गोयचे एक फामाद गायक कलाकार पुरुषोत्तम पै, हाणी गेली २० वर्सासावन चड कालावधीत गोयात जावपी तरेतरेच्या संगीत, भावगीत तशेच भक्तीगीत कार्यक्रमांनी आपले गायन सादर करून तशेच संगीत आनी गद्य नाटकांनी भूमिका करून नामना जोडिल्ली आसात. काय सिनेमांत लेगीत ताणी भूमिका करून आपली छाप रुपेरी पडद्याचेरय सोडलेली आसा. फक्त एक गायक, कलाकार वा नट म्हणूनच न्हय तर एक गीतकार, संगीतकार म्हणुनय बी पुरुषोत्तम पै आज कार्यमग्न आसात.
तांचे मार्गदर्शनाखालां येत्या ते २२ जानेवारी या दिसां पणजे कोकणी गीतांचो झेलो हो कोकणी भाशेन आशिल्ल्या सदाबहार गीतांचो कार्यक्रम इन्स्टिट्युट मिनेझीस ब्रागांझा संस्थेच्या मुखेल सभाघरात जावपाचो आसा. या संगीत कार्यक्रमात गोयचे नामनेचे कोकणी लेखक, साहित्यिक आनी कवी जशे की पुंडलिक नायक, डॉ. भिकाजी घाणेकर, युसुफ शेख, पंढरीनाथ लोटलीकर, चंद्रिका पाडगावकर, रामानंद जोशी आनी पुरुषोत्तम पै हाणी रचलेल्या गीतां आनी कविता गाण्यांच्या स्वरूपात सादर जातल्यो. पुरुषोत्तम पै हांचे सयत पद्मजा शेणवी काकोडकर, गौरी गावणेकर महाले, श्वेता मांद्रेकर आनी दिनेश पै आंगले हे गोयचे नामनेचे तशेच प्रतिभावंत गायक कलाकार ही गीतां सादर करतले. सोनाली पेडणेकर हांचे सूत्रसंचालन आसतले.
“2001 सावन संस्था सुरू केल्या तेन्ना सावन साबार पिरायेतल्या भुरग्यांक आनी जाणते हांचेखातीर गायन स्पर्धा आयोजित केल्यो. वर्सा 5 ते 15, 15 ते 25 आनी 25 वर्सा पिरायेचे वेल्या प्रौढ दादले आनी बायलो हांचे खातीर रोख बक्षीस आशिल्ली गायन सर्ती घेतल्यो. गानसम्राट आनी गान सम्राज्ञी ही सर्त लग्न जाल्लो दादलो आनी अस्तुरी हांचेलागून घेतली आनी अशे तरेन संस्थेच्या माध्यमातल्यान नव्या दमाचे प्रतिभावंत गायक आनी गायिका हांका संद दिली ह्या गजालीचो अभिमान आसा. तशेच कोकणी गीतांचो झेलो हो आगामी कार्यक्रम करपाचो उद्देश कोकणी भास वाडची, कोकणी भाशेत कार्यक्रम व्हड संख्येन जाता, हे लोकांक कळचे, असो आसा. लोक मोठ्या संख्येन येवचे आनी ताणी कोकणी गीतांच्या कार्यावळीचो आस्वाद घेवचो,असो या कार्यक्रमाचो उद्देश. तशेच कलाकारांनी फक्त पैशांचे फाटल्यान धावचे न्हय तर आपल्या बरोबर बाकीचे कलाकार आनी समाजात आशिल्ल्या हेर लोकांक घेवन फुडें वाटचाल करची,” असो संदेश पुरुषोत्तम पै दिवपाक सोदता.
पुरुषोत्तम पै हाणी २००१ या वर्सा यशप्रभा या संस्थेची स्थापना करतना गीतांचे कार्यक्रम हांचेर भर दिलो. २०१६ या वर्सासावन ताणी संस्थेचे वतीन मराठी नाटकां, खासाकरून संगीत नाटकां करपाक सुरूवात केली. मत्स्यगंधा, सुवर्णतुला, कट्यार काळजात घुसली ही गाजलेली संगीत नाटकां संस्थेच्या वतीन पै हाणी सादर करून लोकांची तोखणाय मेळेयली. यशप्रभा संस्थेच्या वतीन प्रभा संगीत संध्या या संगीत कार्यक्रमांच्या माध्यमातल्यान ताणी गोय, महाराष्ट्र आनी कर्नाटक ह्या राज्यांनी आजुन मेरेन ३५८ कार्यक्रम केल्ले आसात. गोवा का स्वाधीनता संग्राम, छोटा सिपाही, बंबु, स्टँड बाय या साबार हिंदी सिनेमा आनी मार्टीन, केस्ताव दे कोफुसाव या कोकणी सिनेमांत ताणी भूमिका करून नट म्हूण ताणी आपली छाप सोडलेली आसा. नाटक, अभिनय आनी संगीत या क्षेत्रान पै हाणी केल्ल्या कार्याची दखल घेवन तांका २०२२ या वर्सा मुंबई हांगा गोवा महाराष्ट्र एकता संगीत रत्न पुरस्कार हो नामनेचो आनी प्रतिष्ठेचो पुरस्कार महाराष्ट्र सरकारन बहाल केल्लो आसा. येत्या फेब्रुवारी म्हयन्यात फोंडे हांगा जावपी यशप्रभा म्युझिकल नाईट या संस्थेचे वतीन सादर जावपी कार्यक्रमात संगीत नाटकांचे प्रवेश हांचे सयत ते यशप्रभा संस्थेचो संगीत ऑर्केस्ट्रा ही नवे सादरीकरण प्रेक्षकांक भेटोवपाक सज्ज जाल्ले आसात. आमी तांका शुभेच्छा दिवया.
🖋
(सनतकुमार फडते)
