गोंयचे मराठी साहित्यात एकांकी हे साहित्याचो प्रकार गेली कांय जीर्ण आनी सकयल वचत गेल्ल्या स्थितींत पावल्लो आसतना, नितीन कोलवेकार हांचे सारको लेखक उबो रावता आनी नवो प्रयोग करपाचो यत्न करता, हे तोखणाय करपा सारके आसा. तांची “आय लव्ह यू” ही एकांकी मोग करतना जिणेची विसंगती जशी दाखोवन दिता, तशी तरणाट्या वर्गातली अन्यायाच्या विरोधात आशिल्ली चीड दाखोवन दिता. ह्या साहित्यकृतीतली कविता पारंपरिक पद्धतीची “फॉल इन लव्ह” कविता न्हय, तर “राईझ इन लव्ह” चें प्रकाराची आसा, अशे तोखणायेचे उतर एकांकी लेखक, साहित्य अभ्यासक, साहित्य समीक्षक आनी गोवा मराठी अकादमी, पणजे हें संस्थेचें अध्यक्ष आशिल्ले प्राध्यापक अनिल सामंत हाणी फोंडे हांगा राजीव गांधी कलामंदिर हांगच्या परिषद सभाघरात उलयतना काडलें.
गोंय मराठी अकादमी पणजी हे संस्थेचे फोंडा प्रभागाचे वतीन आयोजित केल्ल्या “आय लव यू” हे नवे एकांकी पुस्तकाचे प्रकाशन सुवाळ्यात मुखेल सोयरे म्हूण प्रा. सामंत हे उलयताले.
सामंत हाणी फुडें म्हटलें, हे पुस्तकाचे वाडमयीन वा साहित्यिक मोल सामके वयल्या पावंड्यावयले आसा. सुरुवातीच्यो कविता मोगाचे विविध कंगोरे वा “अँगल” दाखोवपी, मोगाच्यो यादी, केल्ल्यो चुको आनी मजा तशेंच मोगान जावपी फजिती दखोवपी आसात, तर उपरांत येवपि कविता समाजातलों संघर्श, गिधाडां, झुजां पेटोवपी राजकारण हे दाखोवपी आसा. फुडें ही एकांकी करपी नाटय पंगडाक कवितेची जाण वा संकल्पना, म्हायती आसप म्हत्वाचे थारतलें, अशे ताणी नमूद केलें.
पुस्तकाचेर उलोवपी मुखेल वक्ते म्हूण कवी, साहित्यिक आनी गझलकार दत्तप्रसाद जोग हाणी उलयतना ‘आय लव्ह यू’ हे शीर्षक तरणाट्या पिळगेक आकर्षित करपी थारतलें हे सांगतना कवींचे कार्यक्षेत्रात वा मुलुखात येवपालागुन कोलवेकार हांका परबी दिली. कवितेचेर मेहनत घेवची पडटा हे कवी कोलवेकार मान्य करतात, ही तोखणाय करपा सारकिल्ली गजाल अशे जोग हाणी म्हळे. राजकी नेत्यांक कवि हेच कशे सांबाळून घेवंक शकतात हे फामाद कवी नीरज आनी आदलें पंतप्रधान पंडित जवाहरलाल नेहरू हांचेमदी घडिल्लो किस्सो वा एनिकडोट सांगून ताणी लोकांमदी हासयाळे फुलयलें.
व्यासपीठाचेर हे वेळार नितीन कोलवेकार, संचीत प्रकाशन संस्थेचे मुखेली आनी “सुरसाधक” हे गाजील्ल्या नाटकाचे लेखक संदीप मणेरीकार, मराठी अकादमीचे फोंडा प्रभाग अध्यक्ष निलेश नायक, फोंडे प्रभाग सचिव प्राध्यापिका वरदा गाड केरकार, नाटय कलाकार आनी कवयित्री उर्वशी कवळेकार हे मानेस्त हाजीर आशिल्ले. कोलवेकार हाणी उलयतना १९८० चे दशकात सचिन कांदोळकार, विष्णू वाघ हे मातब्बर लेखकांचे मदी लेखनाक तिसरे ईनाम फावो जातकी आपुण बरोवंक शकता हाची जाण जाल्ली तेन्ना पसून पद्य लेखनाबराबर आपल्यो कविता निशा कोलवेकार हे टोपण नावान कश्यो छापून येताल्यो हाचो गौप्यस्फोट केलो.
मणेरीकार हाणी लेखकाबराबर सूर साधक नाटकाचे निमतान जाल्ली वळख आनी प्रकाशनाविशीचे मुद्दे दवरले. निलेश नायक हाणी गोंय मराठी अकादमीचो फोंडा प्रभाग साहित्याविशी कशे कार्यक्रम आयोजित करून साहित्याविशी वावर करता, हाची म्हायती दिली. उर्वशी कवळेकार हाणी सुत्रसंचालन केले. वरदा गाड केरकार हाणी उपकाराचे उलोवप केले. अनिल सामंत हांचे हस्तुकी दत्तप्रसाद जोग हांका यादस्ती भेटयली.
कोलवेकार हांचे कुटुंबीय हांचेसयत मित्र परिवार, नाटय मोगी तशेच ज्येष्ठ पत्रकार सुरेश नायक, फोंडा गट काँग्रेसचे नेते राजेश शेट वेरेकार, नाटय कलाकार आनी गायक अजयकुमार लोटलीकार, सामाजिक कार्यकर्ते प्रमोद सावंत, सिनेमा कलाकार प्रितंका मांद्रेकार, डॉ. अर्जुन देव, लोक कलाकार कमलाकर म्हाळशी, सुदेश नायक, प्रमदा देसाय, कला मंदिरचे सुशांत नायक, सामजिक कार्यकर्ते ॲड. शैलेश कुलकर्णी आनी केपे, मडगाव, पणजी, काणकोण, पर्वरी तशेच पुणे, मुंबय आनी कोल्हापुर हांगच्यान आयिल्लें कोलवेकार हांचे बरे मागपी आनी चाहते हाजीर आशिल्ले. उपरांत साहित्य अभिवाचन संवाद शृंखला हांचे खालां आय लव्ह यू हे एकांकीचें नाटयवाचन प्रकारांत सादरीकरण जालें. तातुंत नितीन कोलवेकार, दूरदर्शन मुलाखतकार श्रुती हजारे हाणी सहभाग घेतलो. विनय बोरकार हाणी पार्श्वसंगीत दिले.
🖋️
(सनतकुमार फडते)
