भारत सरकारचे राष्ट्रीय थरांवेले लसीकरण उपक्रमात गर्भाशय कर्करोगाचे वासिनाचे लसीकरणाचो आस्पाव करपाचे इत्सेपसून प्रेरणा घेवन रोटरी क्लब ऑफ दोनापावला आनी इंडीयन मेडिकल असोसएशन (आयएमए) दिवचल शाखा हे दोन संघटनांनी ल्हान पिरायेच्या चलीयांचे गर्भाशय कर्करोग प्रतिबंधक वासिनां दिवपाचो उपक्रम घेतलेलो आसा. हे एकमेव अशे गर्भाशय कर्करोगविरोधी लसीकरण शिबीर ९ ते १६ वर्सा पिरायेच्या मातृछाया हे फोंडे वाठारात आशिल्ल्या अनाथाश्रमात रावपी ल्हान चालियांकलागून हे दोनय संघटनांनी घेतले.
लसीकरण शिबिरांचे उद्घाटन इंडीयन मेडिकल असोसिएशनचे दिवचल शाखेचे अध्यक्ष आशिल्ले आनी आपूण स्वता काकराचे वा कर्करोगाचे शल्यविशारद वा सर्जन आशिल्ले डॉ. शेखर साळकर हांचे हस्तुकी जाले. भुरग्यांचे लसीकरण करपाक डॉक्टरांचे एक पथक मातृछाया कॅम्पस परिसरात हाजीर आशिल्ले. हे पथकात डॉ. शेखर साळकर हांचेसयत डॉ. मेधा साळकार, डॉ. गुंजन बैजल, रोटरीयन डॉ. एलेन रॉड्रिग्ज, डॉ. पूर्णिमा उसगावकर आनी डॉ. माधुरी मावळणकर हांचे बराबर रोटरीयन डॉ. साजल धोंड हांचो आस्पाव आशिल्लो. रोटरी क्लब दोनापावलाचे अध्यक्ष रोटरीयन गौरव पोखळे हाणी आपले अध्यक्षीय भाषण करतना यावेळार उलयले की, दोना पावलाचे रोटरी क्लबचेवतीन गरजू वा गरजवंत अशा भुरग्यांखातीर विशेष म्हटल्यार निराधार, गरीब भुरग्यांक लागून निधी उबो करून असो कार्यक्रम करूंक शकतात. या दोन वासिनाचो खर्च एका मनशाफाटल्यान ३ हजार रुपयां, असो येता. हे कार्याक आदार दिवपाक मजत केल्ल्या भारतीय वैजकी संघटनेचे दिवचल शाखेची ताणी तोखणाय केली.
‘देशातलो तिसऱ्या क्रमांकाचो कॅन्सर, दरेक ७ मिनिटांनी एक मरण‘
आपले म्हत्वाचे संबोधनात कॅन्सरतज्ञ डॉ. शेखर साळकर हाणी मातृछाया अनाथाश्रम संस्थेचे कर्मचारी आनी रहिवासी भुरगी हांचेकडे सुसंवाद करतना गर्भाशय कर्करोगाचे वासिना लसीविशी आशिल्ले गैरसमज आनी जळमटां पयस केली. डॉक्टर हाणी फुडें म्हटलें कीं, भारतांत गर्भाशयाचें कॅन्सराक लागून दर सात मिनिटांनी एक मरण नोंद जाता. सध्याक देशांत हे प्रकारचे काकराचे रोगाची ३,४०,००० प्रकरणां अस्तित्वात आसात. भारतातलों तो तिसरे क्रमांकाचो सगल्यात चड जावपी काकराचो रोग जावन आसा, तशेंच बायलांमदी जावपी सगल्यात चड अशे दुसरें क्रमांकाचे जीवघेणे दुयेत जावन आसा. हे रोगाच्यो १ लाख २७ हजार नव्यो केसेस वयर आयल्यात. २०२२ सालात ८०,००० मृत्यु हे रोगाकलागून जाल्ल्याचे नोंद जाला, अशें साळकार हाणी म्हटलें.
लिंगीक वा शारिरीक संबंद जातगीत ” ह्युमन पॅपीलोमा व्हायरस” हे विषाणू ताणिल्ल्या अवस्थेंत एका स्त्रीलिंगी व्यक्तींत वा बायलेचे कुडीत वयतगीत गर्भाशयाचो कॅन्सर जाता. देखुन ९ ते १४ वर्सा पिरायेचे चले आनी चलियां हांचेमदी लसीकरण करत जाल्यार गर्भाशयाच्या कर्करोगाचो पुराय नाश जावंक शकता. देखून हे संकटापसून भुरग्यांक सुरक्षित दवरपाक देशपातळीचेर भुरग्यांचे पालकांचो तेको मेळपाक जाय, अशे डॉ. साळकार हाणी नमूद केले.
किरणोत्सर्ग कॅन्सरतज्ञ डॉ. गुंजन बैजल हाणी म्हटले, गर्भाशय कॅन्सरविरोधी वासिनां आयचे काळात गेम चेंजर थारपाक शकतात. अशे लसीकरण पुरायपणान सगल्याक उपलब्ध जालें वा सुलभताय जाली, तांचेविशी एक विश्वासार्ह आनी प्रमाणाचेर आदारीत संवाद जालो आनी मोहिमों जाल्यो, तशेंच शाळांनी आनी शाळांचे भायर ही वासिंना मेळपाची शक्यताय जाली, जाल्यार परिस्थिती बदलूंक शकता, असो मुद्दो डॉ. गुंजन हाणी मांडलो. रोटरीयन डॉ. साजल धोंड हाणी सांगले, भारतासारके देशात, नदरे फुडल्यान आशिल्ल्या लोकसंख्येमदी ८०-१०० टक्के लोकांचे एचपीव्ही (ह्युमन पॅपिलोमा व्हायरस ) लसीकरण करपाचे यत्न वयर वचपाचे दरात वाडत आसात.
हे पिरायेच्या समूहातलें लोकांनी गर्भाशय कर्करोगाच्यो स्क्रिनिंग चाचण्यो जीवितांतल्यान दोन वेळार केल्यो जाल्यार २०७०-७९ हे काळामेरेन गर्भाशयाचो कर्करोग पुराय नश्ट करपाचे ध्येय गाठू येता, अशे ताणी म्हटले.
डॉ. शेखर साळकार हाणी निमाणे वेळार आवाहन करतना म्हटले की, मातृछाया हांगा केल्लो हो ल्हानसो यत्न आसा. चडान चड लोक फुडें येवन आपले भुरग्यांक ल्हान चलीयो आनी चले हांका वासिना दिवन वैजकीं समुदायाक हें दुयेत मुळासावन नश्ट करपाक मजत करची आनी व्हॉट्स ॲप युनिव्हर्सिटी तशेच समाज माध्यमांचेर जावपी अपप्रचाराक बळी पडचे न्हय, अशे आवाहन केले.
रोटरीयन उम्मेय्या शेख हाणी भुरग्यांक लागून च्या बटाटवडे हांची वेवस्था केली. रोटरीयन ॲड. संजना काकोडकर, रोटरी क्लब प्रशासक (क्लब एडमिन ), श्रीमती निमा कामत, उपाध्यक्षा, मातृछाया संस्था, जगन्नाथ भिंगी, मुखेली, बालिका कल्याण आश्रम, तळावली, डॉ. पूर्णिमा उसगावकार, सदस्य, मातृछाया ट्रस्ट हे मानेस्त हें वेळार हाजीर आशिल्ले.
🖋️
सनतकुमार फडते
