गोवा राज्य पोलिस आनी इंडियन मेडिकल असोसिएशन गोवा राज्य शाखा , सांगात गोवा ह्या संघटनांनी व्हायानार संस्थेच्या वतीन मानस मेंटर्स ताण वेवस्थापन सत्र फोंडा पोलीस स्थानकात आयोजित केल्ले.
मानस मेंटर्स या उपक्रमाचो भाग आशिल्ल्या या व्याख्यानाचे आयोजन पोलिस उपमहानिरीक्षक शिवराम वायंगणकर (एसडीपीओ ) हांच्या मार्गदर्शनाखाला दक्षिण गोय महानिरीक्षक हांचेकडेन भासाभास करून केल्ले.
फोंडा पोलिस स्थानकाचे निरीक्षक विजयनाथ कवळेकार हाणी साबार हाजीर आशिल्ल्या मानेस्तांचो येवकार केलो. ह्या मार्गदर्शन सत्रात मुखेल उलोवपी म्हूण विद्वान संशोधक आनी मानसशास्त्रतज्ञ उर्वीता भाटिया हाणी पोलिस कर्मचाऱ्यांक संबोधित केले. आपले संबोधनात ताणी लवचिकताय, सावधगिरी दवरप वा जाणविकाय दवरप आनी प्रत्यक्षात ताण तणाव वेवस्थापन हाचेविशी काय म्हत्वाचे धडे दिले.
डॉ शेखर साळकार हाणी हे वेळार मोलादिक मार्गदर्शन केले. पोलिस फोर्सात काम करपी पोलिस कर्मचारी आनी अधिकारी हांका तर ताण तणाव वेवस्थापनाची जायती गरज आसा कारण ते सगल्यात चड तणावग्रस्त आसतात मागीर ते तांचे वरिष्ठ राजकारणी आसू वा सर्वसामान्य जनता आनी घराकडल्यान येवपी ताण तर विसरपाचोच ना, अशे साळकार हाणी उदाहरणां दियत नमूद केले.
पोलिस फोर्सात काम करपी कर्मचाऱ्यांक एक सशक्त आनी सहनशील मनीस जावन खंच्याय प्रकारचो ताण सहन करपाक ताकद मेळटली अशे डॉक्टर साळकार हाणी म्हटले. डॉक्टर देवदत्त सैल हाणी उपकार आटयले.
हे वेळार फोंडा पोलिस स्थानकाचे एसडीपीओ पोलिस उपमहानिरीक्षक शिवराम वायंगणकर, पोलिस निरीक्षक विजयनाथ कवळेकार (फोंडे पोलिस स्टेशन), पोलिस निरीक्षक योगेश सावंत (म्हार्दोळ पोलिस स्टेशन), डॉ शेखर साळकार ( वांगडी आनी आदले अध्यक्ष, आयएमए गोवा राज्य आनी अध्यक्ष, आयएमए दिवचल ), डॉ. देवदत्त (टीएसआय गोवा), प्रो – व्हिएनार पदाधिकारी जोन्स सॅम्युएल आनी तीनय पोलिस स्थानकाचे पोलिस कर्मचारी ह्या मार्गदर्शन सत्राक हाजीर आशिल्ले. डॉ शेखर साळकार हाणी समन्वयक म्हणून आपली जापसालदारकी सांबाळ्ळी.
