केपेंच्या सरकारी म्हाविद्यालयांत इंग्लीश भाशेच्यो सहाय्यक प्राध्यापिका डॉ. तन्वी बांबोळकार आनी गौरवी खंवटे हांणी जर्मनींतल्या हायडलबर्ग शारांत जाल्ल्या 28व्या युरोपियन कॉन्फरन्स फॉर सावथ एशियन स्टडीज (ईसीएसएएस) हातूंत “एक्सप्रॅशन, एजन्सी, आयडॅण्टिटी: स्टडींग धालो, अ जॅण्डर एक्सक्लूसिव्ह फोक डान्स ऑफ गोवा” ह्या नांवान आपलें संशोधन प्रपत्र सादर केलें.
तांचें प्रपत्र खासा क्युरेट केल्ल्या पॅनलाचो एक भाग आशिल्लें आनी ह्या पॅनला खातीर संवसारभरांतल्या विद्वानां कडल्यान 32 प्रपत्रांचें सारांश आयिल्ले. फकत दोन सत्रां आशिल्ल्यान आयोजकांनी पॅनलाच्या विशयाक सगळ्यांत बरीं जुळपी आठ प्रपत्रां स्विकारलीं. धालोचेर तांणी केल्ल्या प्रपत्राची निवड जाल्ल्यान गोंयच्या प्राध्यापकांनी केल्ल्या ह्या जोड संशोधनाक अदीक म्हत्व येता.
ह्या प्रपत्रांत, बायलां खातिरूच आशिल्ल्या धालो ह्या गोंयच्या पारंपारीक लोकनाचाच्या प्रकाराचो अभ्यास केला आनी तो समुदाय चौकटींतल्यान अभिव्यक्ती, अस्तित्वाची जाण करून दिवपी सांस्कृतीक जागो म्हणून कसो काम करता हाचो अभ्यास केला. समकालीन संदर्भांत समाजीक रचणूक, लिंगीक भुमिका आनी सांस्कृताय आनी परंपरेचो भाग समजून घेवपाक लोकपरंपरेची चालू आशिल्ली प्रासंगीकताय ह्या संशोधनांत आसपावीत आसा.
युरोपियन कॉन्फरन्स फॉर सावथ एशियन स्टडीज ही दक्षीण आशियाई संशोधनाच्या सगळ्यांत प्रतिश्ठीत आंतरराष्ट्रीय मंचां मदीं आसा. संवसारभरांतले मुखेल अभ्यासक आनी संशोधक ह्या मंचाचेर एकठांय येतात. डॉ. तन्वी बांबोळकार आनी गौरवी खंवटे हांचो सहभाग आंतरराष्ट्रीय मंचाचेर गोंयचे लोकपरंपरेचें म्हत्व स्पश्ट करताच पूण सादरीकरण, अस्मिताय, आनी लिंग अभ्यासा विशींच्या शिक्षणीक दिवप-घेवपांत प्रादेशीक सांस्कृतीक रुपांची वाडपी स्विकृती दाखयता.
