ल्हान भुरग्यांच्यो सध्याच्या काळातल्यो समस्या आनी त्यो सोडोवपाच्या उपायांसयत जायत्या सामाजिक आनी त्यो सोडोवपाविशी मार्गदर्शन माधुरी राव हांच्या “विचार प्रवाह” हे पुस्तकात केल्ले आसा. समाजातल्या तरेतरेच्या सामाजिक घटकांक हे पुस्तक बऱ्यापैकी मार्गदर्शन करपी थारतले, अशे मत गोयच्यो नामनेच्यो सूत्रनिवेदिका, मुलाखतकार, नाट्यकलाकार आनी लेखिका श्रुती हजारे हाणी केले.
पणजे छायापत्रकार संघटनेचे सभाघरात आयोजित केल्ल्या पुस्तक प्रकाशन कार्यावळीत वास्को हांगच्यो लेखिका आनी समुपदेशक माधुरी वेंकट राव हांच्या “विचार प्रवाह” ह्या लेख संग्रहाचे प्रकाशन जाले. व्यासपीठाचेर हजारे हांचेसयत लेखिका जेनेट बोर्जेस, कोकण मराठी परिषदेचे कार्यवाह मेधा जाधव, जागर प्रकाशनाचे सर्वेसर्वा आनी कोकण मराठी परिषदेचे समन्वयक सुदेश आर्लेकर आनी लेखक, साहित्यिक शिवानंद साळगावकर हाजीर आशिल्ले.
हजारे हाणी माधुरी राव हांची तोखणाय करतना म्हटले की समुपदेशक म्हणून कार्यरत रावन 15 हजारांपरस चड प्रकरणां ताणी सोडयली. तांचे प्रतिबिंब ह्या लेख संग्रहात उमटलेले आसा. जेनेट बोर्जेस हाणी लेखाविशी आपल्याक किते दिसता, हाचेविशी सांगले.
मेधा जाधव हाणी माधुरी हांची तोखणाय करताना त्यो प्रेरणा दिवपी लेखिका आसा तशेच तांचे लेखनात ताकद आसा तशेच तांच्या लेखनाक बळगे मेळत रावचे, अशे जाधव हाणी म्हटले.
हजारे हाणी फुडें म्हटले की, आयज भुरग्यांचेर संस्कार जावप गरजेचे आसा. सुशिक्षित आसचे परस सुसंस्कृत आसप गरजेचे आसा आनी हेच पुस्तकात प्रभावीपणान मांडलेले आसा. माधुरी राव हाणी कायदे, संगीत, धर्म आनी संस्कृती, सामाजिक स्थिती, लग्नाचेर जावपी विनाकारण खर्च हे सारके तरेकवार विशयांचेर बरयिल्ले आसा.
एका संवेदनशील लेखकाचे गुण माधुरी ताई हाणी आपले लेखनात दाखयील्ले आसा. लग्नाचे सुवाळ्याचेर प्रिवेडिंग आनी पोस्ट वेडिंग शूट सारके प्रकार फक्त देखावो वा “शो ऑफ ” करपाक आयिल्ले अर्थ नाशिल्ले पाश्चिमात्य संस्कृतीचे प्रकार हांचेपसुन पयस रावपाची गरज आसा.
राव हांचे लिखाणाक एक नैतिकतेचो स्पर्श आसा. मनशाकडेन मनीस म्हणून पळयात, एका विशिष्ट धर्माचो म्हणून सदोश नदरेचे चश्म्यातल्यान पळोव नाकात, अशे हजारे हाणी म्हटले.
आयची पिळगी मातशी वेगळी आसा. बरे संस्कार जावपाक घरात बऱ्या विचारांची बैठक आसप गरजेचे आसा. ल्हान भुरग्यांचेर संस्कार जावपाक हे पुस्तक तांका बक्षीस म्हणून दिवचे वा दिवपाक जाय, अशे हजारे हाणी उलोवपाचे विचारांनी मत व्यक्त केले. अक्षता किनळेकार हाणी कार्यक्रमाचे सूत्रसंचालन केले.
