गोयचे फामाद कावी कलाकार आनी मूर्तीकार सागर नाईक मुळे हाणी गोंयची प्राचीन कावी कला देशाचे आनी सांसारिक पावंड्यार व्हरून, कावी कलेक लागून जायती नामनां आता मेरेन जोडलेली आसात. ” युनायटेड नेशन्स” (युएन) वा संयुक्त राष्ट्रसंघाचे ” युनेस्को” हे संघटनेचे वतीन जावपी सांसारिक वारसो समितीचे बसकेक सागर नाईक मुळे गोंयचे कावी कलेचे प्रदर्शन करपाचे आसात. फाल्या २१ जून २०२४ हे दिसा ताची सुरूवातजाता.
संयुक्त राष्ट्रसंघ हे आंतरराष्ट्रीय संघटनेची शिक्षणिक विज्ञानिक आनी सांस्कृतिक संस्था (युनेस्को) ही खासा तयार केल्ली शाखा सांसारिक मळाचेर शिक्षण, कला, विज्ञान आनी संस्कृताय हांचे माध्यमातल्यान सांसारिक शांतताय आनी सुरक्षा हांचो प्रचार करपाक खासां स्थापन केल्ली आसा.
युनेस्कोची वर्ल्ड हेरिटेज कमिटी मीटिंग (डब्ल्यूएचसीएम) ही खासा बसकां नवी दिल्ली हांगा अशिल्ल्या प्रगती मैदान हांगा भारत मंडपम हेचे आवारात जावपाच्यो आसात. २१ जुलै ते ३१ जुलै २०२४ हे काळात जावपी हे काळात जावपी हे आंतरराष्ट्रीय थरावेल्या बसकेक सागर मुळे, शिल्पकला तज्ञ कलाकार आनी तैलचित्रां रंगोवपी कलाकारांच्या समूहात कावी कलाकार हे नात्यांत सहभागी जातलें. हे बसकेक हस्तकला प्रदर्शन आनी जागृताय कार्यक्रम जातलो, तशेच हे कार्यक्रमाक देशातले व्हड कलाकार आनी कारागीर हांका आमंत्रण दिवन आपयल्ले आसात. सागर मुळे आपले कावी कलेचे पद्धतीन तयार केल्ले चित्रकृती आनी हेर कलाकुसर हांचे प्रदर्शन हे निमतान आंतरराष्ट्रीय थरावेल्या तशेच देशी कलामोगी प्रेक्षकांक घडयतले.
नवी दिल्ली हांगा आशिल्ल्या विकास विभागाचे आयुक्त कार्यालयातल्यान मुळे हांका हे आमंत्रण आयिल्ले आसा. कलेचे तरेतरेचे माध्यमातल्यान मुळे हाणी कावी कलेचे प्रदर्शन आयज मेरेन घडयिल्ले आसा.
२०१९ सालांत ” मन की बात” हे रेडियो कार्यावळीत प्रधानमंत्री नरेंद्र मोदी हाणी सागर नाईक मुळे हांचो उल्लेख करून मुळे हांका राष्ट्रीय मळाचेर वळख मेळोवन दिल्ली आसा.
” भारत मातेन कावी कलेक आपले वेंगेन धरला, आनी एक व्हड अशे व्यासपीठ आयज हे बसकेचे रूपात भारतमातेकडल्यान कावी कलेक मेळटा. युनेस्कोचे वर्ल्ड कमिटी मीटिंगचे स्वरूपात मेळील्लो हो एक भोवमान आसा. युनेस्कोचेवतीन भारताचे १८ कलाकार, कारागीर हांगा वाटेकार जातले. म्हाका खूब खुशी जाता कारण आमचे तांबडी मातीयेक आंतरराष्ट्रीय स्तराचेर न्याय मेळील्लो आसा,” – सागर नाईक मुळे.
🖋
(सनतकुमार फडते)