‘मुड्डासाचे फेस्त’ महोत्सवात समुदाय, संस्कृताय आनी कामगारवर्गाचे योगदान हांचेर घातलो उजवाड

सत्तरी म्हालांतल्या वाळपई हांगचे सेरेन लावदाटो सि फार्म हांगा काय दिसां पयली जाल्ले ‘मुड्डासाचे फेस्त’ हे महोत्सवात गोयची स्थानिक संस्कृताय, सामुदायीक भावबंध आनी कामगार वर्गांनी दिल्ले चिरकाल तिगलेले योगदान हाचे आदारिल्ले कार्यक्रम पोळोवंक मेळे.                             

कार्यावळीचे सुरूवातीक पारंपरिक दिवली पेटोवन कार्यावळीक सुरूवात जाली. हेरॉल्ड आंद्राद, श्रीमती खान, कारमेलिटो आंद्राद, फादर सांतान गामा, फादर फेलिक्स लोबो, श्रीमान आनी श्रीमती फिलिप डिओनिसिओ हे जोडपे आनी फेस्ताकार मारियस फर्नांडीस हे वेळार हाजीर आशिल्ले.

फेस्ताकार मारियस फर्नांडिस हाणी शाल दिवन फादर सांताना गामा हांचो भोवमान केलो तर मारियस हांचो भोवमान यजमान जाल्ले फादर सांताना गामा हाणी केलो.                      

यजमान म्हूण सांताना गामा, फादर फेलिक्स लोबो आनी वाळपय वाठारांतले लोक वाटेकार जालें. सकाळी 11 ते दोनपरा 3 हे वेळात हो कार्यक्रम जालो. फेस्ताकाराची पासय हे पयले सत्रात लोकांक फेस्ताचे सुवाते आशिल्ल्या हिरवळीचेर भोवपाक मेळे आनी सैमाचो आनंद घेवंक मेळो. तेचे उपरांत डॉ. ग्वेंडोलीन डी ऑर्नेलास हाणी  वाटेकार जाल्ले सगल्या लोकांक कट्टयांचो नाच हे नृत्याचेर आपले पाय थिरकोवपाक प्रोत्साहित केले. एक पोरणो खाद्यपदार्थ लोकांक परत कळचो म्हुण डॉ ग्वेंडोलिन दे ऑर्नेलास हाणी एक स्थानिक लुक्रेडा डिओनिसीओ हाचे सहकार्यान काजू भाकरी कार्यशाळा घेतली जाल्यार फिलिप डिओनिसिओ हाणी खतेखते कशे करप हाचेर एक कार्यशाळा घेतली. आदल्या काळातल्या जाणटे लोकांच्यो यादी ताजी करून गेल्यो.             

वाळपईचे अवर लेडी ऑफ लॉर्डेस स्कूल हे शाळेचे भुरग्यांनी फुगडी, गावठी मीठ आनी देखणी हे गोयचे पारंपरिक नाच सादर केले.                                

डिझाइनर हेरॉल्ड आंद्राद हाणी आपले कुणबी साडीयो आनी वस्त्रांचो संग्रह हे वेळार लोकांक दाखयलो जेचे प्रदर्शन फॅशन शोचे माध्यमातल्यान ग्वेंडोलीन डी ऑर्नेलास, डॉमिनिक डिसोझा आनी मार्लेन हेन्रिक्स हाणी सादरीकरण केले. “बाल्कावाच्यो गजाली” हे चर्चासत्रात सोयरे प्रोफेसर कार्मेलीटो आंद्राद आनी यजमान सांताना गामा तशेच फेलिक्स लोबो हांचे बराबर भासाभास करतना वेगवेगळे समुदाय एकठाय कशे येतले हाचेर भासाभास केली.

गोवा कला म्हाविद्यालयाचे आदले प्राचार्य विली गोएश हांच्या हस्तुकी घूमट वाद्याची प्रतिकृती आशिल्लो केक हे वेळार कापलो आनी घुमट हे वाद्य सांसारिक मळाचेर व्हरपाचो संदेश ताणी दिलो. गावचे लोकांनी हे वेळार काजू बियो, खारे नुस्ते कशे भाजपाचे हाचे प्रात्यक्षिक लाईव्ह दाखयले. फिलिप डिओनिसिओ हाणी फणस कापपाचो योग्य विधी दाखयलो आनी अर्धो पिकील्लो फणस चुलीचेर पारंपरिक पद्धतीन चुलीचेर कसो भाजपाचो हे समजावून सांगले. डॉ ऑर्नेलास आनी स्थानिक नागरिक फ्रान्सिस सुआरीस हांचे मदी जाल्ले ” बाल्कावाच्यो गजाली”चे दुसरे सत्रान कार्यक्रमाचो समारोप जालो.