ज्या कवीकडेन शब्दाचे सामर्थ्य आसा तेचीच काव्य रचना उत्कृष्ट जावंक शकता आनी काव्य निर्मितीक लागपी शब्द संग्रह वा संचय कमोवपाक लागून आमचेकडेन वाचन करपाशिवाय पर्याय ना, अशे मत ज्येश्ठ साहित्य समीक्षक आनी प्राध्यापक कृष्णाजी कुलकर्णी हाणी फोंडे हांगा जाल्ले ” काव्यहंडी” ह्या कवी संमेलनाचे उक्तावण कार्यावळीत केले. हे कार्यक्रमात नामनेचे कवी आनी लेखक हाणी वाटो घेतलो.
गोवा मराठी अकादमी फोंडा प्रभाग आनी विद्या वृद्धी संस्था हांचे जोड पालवान काव्यहंडी हे प्रासंगिक स्वता रचिल्ल्या कवितांचे वाचन कार्यावळीत कृष्णाजी कुलकर्णी मुखेल सोयरे म्हूण उलयताले. हे वेळार व्यासपीठाचेर भौमानेस्त सोयरी म्हूण ज्येश्ठ कवयित्री चित्रा क्षीरसागर, रजनी रायकर, मराठी अकादमी फोंडा प्रभाग अध्यक्ष निलेश नायक, विद्या वृद्धी संस्थेचे अध्यक्ष उदय डांगी, कार्यावळीच्यो समन्वयक प्रा. वरदा गाड केरकर आनी कवी आनी नाट्य कलाकार तसेच साहित्यिक नितीन शेट कोलवेकार हाजीर आशिल्ले.
वर्षा ऋतू, श्रावण म्हयनो, स्वातंत्र्य दिन आनी गोकुळाष्टमी हे चार विशयांचेर आदारिल्ल्यों कविता वाचप अशी ह्या कार्यक्रमाची संकल्पना (थीम) आशिल्ली. काव्यहंडी अशे गोड नाव आशिल्ल्या ह्या कविता वाचप कार्यक्रमाक गोयच्या तरेतरेच्या वाठारांतल्यान आयिल्ल्या 25 कवी आनी कवयित्री हाणी वाटो घेतलो.
व्यासपीठार हाजीर आशिल्ल्या मानेस्तांवांगडा सचिन मणेरकार, मुग्धा मनेरकार, श्रुती हजारे, उशा टेंग्से, आसावरी भिडे, प्रकाश क्षीरसागर, पौर्णिमा देसाय, राधिका काळे, सुनीता पेडणेकार, अनुराधा कुलकर्णी, वरदा चव्हाण, संजय पाटील, प्रांजली चौधरी, माधुरी उजगावकार, अमर विश्वकर्मा हांचे कविता सादरीकरणान कार्यावळीत रंग भरलो.
हेर कवी आनी कवयित्री हांचो सहभागय प्रेरणा दिवपी आशिल्लो. संमेलनाचे निवेदन पयलेच फावटी वेदा पत्की आनी युक्ता देसाय हाणी सुंदर पद्दतीन केले. हे कार्यक्रमाची संकल्पना गोकुळाष्टमीच्या फाटभुयेचेर साकार करपी समितीचे अध्यक्ष निलेश नायक हांची तोखणाय मानेस्तांनी केली. येवकाराचे उलोवप आनी प्रास्ताविक निलेश नायक हाणीच केले.
समन्वयक प्रा. वरदा गाड केरकार हाणी काव्यहंडी कवी संमेलनाचे अध्यक्षपद हाताळले. काव्यहंडी कार्यक्रमाचो सहसमन्वयक आसावरी भिडे हाणी सोयऱ्यांची वळख कवितेतल्यान करून दिली. हातूंत वेदा पत्की, युक्ता देसाय, अनिषा नायक, शीतल स्वामी हाणी वाटो घेतलो.
मानाच्यो सोयऱ्यो चित्रा क्षीरसागर आनी रजनी रायकार हाणी कविता सादर करून आपले विचार उक्तायले. प्रभागाचे आदले अध्यक्ष आनी फिल्म कलाकार नितीन कोलवेकार हाणी उपकार आटयले. कार्यावळीचे सूत्रसंचालन शीतल स्वामी हाणी केले. ह्या उपक्रमाच्या निमतान फोंडेचे कविता मोगींनी कवितांचो आनंद घेतलो.
