सैमाची शाश्वतताय फुडें व्हरपाक आनी स्थानिक शेतकारांक आदार दिवपाचे उद्देशान ज्ञान प्रसारक मंडळ कॉलेज आनी रिसर्च सेंटर हे म्हाविद्यालयान, ‘ धी ब्लू काईट ‘ हे संस्थेचे सहकार्यान झाडां रोवपाचे आनी रोपांचे वाटप करपाचो कार्यक्रम हालीच हसापूर, पेडणे म्हालांत आशिल्ले डॉ. मळीक फार्म हांचे आवारात घडोवन हाडलो. पेडणे मतदारसंघात आशिल्ल्या काय मोजक्या शेतकारांक फळां येवपी रोपां (हातूंत जांभळां, श्रीफळ, नीरफणस, काजू, चिंच आनी आंबे हांचो आस्पाव आसा ) हांचो वाटप केले. हाचे सयत शाश्वतताय आनी उपजिवीका हांका हातभार लावपाचे उद्देशान ३००० किलो जैविक खताचे वाटप केले. शेतकारांचे समुदायात शाश्वत तिगोवन उरपी उपजीवीका वा जीवीतकाय आनी आर्थिक उदरगत हे लक्ष्य दवरून कार्यक्रमाचे आयोजन जाल्ले.
मुळात रेंटल कंपनी आशिल्ली ‘ ब्लू काईट ‘ ही, गोयचे निसर्गिक सोबितकाय आनी सैमीक भलायकी तिगोवन दवरपाक कार्यरत आसा. डीएमसी म्हाविद्यालयाचे दोन छात्रांची मजत घेवन रोपांची वाड झाडांनी जावपाचे प्रक्रियेचेर लक्ष दवरपाची जबाबदारी हे कंपनीचेवतीन घेतिल्ली आसा. दोन वर्साचे कार्यकाळाक लागून हे दोन छात्रांक कंपनीकडल्यान शिष्यवृत्ती मेळटली. ‘ ग्रीनींग कम्युनिटीज प्रोजेक्ट ‘ हे प्रकल्पाचे माध्यमातल्यान गोयात शाश्वत विकास करपाचे निर्धाराविशी कटिबद्ध रावपाचो निश्चय हे वेळार ब्लू काइटचे मुखेल कार्यकारी अधिकारी कॅरोलिन मुलीएज हाणी उलोवन दाखयलो.
शेतकारांची उपजीविका आनी आय वा मिळकत वाडोवप अशे लक्ष्य हे हरीत उपक्रमात निर्धारित केल्ले आसा जे संयुक्त राष्ट्रसंघाचे निर्धारित केल्ल्या शाश्वत विकासाचे उद्दिष्टांक धरून आसात. हो उपक्रम म्हळ्यार ज्ञानप्रसारक मंडळ म्हाविद्यालय आनी संशोधन केंद्र आनी उन्नत भारत अभियान हांचे भितरलो एक संयुक्त उपक्रम आसा जो पर्यावरणाची राखण करपाचे सामुदायिक सहभागाचे महत्व अधोरेखित करता. ब्लू काईटची सीईओ मुलीएज हाणी हे वेळार उलयतना, फळां येवपी १००० झाडां लावन आमी फकत गोयचे हरीत भूभागाविशी आपले योगदान दिनात तर स्थानिक शेतकारांक फाटबळगे दिता आस्तना कार्बन उत्सर्जन बी कमी करतात, असो मुद्दो उक्तायलो.
उच्च शिक्षणाचो संबंद समुदायाच्यो गरजो हांचेकडेन जोडपाचो एक यत्न म्हूण उन्नत भारत अभियान उपक्रमाचे नोडल अधिकारी आनी सहाय्यक प्राध्यापक डॉ. राजेश पेडणेकार हाणी युबीए आनी कम्युनिटी आऊटरिच सेल हांचेखाला डीएमसी म्हाविद्यालयान केल्ल्या कामाचो नियाळ सादर केलो. शेतकार समुदायाक लागून आशिल्ल्या उत्पादक कंपनीचे पेडणे तालुक्याचे चेअरमन आनी संचालक उदय प्रभुदेसाय हाणी म्हाविद्यालयाचेवतीन केल्ल्या वावराची तोखणाय करतना आर्थिक आस्पाव आशिल्ल्या जायते प्रकल्पांनी शेतकार उत्पादक कंपनीचेवतीन मजत करपाचे आश्वासन दिले.
क्षेत्रीय कृषी अधिकारी प्रकाश पालयेकार (पेडणे), हसापुर पंचायतीचे पंच प्रजय मळीक, डीएमसी म्हाविद्यालयाचे सहायक प्राध्यापक नामदेव तुळसकर, ब्लू काईट कंपनीचे अधिकारी आनी गोवा कृषी म्हाविद्यालयाचे छात्र हे वेळार हाजीर आशिल्ले. मळीक फार्मचे मुखेली चैतन्य मळीक हाणी सगल्यांचे येवकारपण यजमान हे नात्यान केले. ब्लू काईट कंपनीचे कर्मचारी संगम म्हापसेकर आनी क्रिसिया रोड्रिगीज यांनी कार्यावळीचे समन्वयक म्हूण जापसालदारकी पळयली.
🖋️
(सनतकुमार फडते)
