म्हापशेचे डीएमसी कॉलेज म्हटल्यारच ज्ञानप्रसारक म्हाविद्यालय हे शिक्षणसंस्थेन म्हापशेचो लायन्स क्लब आनी म्हापसा म्हापालिका मंडळ हांका एकठाय घेवन गरम पेय पदार्थ पिवपाक वापरतात ते कागदाचे कपांचो वापर उणे करपाचे मोहिमेक सुरूवात केल्ली आसा. हे निमतान हालीच जाल्ले एका कार्यावळीत म्हापसा म्हापालिका मंडळ हाणी डीएमसी कॉलेज आनी लायन्स क्लब ऑफ म्हापसा हांचे जोडपालवान कार्यक्रमाचे यजमान म्हूण जापसालदारकी घेवन जागृताय घडोवन हाडली.
मोहिमेचे समन्वयक हे नात्यान डॉ. राजेश पेडणेकार हाणी आपले विचार उक्तायतना गरम पेय पदार्थ पिवपाक कागदाचे कपांचो कसो वापर जाता आनी ते मार्फत गरम वा उष्ण तापमानात मायक्रोप्लास्टिक पदार्थाचे निक्षालन वा पदार्थ लवूलवू आजूबाजूचे भागांनी शोषून घेवपाची प्रक्रिया कशी जाता, हे प्रकाराचेर उजवाड घातलो.
हे वेळार डॉ. पेडणेकार हाणी डॉ. सुधा गोयल हाणी आयआयटी खडगपूर हांगा केल्ल्या संशोधन वा अभ्यास अहवालाचो संदर्भ दिलो आनी म्हटले की, एक मनीस जेन्ना तीन कप च्या पिता, तेन्ना ते कपाचे कण अंतर्ग्रहण वा भितर शोषून घेवपाचे प्रक्रियेत तो मनीस खूबच सूक्ष्म वा बारीक अशे ७५ हजार मायक्रो प्लास्टिकचे कण शरीरात ओडून घेता कारण मायक्रोप्लास्टिक शरीरान वा कुडीत घेतना कार्सिनोजेनिक रासायनिक पदार्थ कुडीत गेल्ल्यान हार्मोन असंतुलन, आतड्याच्यो समस्या वा दुयेतां आनी ताचेकडेन संबंदीत आशिल्ले दुयेत जांव येता.
अध्यक्ष डॉ. नूतन बिचोलकार हाणी आपले विचार उक्तायले आनी मायक्रो प्लास्टिकचे विरोधात सुरू केल्ले हे मोहिमेक येस मेळपाक लागून शक्य जाता तितको सगलो आदार दिवपाचे आश्वासन हे वेळार दिले. लायन्स क्लब म्हापसा संस्थेचे अध्यक्ष श्रीधर नायक हाणी आपले भाषणात उलयतना म्हटलें की ही सगल्यात चड दुर्लक्ष जाल्ली अशी समस्या वा प्रस्न जावन आसा आनी आपलो हुस्को उक्तायतना ही मोहीम गोयात सगल्याकडेन व्हरपाचो निर्धार उक्तायलो. नायक हाणी फुडें अशेय बी म्हटलें, मायक्रो प्लास्टिक पॉलिमर या सामके ल्हान वा अतीसूक्ष्म मायक्रोप्लास्टिक घटकांचे उच्चाटन, नाश करप वा हुमटावणी करप आयज काळाची गरज जावन आसा, देखून बऱ्या भालयकीचे जिणेची शैली आनी सैमाची राखण हे दोन घटक आसपी जीण दवरपाक यत्न करतले.
डीएमसी म्हाविद्यालयाचे प्राचार्य प्राध्यापक दिलीप आरोलकार हाणी, शिक्षणाक सामुदायिक गरजो आनी समस्या हांचेकडेन जोडपी तरेतरेचे उपक्रम म्हाविद्यालय कशे राबयता, आनी तातूंत २ हजारचे आसपास विद्यार्थी आनी शिक्षकवर्गाचे सदस्य कसो हातभार लायतात हे विशी सांगले. भारतात सध्याक कर्करोग वा काकराच्या दुयेताचे रूग्ण कशे वाडत आसात, हे प्रस्नाकडेन लक्ष वेधून घेतना संयुक्त राष्ट्रसंघ हे आंतरराष्ट्रीय संघटनेकडेन शाश्वत विकासाचे क्रमांक ३ चें ध्येय आशिल्ल्या बरी भलायकी आनी रोगमुक्त जीण हाचेंकडेन मोहिमेचो संबंद कसो आसा, हे समजावून सांगले.
म्हापसा म्हापालिकेचे उपाध्यक्ष हाणी उपकार आटयलें. इंस्टीट्युशनल इनोव्हेशन कौन्सिलचे समन्वयक डॉ. उमेश गावस, एमएससी विभागाचे समन्वयक डॉ. प्रभात देसाई, डॉ. अभिजीत शेटगावकार, डॉ. सुदेश मोरजकार हे शिक्षकवर्गाचे सदस्य तशेच म्हाविद्यालयाच्या एनएनसी युनिटचे मुखेली संदेश नायक हेवूय बी हे वेळार हे वर्सभर मायक्रोप्लास्टिकचे विरोधात चलपी मोहिमेच्या शुभारंभ कार्यावळीक हाजीर आशिल्ले.
🖋️
(सनतकुमार फडते)
