‘अंत्रूज वनमहोत्सव समिती २०२५’ हाणी आयोजित केल्ल्या चौथ्या सामुदायिक वन महोत्सवाचे येसस्वी आयोजन बेतोडा, निरंकाल कोनशे कोडार ग्रामपंचायत भागातल्या डॉ. लोहिया मैदान आनी नित्य दिव्य योग आश्रमातल्या संकुलात व्हडा उमेदीन जाले. बेतोडा ग्रामपंचायत आनी बोरी जैवविविधताय समितीन थारायील्ल्या मैदानाचे जागेत गोय वनखात्याचे सामाजिक वनीकरण विभागान दिल्ली पाचशी रोपां सहभागी वांगडी हाणी लायली.
अंदू फोंडेचे विविध शाळा, विद्यालय, म्हाविद्यालयाचे ५०० विद्यार्थी, वेगवेगळे जैवविविधताय समिती, शिक्षणिक संस्था, आध्यात्मिक आनी सामाजिक संस्था आनी तांचे प्रतिनिधी अशे मेळून वट्ट ६०० पर्यावरण प्रेमींचे हस्तुकी सकाळी ९ ते ११ ह्या वेळार निरंकाल हांगा डॉ. लोहिया मैदान परीसरात सुमार चारशे आनी एकूण पंचायत क्षेत्रात विविध झाडांची पाचशे रोपां लायली. धुवांधार पडपी पावसाची पर्वा कर नासतना सैममोगी व्हडा उमेदीन आनी जोशात वन महोत्सव मनयलो. गेली चार वर्सा सुरू आशिल्ल्या ह्या उपक्रमाक दर वर्सा बरो प्रतिसाद मेळत आसा.
वन महोत्सवाची सुरूवात डॉ. लोहिया मैदानाचे संकुलात जाली. गणनाथ इंग्लिश हायस्कूलच्या भुरग्यांनी स्वागत गीत सादर केले. भौमानेस्त सोयरे आशिल्ली संशोधक आनी बोरी बीएमसी वांगडी डॉ. अपूर्वा शेट हाणी सृष्टीत आशिल्ल्या जैव विविधतायेची राखण करपाविशी मोलादिक मार्गदर्शन केले.
आयोजन समितीचे अध्यक्ष आनी सरपंच मधू खांडेपारकार, ओल्ड गोवाचे भारतीय शेतकी संशोधन केंद्राचे सेवा निवृत्त उपसंचालक विश्राम गावकार हाणी लेगीत मार्गदर्शन केले. व्यासपीठाचेर बेतोडा उपसरपंच गीता गावडे, आयोजन समितीच्यो सचिव डॉ. विद्या गावडे, वन अधिकारी शेफाली नायक, आयोजन समितीचे सदस्य उदय डांगी, नरेश बाळावे, शंतनु गरूड, निमंत्रक निलेश नायक, सुदेश बोरकार, पत्रकार संघाचे सचिव संतोष नायक, कलाकार उमेश फडते हाजीर आशिल्ले. पंच वांगडी अक्षय गावकार हाणी येवकाराचे उलोवप केले. आयोजन समितीचे वांगडी सुदेश बोरकार हाणी उदघाटन सत्राचे सूत्रसंचालन केले. थळावे पंच वांगडी चंद्रकांत सामंत हाणी उपकार आटयले.
डॉ. लोहिया मैदानाचे भोवतणी तरेतरेची ४०० रोपां कार्यक्रमाक हाजीर मानेस्त लोकांनी लायली. हे वेळार गणनाथ विद्यालय, कामाक्षी उच्च माध्यमिक विद्यालय, इंदिराबाई ढवळीकर विद्यालय, गुरूकुल कवळे, विद्या वृद्धी हायस्कूल, सरकारी विद्यालयां, बेतोडा, सदर, जुना बाजार, कोपरवाडा, शारदा विद्यालय, कल्याण आश्रम, पंचशील विद्यालय, एमआयबीके खांडेपार, आदी विद्यालयातल्या शिक्षक आनी विद्यार्थ्यांनी सहभाग घेतलो. अपरान्त अस्मिता, बीएमसी, मर्दनगड अभियान, पत्रकार संघ, सम्राट क्लब वांगडी, लायन्स क्लब वांगडी, नित्य दिव्य योगाश्रमचे साधक स्नातक वा वांगडी, समाजिक रान विकास विभागाचे अधिकारी, ग्राम पंचायत कर्मचारी वर्गाचे कर्मचारी वांगडी अशा हेर गटांनी बी वाटेकार जावन कार्यक्रम येसस्वी करपाक खासा कश्ट घेतले.
… आनी भुरग्यांनी लुटलो सैमाचो आनंद
वन महोत्सवाचे उक्तावण सत्र सोपले उपरांत १०० सैम मोगी आनी गुरूकुल कवळेच्या विद्यार्थ्यांनी नित्य दिव्य योगाश्रमाक भेट दिली आनी शुद्ध हवेतल्या निसर्गाचो आनंद घेतलो. आश्रम संकुलात रोपटी लावन वनमहोत्सवाची सांगता केली. आश्रमाचे विश्वस्त जयवंत नायक हाणी विद्यार्थ्यांकडे मार्गदर्शन करून संवाद साधलो अंत्रूज वनमहोत्सव समितीचे वावराविशी गौरवपूर्ण उदगार काडले. हे वेळार व्यासपीठाचेर आयोजन समिती सचिव, निमंत्रक, वांगडी आनी शिक्षक हाजीर आशिल्ले. काय पर्यावरण मोगी आनी विद्यार्थ्यांनी आपले अणभव सांगले आनी कार्यक्रमाचो समारोप जालो. आश्रमाचे स्नातक वांगडी हेमंतकुमार गावणेकर हाणी सूत्रसंचालन केले.
फुडले वर्सा जावपी पाचवे अंत्रूज वनमहोत्सवाच्या आयोजनाक लागून फोंडे वाठारांतल्या इत्सूक संस्थांनी बेगोबेग निमंत्रक मनशाकडेन संपर्क करचो अशे आवाहन समितीकडल्यान संबंधित वांगड्यांनी केल्ले आसा.
