान संसार पळोवप म्हटल्यार किते, हाचे म्हत्व खबर आसता. दृष्टी कमी आनी अधू आशिल्ल्या लोकांक मोफत चश्मे दियत जाल्यार ते वाचुंक शकतले आनी लागीच्यो गजाली पळोवंक शकतलें. ही एक निस्वार्थी अशी सेवा आसा जी आमका खुशालकाय दिता, अशे समाधानाचे मत नामनेचे कॅन्सरतज्ञ डॉ. शेखर साळकार हाणी चोडण हांगा एका कार्यक्रमात उलयतना उक्तायले.
गोय सरकारचे भलायकी सेवा संचालनालयाचेवतीन राबयिल्ल्या ” दोळे तपासपाचे शिबीर (आय स्क्रिनिंग कॅम्प) आनी हेर वैजुकी चाचण्यो हे गेल्या म्हयन्यातले उपक्रमाचो फुडलो भाग म्हूण संचालनालयाच्या कुड्डेपण आनी दृष्टिदोष नियंत्रणाचो राष्ट्रीय कार्यक्रमाखाला चोडण हांगा चश्मे फुकट वाटप करपाचो कार्यक्रम जालो.
गोवा कॅन्सर सोसायटीचे अध्यक्ष तशेच इंडीयन मेडिकल असोसिएशन, दिवचल शाखेचे अध्यक्ष आशिल्ले डॉ. शेखर साळकार हाणी दोळे आसप आनी दृष्टीचे म्हत्व समजून सांगले.
जेश्ठ नागरिक आशिल्ले ४२ जणांक चश्मे मोफत वाटले. कार्यक्रमाक राज्य कार्यक्रम अधिकारी डॉ. मेधा साळकार मुखेल सोयरी म्हूण हाजीर आशिल्ली. इंडीयन मेडिकल असोसिएशनचे दिवचल शाखेचे अध्यक्ष आनी लायन पदाचेर आशिल्ले डॉ. शेखर साळकार हांचे हस्तुकी चश्म्यांचे वाटप जाले.
चोडण लायन्स क्लबचे अध्यक्ष लायन श्रीमती एरिका वाझ हाणी येवकाराचे उलोवप केले. प्रकल्प उपसंचालक लायन ई. आग्नेलो डा सिलव्हा हाणी सूत्रसंचालन केले. प्रकल्पाचे चेअरमन लायन अशोक देसाय हाणी उपकार आटयले.
✒️
सनतकुमार फडते.
