“पोरण्या वस्तूंचे प्रदर्शन आनी खाद्य पदार्थांची विक्री आनी प्रदर्शन ह्या सारकिल्ल्या उपक्रमांनी बायलांक स्वावलंबी जावपाक एक व्यासपीठ उपलब्ध जाता. त्या लागून बायलांनी चूल आनी भुरगे म्हटल्यार “चूल आनी मूल ” ह्या साचेबद्ध चौकटीत न रावता किदेतरी उद्देग वेवसाय करून पोट भरचे वा उदरनिर्वाह करचो आनी ते लागून आदिवासी कल्याण खात्याचे वतीन अशो योजना राबोवन आदिवासी समाजाचे भुरग्यांक एक बरी सोय वा सुविधा गोय सरकारान उपलब्ध करून दिल्ली आसा”, अशी म्हायती राज्य सरकारच्या कला संस्कृती खात्याचे सहायक संचालक प्रेमानंद कलशांवकर हाणी वस्तू प्रदर्शन आनी खाद्य पदार्थ विक्री प्रदर्शनाचे कार्यावळीत उलयतना दिली. करमळी सकलेभाट हांगा पोरण्या वस्तूंचे प्रदर्शन आनी खाद्यपदार्थ विक्री प्रदर्शन उपक्रम जालो.
सुयोग कला मंच करमळी आनी आदिवासी कल्याण संचालनालय, गोवा सरकार हांचे जोड पालवान सकलेभाट करमळी हांगचे कमलावती देवळाच्या सभाघरात व्हड दबाज्यात जालो. प्रेमानंद कलशांवकर मुखेल सोयरे म्हूण उलयताले. हे वेळार ओल्ड गोवा पंचायतीचे आदले सरपंच तशेच समाजसेवक रामदास पर्वतकार, आदिवासी उदरगत संचालनायाचे अधिकारी दत्ताराम तारी, ॲड. सृष्टी हळदणकार आनी संस्थेचे सल्लागार आनी फामाद नाट्य कलाकार भालचंद्र उसगावकर हाजीर आशिल्ले.
कार्यावळीचे निमतान शाळेतल्या भुरग्यांक लागून चित्रकला सर्त आनी बायलांक लागून राखी तयार करपाची सर्त आयोजित जाली. कार्यावळीत फुडें दत्ताराम तारी हाणी सरकारी येवजण्यो हांची म्हायती दिली. रामदास पर्वतकर हाणी आपले विचार मांडतना कार्यक्रम येसस्वी कसो करप हे विशीचे म्हत्व पटोवन दिले. कार्यावळीचे सूत्रसंचालन चिदानंद मडकयकार हाणी केले जाल्यार येवकाराचे उलोवप संस्थेचे सल्लागार भालचंद्र उसगावकर तर पुंडलिक धुळापकर हाणी उपकार आटोवपाचे उलोवप केले.
चित्रकला सर्तीत प्रक्ष्मा श्रीपाद फडते गावकार जैतीवंत थारली तर दुसरे इनाम सौम्या वन रायकार हांका आनी तिसरे इनाम मयांक अडकोणकार हाका फावो जाले. राखी तयार करपाचे सर्तीत सौ. तेजा सुनील खोलकर हांका पयले, दुसरे इनाम सौ. दर्शिका दिनेश नावेलकार हांका तर तिसरे इनाम सौ. केसर कृष्णा नावेलकार हांका फावो जाले. परीक्षक हे नात्यान ॲड. सृष्टी हळदणकार आनी नमिता उजगावकर हाणी जापसालदारकी सांबाळ्ळी. हे दोनीय सर्तीक एकूण 35 सर्तकानी वाटो आपले नशीब आजमायले.
