अयोध्या हांगा निकतेच २२ जानेवारी ह्या दिसां प्रभू श्रीराम हांचे मूर्तीचो प्राण प्रतिष्ठा सुवाळो देशभरात दबाज्यात संपन्न जालो. देशभरात नागरिकानी उत्सव साजरो करतना जायते कलाकारांनी आपापले पद्धतीन रामाचेर आदारील्ल्या कलेचे दर्शन घडयले. गोयात नामनेचे कावी कलाकार सागर नाईक मुळे हाणी मिरामार रेतीचेर आदारील्ली रेती कलाकृती म्हटल्यार सेंड आर्ट आनी कॅनव्हास पेंटिंग कलाकृती आनी कुडचडे हांगा रवींद्र भवनाचे आवारात एक कॅनव्हास पेंटिंग कलाकृती अशा माध्यमांतल्यान एक अशे मिळून एकूण तीन कलाकृती प्राण प्रतिष्ठा सुवाळ्याचे आदले दिसां उब्यो करून श्रीराम मूर्ती प्राण प्रतिष्ठा सुवाळो आनी श्रीरामाविशीं कलेच्या माध्यमांतल्यान आपली भक्ती उक्तायली.
अयोध्या जावपी सुवाळ्यांक चार दिस आसतना आदले मंत्री नीलेश काब्राल ताचे ऑफिसातल्यान फोन आयलो आनी दोन दिस उरलेले आसतना पणजेचे आमदार बाबूश मोन्सेरात हांचेकडल्यान फोन आयलो. दोनय कडल्यान प्राणप्रतिष्ठा सुवाळ्याचे फाटभूयेचेर कावी कलाकृती उबी करपाचो प्रस्ताव आशिल्लो आनी हातीन कामां आसनुय बी रामाचे भक्तीक लागून हे दोनय प्रस्ताव स्वीकारले, अशें नाईक मुळे म्हणटात.
कुडचडे, रवींद्र भवन आवारात १०x ७.५० उंची आनी व्यासाचे रामाचे चित्र कावी कलेचो आदार घेवन उबे केले. तर मिरामार हांगा रेतीवयली भव्य प्रतिकृती आनी कॅनव्हास पेंटिंग हाजो उपेग करून तयार केल्ले कावी चित्र अशे तरेन एकूण तीन कलाकृती तीन दिसांच्या कालावधीन उब्यो केल्यो. कुडचडे हांगा चित्र उबे करतना निखिल शिरोडकर हे एका स्थानिक संघटनेचे पदाधिकारी हाणी खूब मजत केली. मिरामार हांगा श्रीरामाचेर आदारिल्ले सेंड आर्ट आनी कॅनव्हास पेंटिंग उबे करपाक पणजी महापालिका मंडळाचे १५ कामगार आनी हर्ष नायक, आश्वेक नायक, दुर्गेश वेंगुर्लेकर, आंचल कुबल हे गोवा कला महाविद्यालयाचे छात्र आनी शुभम गावडे हो स्थानिक कलाकार अशे २० जण मिळून सगल्यांनी एकठाय येवन खूब सहकार्य केले, अशें सागर नाईक मुळे नीमाणे नमूद करतात.
” खूब कमी वेळ आसतना आमी रातीचे दिस करून ह्यो तीनय कलाकृती उब्यो केल्यो तेज्या फाटल्यान प्रभू श्रीरामाचीच प्रेरणा आसा. वानरांनी जशे रामसेतू बांधून उबो केल्लो, तशेच आमी तीन दिस दोन राती खपून ह्यो तीनय कलाकृती राम आनी मातीयेच्या आशीर्वादान उब्यो केल्ल्यो,” म्हणटात सागर नाईक मुळे.
🖋
(सनतकुमार फडते)
