कायद्याचो कोंकणी अणकार करप्यांची सध्या गरज आसा पूण कायद्याचो अणकार करतना कायदो करपा फाटली फाटभूंय कितें आसली हें समजून घेवचें आसता आनी जाल्यारूच कायद्याच्या अणकाराक न्याय दिवंक पावतलीं अशें राज्य माहिती आयुक्त ॲड. आत्माराम बर्वे हांणी सांगलें.
आरटीआय धरून हेर कायद्यांचो कोंकणी अणकार जावपाक जाय अशी गरज तांणी उक्तायली. तंत्रीक कोंकणी अणकार अल्प – मुजत प्रमाणपत्र अभ्यासक्रमाच्या दुसर्या टप्प्याचें उक्तावण मुखेल सोयरे ॲड. आत्माराम बर्वे हांचे हस्तुकीं जालें. खांडोळेंच्या सरकारी कला, विज्ञान आनी वाणिज्य म्हाविद्यालयाच्या कोंकणी विभागान गोंय सरकाराच्या राजभाशा संचालनालयाच्या जोड पालवान हो 5 दिसांचो अभ्यासक्रम आयोजीत केला. 2 ते 6 फेब्रुवारी 2026 दिसांनी सकाळीं 9.30 ते सांजे 4.30 वरां मेरेन हो अभ्यासक्रम चलतलो.
ह्या अभ्यासक्रमाच्या उक्तावण सुवाळ्याक राजभाशा संचालक मेघनाथ परब, प्राचार्य प्रो. पुर्णकला सामंत, राजभाशा उपसंचालक अनिल सावंत, कोंकणी विभागाचे मुखेल प्रो. प्रकाश वजरीकार हे मानेस्त हाजीर आशिल्ले.
आमचे दिसपट्टे भाशेंत जाल्ली भेसळ पयस करची पडटली. आमी उलयतात तेन्ना हेर भाशेंतले शब्द चड उलयतात आनी कोंकणी वा मराठी भाशेचो वापर कमी करतात. जर अनुवादकाची भाशा सारकी नासल्यार अनुवादक म्हणून न्याय दिवंक पावचे नात अशें ॲड. आत्माराम बर्वे हांणी सांगलें.
अणकार करतना मूळ भाशा आनी मोख भाशा दोनूय भाशांचें तशेंच ताचें व्याकरण सारकें ज्ञान आसूंक जाय अशें तांणी सांगलें. कोंकणीचो तंत्रीक अणकार आनी कायद्याचो अणकार करप्यां खातीर रोजगाराच्यो खूब संदी आसात आनी माहिती आयोगा मार्फत बर्या अनुवादकांक कामां मेळपाक शकता अशें ॲड. बर्वे हांणी सांगलें.
राजभाशा उपसंचालक अनिल सावंत हांणी अणकार अभ्यासक्रम आयोजीत करपा फाटली मोख स्पश्ट केली. प्राचार्य प्रो. पुर्णकला सामंत हांणी येवकाराचें उलोवप केलें जाल्यार कोंकणी विभागाचे मुखेल प्रो. प्रकाश वजरीकार हांणी उपकाराचें उलोवप केलें. कोंकणी विभागाच्यो प्राध्यापक किरण पालकार हांणी सुत्रसंचालन केलें.
ह्या अभ्यासक्रमांत सुमार 35 अनुवादक वांटेकार जाल्यात. तंत्रीक अणकार, संकेतथळांचो अणकार, विधानसभा अणकार, शिक्षणीक अणकार अश्या वेगळ्या वेगळ्या विशयांचेर ह्या अभ्यासक्रमांत भासाभास जातली.
