वानरमारे म्हूण वळख आशिल्ल्या कातकरी समुदायाची एक वस्ती निरंकाल हांगा आसा. हे समुदायाक लागून वावुरपी संस्था म्हूण संवेदन केंद्र साखळी हांगा कार्यरत आसा. कातकरी समाजाच्या शिक्षणीक आनी सामाजिक उदरगतीक लागून वावुरपी हे संस्थेकडल्यान आपल्या वावराची आनी कार्यकर्त्यांचे अनुभव मांडपी विशेष अंकाचे प्रकाशन निकतेच मुख्यमंत्री डॉ. प्रमोद सावंत हांचे हस्तुकी केले. हे वेळार संवेदन केंद्राच्यो अध्यक्ष माधवी राणे आनी नमन धावस्कर सावंत, दशरथ मोरजकर, देवानंद गावडे, कविता यमकर तशेच बाबनी मापारी हे केंद्राचे वांगडी हाजीर आशिल्ले.
संवेदन केंद्र फाटली तीन वर्सासावन सातत्यान कातकरी समाजाच्या शिक्षणीक, भलायकी, सामाजिक उदरगतीक लागून आनी तेंची प्रमाणपत्रां तयार करपाक वावर करता. या कामाक लागून केंद्राचे दोन कार्यकर्ते पुराय वेळ ह्याच वावराक लागून सक्रिय रावून काम करतात. यावेळार अध्यक्ष माधवी राणे हाणी उलयतना म्हटलें की कातकरी समाजातल्या भुरग्यांच्या शिक्षणाचेर आता आमी लक्ष दीवपाक सुरू केला आनी शिक्षणाच्या माध्यमातल्यान ह्या समाजाक समाजाच्या मुखेल प्रवाहात हाडपाक आमचे यत्न सुरू आसात. तशेच तांच्या हेर समस्यांचेरय बी काम सुरू आसा, अशे ताणी म्हटले.
हे वेळार उपकार आटयतना श्रीमती राणे हाणी विशेषांकाचे संपादन करपी श्रीमती स्नेहा सबनीस, अंकात बरोवपी लेखक आनी ते बरोबरच संवेदन केंद्राचो कारभार उबो करपाक देणगी दिवन तशेच विशेषांकात जायरात दिवन मजत करपी सगल्या लोकांचे ताणी उपकार आटयले.
विशेष अंकात ह्या बरोवप्यानी दिला योगदान
ह्या विशेष अंकात दशरथ मोरजकार हाणी कातकरी समाजाच्या लोकांसयत केल्लो वावर आनी राबयल्ले तरेतरेचे उपक्रम हे विशी म्हायती बरयल्ली आसा. कातकरी समाजाच्या उदरगतीक लागून सुरुवातीच्या काळात वावर करपी दाभाळ हांगचे सामाजिक कार्यकर्ते डॉ. सचिन तेंडुलकार हाणी आपलो कातकरी समुदायासयत केल्लो वावर एका लेखात मांडलेलो आसा. तशेच महाराष्ट्रात रायगड हांगा फाटले तीन दसकासावन कातकरी समाजाक लागून वावुरपी सामाजिक कार्यकर्ती डॉ. वैशाली पाटील हाणी कातकरींचे आदारील्ल्या वावराचेर बरयिल्ले आसा.
गोयात पर्यावरण चळवळीक लागून वावुरपी पर्यावरण प्रेमी राजेंद्र केरकार हाणी गोयच्या धनगर गवळी समाजान शिक्षणाच्या माध्यमातल्यान केल्लो विकास हेविशी बरोवप केल्ले आसा. सामाजिक कार्यकर्ते देवेंद्र कांदोळकर, संगीता नायक आनी पंक्ती जोग हाणी मार्गदर्शन करपी बरयल्ले आसा. कातकरी भुरग्यांक शिकोवपी आर्या नायक हाणी कातकरी भुरग्यांक शिक्षण दितनाचे अणभव मांडलेले आसात. सामाजिक कार्यकर्ते सर्वेश नायक हाणी मार्गदर्शन करपी लेखन केल्ले आसा.
तशेच संवेदन केंद्राचे कार्यकर्ते नमन सावंत, माधवी राणे, स्नेहा गावस, देवानंद गावडे, कविता यमकर, बाबनी मापारी, प्राची गावकर, तुलना गावस, बेबीनाझ शेख हाणी आपल्या अणभवांचे आदरिल्ले बरोवप केल्ले आसा. सज्जला पडवळकर हाणी कातकरी भुरग्यांसयत केल्ले खेळांविशीचे कार्य आपल्या लेखात मांडलेले आसा. कातकरी भुरग्यांक शिबिराच्या माध्यमातल्यान शिकवणी घेवन मजत करपी विद्यार्थी पारस किशोर नाणसेकर हाणी आपलो अणभव बरयिल्लो आसा तर गणपत पार्सेकार शिक्षण म्हाविद्यालयाची विद्यार्थिनी सर्गेस्त भक्ती सुतार हांचो कातकरी भुरग्यांक शिकवणी वर्ग घेता आसतना आयिल्ले अणभव सांगपी लेखाचोय बी आस्पाव हे विशेष अंकात केल्लो आसा.
🖋️
सनतकुमार फडते
