फोंडेंचे दीनानाथ दलाल मेमोरियल आर्ट एज्युकेशन सेंटर आनी पर्वरेचे गोंय माध्यमीक आनी उच्च माध्यमीक शिक्षण मंडळ हांणी संयुक्तपणान गोंयच्या कला शिक्षकां खातीर कला कार्यशाळा घडोवन हाडल्या. ही कार्यशाळा 30 सप्टेंबराक सकाळीं 9.30 ते सांजे 5.30 मेरेन फोंडेंच्या बांबोळकार आर्ट गॅलरींत जातली. गोंयच्या सात तालुक्यांतले सुमार 90 कला शिक्षक हे कार्यशाळेंत वांटो घेतले. वेग-वेगळ्या सत्रांतल्यान कला शिक्षकांची कलाकुशळटाय वाडोवपाचो हे कार्यशाळेचो उद्देश आसा.
कार्यशाळेचें उक्तावण मुखेल सोयरे श्री. दीप कारापूरकर, ई.एफ.ओ., सिटीस्केप डेव्हलपर्स करतले. डी. डी. दलाल मेमोरियल आर्ट एज्युकेशन सेंटराचे संचालक श्री. श्रीधर कामत बांबोळकार आनी गोंय शिक्षण मंडळाचे अध्यक्ष श्री. भगिरथ शेट्ये हेय ह्या वेळार हाजीर आसतले. समारोप सुवाळ्याक फोंडेंच्या गोंय विद्याप्रसारक मंडळाचे अध्यक्ष श्री. कृष्णा शेट्ये मुखेल सोयरे आसतले.
कार्यशाळेंत श्री. दीपक गाड हांचें वर्ग अध्यापन धडे योजना, श्री. आनंद नार्वेकार हांचें क्राफ्ट प्रात्यक्षिका, श्री. दिलेश हजारे हांचें हेड स्टडी, श्री. सागर नाईक मुळे हांचें कावी कला, श्री. प्रवीण नायक हांचें स्टील लायफ हीं सत्रां जातलीं. इमेज इन्फोटेनमेंट लिमिटेड कंपनी वतीन खाशेल्या सादरीकरणाचेंय आयोजन केलां अशी माहिती आयोजक श्रीधर कामत बांबोळकार हांणी दिली. श्री. तमिलारासन, श्री. वसथन, श्री. सलमान शरीफ हे ग्राफिक डिझायन, फॅशन डिझायन, कला, चित्रकला आनी चित्रांकन ह्या मळार आपलो अणभव मांडटले.
