राज्य माहिती आयोगांतले रोजनामे, टिपण राजभाशेंतल्यान बरोवंक सुरवात जाल्या. तशेंच वेग-वेगळ्या खात्यांतल्यान अर्ज लेगीत कोंकणींतल्यान येवपाक लागल्यात अशें राज्य माहिती आयुक्त ॲड. आत्माराम बर्वे हांणी सांगलें. प्रशासकी पांवड्यार टिपण, पत्रां राजभाशेंतल्यानूच बरोवंक जाय आनी ते खातीर राजभाशा संचालनालयान आनीक नेटान वावर करूंक जाय अशें तांणी सांगलें. तशेंच सरकारी राजपत्र कोंकणींतल्यान काडपाची जापसालदारकी आमची सगळ्यांची आसा आनी ते खातीर सगळ्या खात्यांनी नेटान वावर करूंक जाय अशें तांणी सांगलें. राजभाशा संचालनालयान पर्वरेच्या विद्या प्रबोधिनी म्हाविद्यालयाच्या जोड पालवान राजभाशा दीस मनयलो. ह्या वेळार मुखेल सोयरे ह्या नात्यान ॲड. आत्माराम बर्वे उलयताले. ही कार्यावळ 4 फेब्रुवारी दिसा विद्या प्रबोधिनी म्हाविद्यालयांत जाली.
जे भाशेक लागून आमी पोट भरतात आनी तेच भाशेचेर जर दुर्लक्ष करतात जाल्यार आमचेच भाशेचेर आमी अन्याय करतात. राजभाशा अंमलबजावणी जावंक आतांच्यानूय नेटान वावर करूंक जाय आनी आपले स्वताचे भाशेचो वापर चडांत चड करुया असो उलो अशें ॲड. आत्माराम बर्वे हांणी मारलो. कोंकणी आनी मराठी ह्या दोनूय भाशां मदीं वाद जावंक जायना. दोनूय भाशा एकामेकांक पुरक आनी पोशक आसात अशें तांणी मुखार सांगलें.
कोंकणी राजभाशा जाली म्हणून गोंयाक घटकराज्याचो दर्जो मेळ्ळो. कोंकणीक लागुनूच गोंयकारांक नोकरेच्यो संदी मेळटात. आतां प्रशासनांत लेगीत कोंकणीचो चडांत चड वापर जावंक जाय अशें प्राचार्य डॉ. भूषण भावे हांणी सांगलें. प्रशासनांत कोंकणीचो चडांत चड वापर जावचो म्हणून राजभाशा संचालनालय वावुरता. ते खातीर डॉ. भूषण भावे हांणी संचालनालयाची तोखणाय केली.
ह्या सुवाळ्या वेळार, राजभाशा संचालनालयाचे संचालक प्रशांत शिरोडकर हांणी प्रास्तावीक उलोवप केलें. राजभाशेची अंमलबजावणी करूंक कोंकणी प्रशिक्षण, देवनागरी टंकलेखन प्रशिक्षण आनी शब्दावली निर्मितीचें काम नेटान चालू आसा अशें तांणी सांगलें. हे कार्यावळीक, प्रबोधन शिक्षण संस्थेचे अध्यक्ष संजय वालावलकर, तशेंच वांगडी श्रीपाद उर्फ कांता पाटणेकार, राजभाशा उपसंचालक अनिल सावंत हाजीर आशिल्ले. कार्यावळीचें मुख्य संयोजन राजभाशा उपसंचालक अनिल सावंत हांणी केलें. सरकारी कर्मचार्यां खातीर घेतिल्ल्या कोंकणी प्रशिक्षणा उपरांत पुराभिलेख खातें, कुंकळ्ळी नगरपालिका, शार आनी उदरगत खातें अश्या विंगड विंगड खात्यांनी कोंकणींतल्यान पत्रवेव्हार जावपाक लागला आनी सरकारी खात्यांक जाय तितलो आदार दिवंक हें संचालनालय तयार आसा अशें अनिल सावंत हांणी सांगलें.
म्हाविद्यालया वतीन कार्यावळीचें संयोजन आनी कार्यावळीचें सुत्रसंचालन सहाय्यक प्राध्यापक दर्शन कांदोळकार हांणी केलें. राजभाशा संचालनालया वतीन स्नेहा सबनीस आनी मानसी देवारी हांणी कार्यावळीचें सह-संयोजन सांबाळ्ळें.
