साहित्य अकादेमीचो युवा साहित्य पुरस्कार जैतीवंत लेखिका नमन सावंत धावस्कर हांच्या घोटयेंतले इंगळे आनी जागवू संवेदना ह्या दोन पुस्तकांचें हालींच लोकार्पण जालें. ज्ञानपीठ पुरस्कार जैतीवंत साहित्यीक दामोदर मावजो आनी पर्यावरणप्रेमी राजेंद्र केरकार हांचे हस्तुकीं पुस्तकांचें विमोचन जालें. हो सुवाळो घोंटेर फार्म हावज, कोपाड्डें, सत्तरी जालो. ह्या सुवाळ्याक कोंकणी कार्यकर्ता आनी फुडारी प्रशांत नायक आनी सहाय्यक प्राध्यपक कुलदीप कामत मानेस्त म्हणून हजर आशिल्ले. संजना पब्लिकेशन्सान दोनूय पुस्तकां प्रकाशीत केल्यांत.
नमन सावंत हांणी एकाच वेळार कोंकणी आनी मराठी अश्या दोन भाशांनी पुस्तकां प्रकाशीत केल्यांत. आधुनीक समाजांतले प्रस्न, संघर्श मांडपा खातीर भाशेचें बंधन मोडून दोन भाशांचें मनोमिलन नमन सावंत हांणी बेस बरें केलां अशें साहित्यीक दामोदर मावजो हांणी सांगलें.
लेखिका नमन सावंत हांच्या पुस्तकांत मानवी भावनांची वस्ती आसा अशें म्हणत पर्यावरणप्रेमी राजेंद्र केरकार हांणी लेखिकेच्या पुस्तकांत प्रतिबिंबीत जावपी समाजीक जबाबदारींचेर भर दिलो. ‘जागवू संवेदना’ ह्या मराठी पुस्तकाक गोंय सरकाराच्या गोवा मराठी अकादमीन अर्थीक सहाय्य दिलां.
साहित्य विश्लेशक प्रशांत नायक आनी कुलदीप कामत हांणी पुस्तकांचेर आपलीं मतां मांडलीं. लेखन हें समाजाक जागृत करपाचें काम करता आनी आपलोय तोच यत्न आसता अशें नमन सावंत हांणी आपल्या उलोवपांत सांगलें.
स्नेहा सबनीस हांणी येवकाराचें उलोवप केलें आनी दिनेश सावंत हांणी उपकार मानले. सारीका नायक हांणी मानेस्तांची वळख केली. सहाय्यक प्राध्यापक ममता वेर्लेकार हांणी सुत्रसंचालन केलें. नमन सावंत हांचीं दोनूय पुस्तकां अमॅझोनाचेर विक्रेक आसात.
