बॉडीबिल्डिंग खेळ प्रकारात गोयचे फोंडे शारांत रावपी विद्येश दामोदर कवळेकर हाणे हालीच इतिहास रचलो. अजमान, संयुक्त अरब अमिरात (यूएई ) हांगा जाल्ले आयएफबीबी आशियाई बॉडी बिल्डिंग एन्ड फिटनेस चॅम्पियनशिप हे सर्तीत विद्येश कवळेकार हाणी ३२ सर्तकांमदी ५ वे स्थान मेळेयले आनी गोयच्या बॉडी बिल्डिंग (शरीर सौष्ठव) क्रीडा प्रकाराचे क्षेत्रात इतिहास घडयेल्लो आसा.
लाईव्ह न्यूज गोवा हे न्यूज वेब साईटबरोबर कवळेकार हाणी केल्लो हो वार्तालाप.
•तुमि “क्लासिक फिझिक ” गटात ५ वे सुवातेर आयले. हे येस तुमि आशियाई (Asian) स्तराचेर मेळयल्ले आसा. ते कितले कठीण आनी आव्हानात्मक अशे तुमका दिसता?
विद्येश: प्रामाणिकपणान उलयत जाल्यार, केवळ आशियाई चॅम्पियनशिपच न्हय — म्हज्या बॉडीबिल्डिंगचे प्रवासात दर एक सर्त आनी त्या सर्तीक लागून केल्ली दर एक तयारी ही सदाच आव्हानात्मक थारलेली आसा. दर एक फावट म्हाका म्हज्या शरीराविशी नवे किते तरी शिकूंक मेळा आनी शारीरिक ताकेच्या विशी हावेन सदाच एक स्तर आनीक फुडें वचपाचो यत्न केल्लो आसा.
हय, अर्थिक संघर्श हो आसाच — फकत बॉडी बिल्डिंगच न्हय, तर दर एका क्षेत्रात आनी ते सगले लोकांक जे चॅम्पियन जावपाचे ध्येय दवरून चलतात. सगल्यात चड कठीण तेन्ना जाल्ले, जेन्ना हाव म्हजी नोकरी, प्रवास, सराव, व्यायाम आनी कडक शिस्तीचो आहार हांका पाळो दितालो, तेन्ना. जायते वेळार पुराय थकून आनी निराशेल्लो जावन वयतालो — फकत शारीरिक न्हय, मानसिक स्तराचेय बी. ह्यो गजाली सामको तुमका रित्यो करून वतात — पुण तुमका स्वताची शक्त फुडें व्हरची पडटा, फूडल्या पावंड्याचेर हाव दर एका सर्तीचे तयारीचे उपरांत स्वताक म्हणटालो, ” ना, आता ही निमाणी”. पुण मागीर भितरल्यान खयतरी एक आवाज येतालो, “ना. हाव हाचेपरस फुडले फावट बरे करूंक शकता.”
ही मानसिकता म्हाका हांगा मेरेन घेवन आयली. आशियाई चॅम्पियनशिप सर्तीक लागून हावे आनी म्हजो प्रशिक्षक हाणी साबार गजाली जायते वेगळ्या पद्दतीन केल्यो. म्हजो व्यायाम आनी सराव तिव्र स्वरूपाचो आशिल्लो, तशेच खुराक बी तसो जोरदार आशिल्लो. स्नायू आनी वजन वाडप हेका लागून कुड थकप, कस लागप, खरस मारप हातूत शारीरिक ताकीचो एक कस लागलो. हो आता मेरेन मेळील्लो एक सगल्यात कठीण आनी सगल्यात आव्हानात्मक असो अणभव आसा – पुण होय, ताचे पुराय मोल वसूल जाले.
•तुमका तुमचे जिणेत बॉडी बिल्डिंगचे क्षेत्र निवडटना अशो किते आडमेळी आयल्यो काय?
विद्येश : म्हज्या लागून ह्या क्षेत्रात नाव करप हे पयले लक्ष्य केन्नाच नासले. म्हाका जे गजालींचेर (बॉडी बिल्डिंग आनी फिटनेस) मोग आसा ते हाव कितले बरे करूंक शकता, ही गजाल म्हाका चड म्हत्वाची आशिल्ली. तुमि जर तुमचे कलेकडेन प्रामाणिक रावत आनी ताचेर मोग करत, नाव आनी हेर लोकांनी तुमची नोंद घेवप, हे आपोआप जावपाक लागता. ” कर्म कर, फल की चिंता मत कर” हे गजालीचेर हाव विश्वास दवरता. तू तुजे काम प्रामाणिकतायेंन कर आनी ताचे परिणाम येवंक जाय, तेन्ना येवंक दी.
आव्हानां येवप हो जीणेचे प्रवासाचो एक भाग. म्हाका आयजय बी ताका तोंड दिवचे पडटा. जायते फावटी अशीय वेळ आयल्ली आसा, जेन्ना म्हाका अर्थिक वटेन सर्तीत वाटो घेवप वा सराव करप खूब म्हारग आनी अशक्य आशिल्ल्यान शक्यच जाले ना. मागीर हावे ब्रेक घेतलो, तयारी आनी तजवीज केली आनी चड मजबूत आनी खंबीर जावन परत आयलो. हाव केन्नाच पयशे वा हेर आडमेळी आयल्यो म्हूण थारलो ना. हावेन फकत आसा त्या परिस्थिती वा हेर गजालींनी कामां जातली, अशे मार्ग सोदुन काडले. कुटुंब वा घरच्यांकडल्यान येवपी चेपण आनी जावपी बोवाळ ह्यो गजाली सदाच आसताल्यो — आनी सदाच आसतल्यो. पुण ह्यो अडचणी तुमि कशे हाताळटात आनी तांचेर मात करून कशे वयर सरतात, हे जीवितात चड म्हत्वाचे थारता.
लोक हे सदाच उलयतले — तुमि किदेतरी बरे करात नाजल्यार वायट करात. त्या लागून तुमि जे किते करता ते उत्कृश्ट कशे करूंक शकतात हाचेर फोकस करत जाल्यार चड बरे. आनी हावे बॉडी बिल्डिंग हे करिअर म्हणून निवडुंक ना. म्हाका फकत ट्रेनिंग करप (व्यायाम ) आवडटाले आनी एक नितळ जीवनशैली दवरपाक आवड आशिल्ली. आनी फिटनेस ह्या विशयाविशी आशिल्ले हळूहळू पॅशन जाले. हावे बॉडी बिल्डिंग निवडुंक ना, तर बॉडी बिल्डिंग हे प्रकारान म्हजी निवड केली. जर खयचोय भुरगो वा तरणाटो बॉडी बिल्डिंगचे विशी गंभीर आसा जाल्यार ताणेन योग्य अशे मार्गदर्शन घेवचे, ह्या क्षेत्रात आशिल्ले लोकांचो मजबूत नेटवर्क तयार करचो आनी फुडें वचत रावचे. तुमि तुमचे क्षेत्रात सगल्यात व्हड वा उत्कृश्ट जरी जावंक पावलेना, जाल्यारय बी आपल्या ताकीप्रमाण म्हान शेर्त जातले.
•जायते तरणाटे आपले भुरगेपणान अरनॉल्ड स्वर्झनेगर, सिल्वेस्टर स्टॅलोन, रॉनी कोलमन, जेय कटलर हांका पळोवन बॉडी बिल्डिंग प्रकारात देवतात वा येतात. काय दसका वा वर्सापयली सलमान खान, सुनील शेट्टी, संजय दत्त ह्या बॉलिवूड अभिनेत्यांक पळोवन एक तरणाटी पीळगी जिमाची वाट चलपाक लागली. तुमि कोणापसून प्रेरणा घेतली? बॉडी बिल्डिंग क्षेत्रात तुमचो आयकॉन वा आदर्श कोण?
विद्येश: खरे म्हटल्यार हाव सदाच मैदानावयले खेळाप्रकार, जशे काय क्रिकेट, फुटबॉल, स्विमिंग आनी धावंडी (रनिंग ) सारकिल्ले क्रीडा प्रकारांनी सदाच वाटो घेवन म्हजो फिटनेस दवरतालो. हाव व्यायामशाळेत गेलो, तो बॉडी बिल्डर जावपाक न्हय, पुण फकत वजन वाडोवपाक लागून. हाव शरीरातल्यान साप्प बारीक वा हाडकुळो आशिल्लो, इतको की लोक चाळयताले. म्हज्या आंगाक फिट बसपी कपडे मेळप लेगीत कठीण आशिल्ले. हे कारणाक लागून हावेन व्यायामशाळेत वचून व्यायाम करपाक सुरूवात केली. हाव जेन्ना स्कुलात शिकतालो, सादारण धावी ते बारावी यत्तेन आसतना, फिल हीथ (Phil Heath) हो अमेरिकन बॉडी बिल्डर जायते फावटी नदरेमुखार येवपाक लागलो. तो ते वेळार मिस्टर ऑलिंपिया ह्यो अमेरिकन सर्ती जिकत आशिल्लो आनी ताचे थ्रीडी फिझिक (3 D physique ) कशे दिसपी पीळदार भारदस्त शरीरात म्हजे लक्ष ताजेकडेन व्हेले. तो मनीस माचयेचेर उबो रावले उपरांत एक शिल्पाकृती (sculpture) कशे दिसताली. हाव ताचेपसून खूब प्रभावित जालो.
पुण म्हजो खरो आदर्श वा रोल मॉडेल हो सदाच म्हजो बापूय, दामोदर कवळेकार, हेच जावन आसा. तांची काम करतना आशिल्ली मूल्यां आनी नैतिकता म्हाका सदाच प्रेरणा दियत राविल्ली आसा, आनी तांचो केन्नाच हार न मानपाचो दृष्टिकोन हाव आयज जसो विचार करता, तो दृष्टीकोनाक आकार दिवपी थारलेलो आसा. कसल्याच प्रकारचो आदार घेय नासतना ताणीं आपले जीवनात खूब किते मेळयले, आनी हावेन सदाच तांचेकडेन एक प्रेरणा म्हणून पळयील्ले आसा. म्हज्या जीवनाच्या आनी बॉडी बिल्डिंगच्या अशा दोनय प्रवासात, म्हजो बापूय — दामोदर कवळेकार होच म्हजो आदर्श थारलेलो आसा.
•आयज खुबसे तरणाटे बॉडीबिल्डिंग क्षेत्रात येवंक सोदतात. जायते जणांकडे तितको खर्च करपाची शक्ती आसना. काय जणांक स्पॉन्सर मेळटात, ते फुडें वयतात. थोड्यांक अपेस येता. कामधंदो, शिक्षण, करिअर, कौटुंबिक जापसालदारकी वा जबाबदाऱ्यो हातून बॉडी बिल्डर जावपाचे स्वप्न पयस वता, कडेक दवरचे पडटा वा सामकेच सोडून दिवचे पडटा. हाचेविशी तुमका कितें दिसता? तुमचे विचार किते?
विद्येश: जशे हाव सदाच म्हणटा — ते सगले ज्या गजालीचेर आदारिल्ले आसा, ते म्हटल्यार, तुमका ते मेळोवपाची कितली तीव्र इत्सा आसा, आनी तुमि कितले निष्ठेन त्या मार्गाचेर चलतात. जर तुमि तुमचे कलेकडेन प्रामाणिक आसात, तुमचेकडेन शिकपाची इत्सा आसा, आनी हे ब्रह्मांडान वा संसारान तुमका जे दिला, ते परत दिवपाक जर तुमि तयार आसात, जाल्यार देव तुमचे लागून एखादो मार्ग निश्चितच उघडो करता. पुण तुमका ते लागून जीणेत मातशे वास्तववादी जावचे पडटले. तुमचो एखादो इश्ट तशे करता, कोणाकतरी किर्ती वा प्रसिद्धी वा फामादकाय मेळटा वा सोशल मीडियाचेर लाईक म्हणून ते जशे किते करता, तशीच नक्कल करून तुवेय तशेच करपाक जाय अशे काय आसना. तशे करत जाल्यार तुमि चड वयर पावचेनात.
