पणजे शाराचे म्हापालिकेच्या वतीन (कॉर्पोरेशन ऑफ धी सिटी ऑफ पणजी – सीसीपी) ‘ आमची पोती ‘ हो नवो उपक्रम सुरू जाल्लो आसा. ताचे अंतर्गत स्वच्छ सर्वेक्षण संकल्पनेचो दूत वा ब्रँड ॲम्बेसेडर म्हूण कावी कलाकार सागर नाईक मुळे हांची निवड केल्ली आसा.
म्हापालिकेचे महापौर रोहित मोन्सेरात आनी हेर अधिकारी हांचे उपस्थितीन जाल्ले २६ ऑगस्ट २०२४ हे परवाचे दिसाचे कार्यावळीत ‘ आमची पोती ‘ उपक्रमाचे उक्तावण जाले. स्वच्छ सर्वेक्षण ब्रँड ॲम्बेसेडर म्हूण गोंयचे नामनेचे कावी कलाकार आनी शिल्पकार सागर मुळे हांचे नावाची घोषणा जाली. मुळे आनी महापौर रोहित मोन्सेरात हांचेसयत उपमहापौर संजीव नायक, माध्यम समन्वयक (म्हापालिका ) आनी नगरसेवक किशोर शास्त्री हांचेसयत म्हापालिकेचे हेर नगरसेवक, पदाधिकारी, ‘ जीआयझेड ‘ हे जर्मन डेव्हलपमेंट एजन्सीचे प्रतिनिधी तशेच युवा स्वयंसेवक हाजीर आशिल्ले.
‘ सिंगल युज प्लास्टिक ‘ म्हटल्यार एका वेळार वापरून भायर मारपी प्लास्टिक पिशव्यो आनी हेर वस्तू सैमाक तशेच मनशाक कशो फुडाराक त्रासदायक थारूंक शकतात हाजेर आपल्या भाषणांनी भासाभास करून ‘ आमची पोती ‘ हो उपक्रम प्लास्टिकमुक्त पणजे शार करपाचे उद्देसान कशे उपेगी थारूंक शकता हाचेविशी म्हायती दिली.
स्वच्छता आनी सोबितकाय हाचेंकडेन संबंदीत आशिल्लें करणान आनी ब्रँड ॲम्बेसेडर म्हूण निवड जाल्ल्यान सागर मुळे हाणी ‘ लाईव्ह न्यूज गोवा ‘ कडेन उलयतना समाधान उक्तायला. गोयचे मातीयेकलागून तशेच समाजाक लागून एक बरो उपक्रम म्हापालिकेन घेतला. स्वच्छ सर्वेक्षण हे राष्ट्रीय मोहिमेचे खालां पणजे शाराचो स्वच्छता दूत म्हूण म्हाका वेचून काडला, ते लागून एका कलाकराक ब्रँड ॲम्बेसेडर म्हूण निवड जाला ते पळोवन बरे दिसता, अशे मुळे हांचे म्हणणे आसा.
म्हजी एक युवावर्गाचो चेरो म्हूण निवड जाल्या, ते देशप्रेम आनी सामाजिक जबाबदारी पळोवन, जेका न्याय दिवपाचो आपलो पुरेपूर यत्न प्लास्टिक आनी कचऱ्याविशी जागृताय करपाक आसतलो. आमी सरकाराक, संस्थांक आनी प्रशासकी एजन्सी हांका जबाबदार धरतात पूण कचऱ्याक सगले समाज म्हूण जबाबदार आसतात. कचरो खंयबी जळामळा आमी वडयतात, जे टाळपाची गरज आसा. २० रुपयांची कपड्याची पिशवी घेवन ते सामान व्हरपाक वापरचे आनी सामान व्हरतगीत ती पिशवी परत करून २० रूपयां परतून घेवंक शकतात. म्हापालिकेची ही संकल्पना खूब बेसबरी, सुंदर आसा, अशें मुळे हाणी म्हटला. आपुण हे उपक्रमात पुरेपूर १०० टक्के योगदान दिवपाचो यत्न करतलो, अशे ते म्हणटात.
🖋️
(सनतकुमार फडते)
