‘ विवेकानंद एंजल अवॉर्ड्स ‘ हे पुरस्कार सोहळ्याचे कार्यावळीत सामाजिक संस्थांचे माध्यमातल्यान समाजाचे तरेतरेचे पिडीत घटकांक वयर येवपाक मजत करपी सामाजिक कार्यकर्ते दुर्गादास परब, नमन सावंत धावस्कार, व्हिक्टर ह्युगो गोम्स आनी संदीप परब हांचो सत्कार जालो. गोयचे मुक्तीसंग्रामात रेडियो चलोवन हातभार लावपी स्वातंत्र्यसैनिक, गोंयचे पर्यटन खात्याच्यो पयल्यो संचालिका, गोंयचे सहकारी बँकेच्यो आनी होम सायन्स म्हाविद्यालयाच्यो संस्थापक श्रीमती लिबिया लोबो सरदेसाय हे वेळार मुखेल सोयरी म्हूण हाजीर आशिल्ली. श्रीमती लिबिया हाणी म्हटले, विवेकानंद हे सदाच अध्यात्मिकतेकडे झुकलेले आशिल्ले. रामकृष्ण परमहंस हांचेकडेन संबंद येयल्या उपरांत ताणी परमहंस हांचे तत्वज्ञान संसारात पावयले. स्वामीजी अशे म्हणटाले, आमका अशे मनीस जाय, जे फकत स्वतःचोच न्हय तर दुसऱ्यांचोय बी विचार करतले. आपल्या भवतलचे वातावरणात लोकांबरोबर किदे जाता, हांचोय तांका हुस्को आसतलो. सगल्यांक बरे जिवीत मेळचे, असो ते विचार करतात, अशे लिबिया हाणी म्हटलें. गरिबांची उदरगत करीत जाल्यारच या देशाक फुडार आसा, अशे स्वामी विवेकानंद मानताले, अशे लिबिया हाणी नमूद केले. स्वामीजी सदाच दुसऱ्यांक मजत करताले अशे सांगतना तांचे जिवितातल्यो काय घडणुको श्रीमती लिबिया हाणी सांगल्यो.
थॉमस स्टीफन्स कोकणी केंद्र, पर्वरी हांगा जाल्ले कार्यावळीत व्यासपीठार संस्थेचे संचालक पांडुरंग फळदेसाय, इथरनेट एक्सप्रेस फाउंडेशनचे सर्वेसर्वा सागर गोवेकर आनी उद्योजक विजय पाटील हाजीर आशिल्ले. दुर्गादास परब, नमन सावंत धावस्कार, व्हिक्टर गोम्स आनी संदीप परब हांचो सत्कार हे वेळार श्रीमती लिबिया लोबो सरदेसाय हांचे हस्तुकी जालो. उर्जा फाऊंडेशन संस्थेचे माध्यमातल्यान गरीब विद्यार्थ्यांक शिक्षणाक अर्थीक मजत करपी दुर्गादास परब हाणी आपले अणभव हे वेळार सांगले. गोयचे ” म्युझियम मॅन” म्हूण वळख आशिल्ले तशेच गोंयचे हस्तकारागीरांक सोपोवंक पाविल्ल्यो कला आनी हस्तकारागिरी तिगोवन दवरपाक मजत करपी व्हिक्टर ह्यूगो गोम्स हाणी गोंयात अस्तंगत जाल्ले कोकणी शब्द, आदले हस्तकारागिरीचे कौशल्य, संग्रहित वस्तू हांचेविशी म्हायती दितना म्युझियम आनी वस्तूसंग्रहालय शास्त्राचो अभ्यास हांचो आस्पाव शिक्षणीक अभ्यासक्रमात करचो अशे मत उक्तायले.
संवेदना केंद्राचे माध्यमातल्यान वानरमारे समाजातल्या भुरग्यांक समाजाचे मुखेल प्रवाहात येवपाक मजत करपी नमन सावंत धावस्कार हाणी आपले अणभव सांगले. जीवनानंद संस्थेचे माध्यमातल्यान रस्त्याचेर मेळपी बेवारस लोक आनी भुरगे हांका आदार दिवपाचे काम गेली काय वर्सा कशे करता, हाची म्हायती आनी अणभव संस्थेचे संदीप परब हाणी सांगले. इथरनॅट एक्सप्रेस फाउंडेशनचे सागर गोवेकर हाणी मानेस्तांचे येवकाराचे उलोवप केले. प्रणिता नास्नोडकार देखणे हाणी कार्यावळीचे सुत्रसंचालन केले. इथरनॅट एक्सप्रेस फाउंडेशनचे मुखेल कार्यकारी अधिकारी महेंद्र तिवारी हाणी उपकाराचे उलोवप केले. सत्कारमूर्ती हांची वळख करपाची जबाबदारी आनी कार्यावळीचे सूत्रधार म्हूण प्रवीण सबनीस हाणी जबाबदारी हाताळली.
🖋️
सनतकुमार फडते
