पुणे हांगा हालीच जाल्ले फर्स्ट टेक चॅलेंज इंडीयन चॅम्पियनशिप 2024-25 हे अंतरराश्ट्रीय पावंड्यावेले सर्तीत गोयचे शालेय स्तरावेले तीन पंगडांनी बेसबरी कामगिरी केली. गोयचे विविध शाळांतल्यान गेल्ल्या तीन पंगडातल्या भुरग्यांनी सर्तीत वाटो घेतिल्ल्या हेर देशातल्या विद्यार्थ्यांचे पंगडांक बेसबरी टक्कर दिली. हे सर्तीत भारत देशातल्या 45 वयर पंगडांनी जाल्यार कजाकीस्तान, श्रीलंका, युनायटेड अरब अमिरात हे देशातल्या पंगडांनी बी वाटो घेतलो. सर्तीचे माध्यमातल्यान फकत तांत्रिक कौशल्यच न्हय तर मनशाकडेन कृतज्ञताय आसपाक जाय तशेच सर्तीत वाटो घेतना स्पर्धा करचीच पुण एकमेकांची मजतय बी करची, एकमेकांचो आदर करचो, हाचीय शिकवण तेंका मेळी.
गोयचे तीन पंगड हे सर्तीत हे वर्सा देवले हातूतल्यान गोयात रोबोटिक आनी स्टेम (STEAM) शिक्षणाविशी वाडत चलिल्ली जागरूकताय पळोवंक मेळटा. हे सर्तीत गोंयचे तीन पंगड वाटेकार वा सहभागी जाल्ले. ते म्हटल्यार, टेक इन्फिनीटी #25005 (सारस्वत शिक्षण संस्था), क्युरियस माईंड # 25250 (संजय स्कूल फॉर स्पेशल चिल्ड्रन, पर्वरी) आनी प्रोग्रेसिव्ह बोट # 28948 (प्रोग्रेस स्कूल पणजी). सारस्वत शिक्षण संस्थेचो टेक इन्फिनिटी हो पंगड राज्यातले हेर शाळांचे भुरग्यांक एकठाय घेवन सलग दुसरे फावट हे सर्तीत वाटेकार जालो.
१५ तरेतरेचे शाळांतले भुरगे हे पंगडात येवन सर्तीत वाटेकार जालें. संजय स्कूल पर्वरी, हे संस्थेचो पंगड क्युरीयस माईंड # 25250 हे नावान सलग दुसरे फावट सर्तीत वाटेकार जालो. प्रोग्रेस हायस्कूल, पणजी संस्थेचो बोट # 28948 हो पंगड स भुरग्यांक बरोबर घेवन पयलेच फावट सर्तीत वाटेकार जाल्लो.
हे सर्तीचो केंद्रबिंदू हो केवळ रोबोटिक्स तंत्राचो आनी प्रचार करप इतकोच न्हय, तर स्ट्रेम (STRAM) एज्युकेशन भुरग्यांचे मेरेन पावोवप, सर्तीत रावून कृतज्ञताय, दयाभाव ही मुल्यां आत्मसात करप, हेवूय जावन आसा. टेक इन्फिनिटी हे पंगडान आपले तांत्रिक कौशल्य आनी साहित्य हेर पंगडांकडेन वाटून तांका मजत केली.
क्युरीयस माईंड हे पंगडान रोबोटची बांधणी करपाक आनी करपाक सुवात तयार करून दिली जाल्यार प्रोग्रेसिव्ह बोट हो पंगड नवो आसून लेगीत हेर दोन पंगडांक सर्तीचो सराव करपाक मजत करपी आनी आदार दिवपि थारलो. प्रोग्रेसिव बोट # 28948 हे पंगडान परीक्षक निवड पुरस्कार ह्या गटातलो दुसरो उत्तेजनार्थ पुरस्कार वा पारितोषिक मेळेयले जाल्यार टेक इन्फिनिटी पंगडान आपलो गेल्या वर्साचो 38 वो क्रमांक 23 वे अंकाचेर हाडलो.
तशेच क्युरीयस माईंड टीम हे पंगडान फाटले वर्साचे आपले रँकिंग 40 वे क्रमांकाचेर आशिल्ले ते 27 वे क्रमांकाचेर हाडले. हे क्रमांक फक्त आकडे वा संख्या न्हय, जाल्यार ते नामांकन राश्ट्री स्तरावयले हेर पंगडाचेर मात करून मेळयल्ले नामांकन वा रँकिंग आसा.
हे सर्तीचे वेळार सांस्कृतिक कार्यक्रमांचो एक भाग म्हूण तीनय पंगडांनी शिगामो, कार्निव्हाल आनी ख्रिसमस हे लोककलेचे प्रकार सादर केले. टेक इन्फिनिटी हे पंगडातलो वेदांग अनय कामत हो यत्ता चवथेत शिकपि विद्यार्थी सगळ्यात ल्हान चालक वा ड्रायव्हर म्हूण हे सर्तीत उजवाडात आयलो. हे तीनय पंगडांक साईश गांधी, अनय कामत आनी माया कामत हांचे मार्गदर्शन मेळील्ले.
✒️
सनतकुमार फडते
