अखिल भारतीय कोंकणी परिशद स्थापना दिस: प्रदेश, जाती, धर्म आनी लिपीवादाचे साखळींतल्यान आमी केन्ना जातले मुक्त?:  डॉ. पूर्णानंद च्यारी

0

दोन वेगळ्या वेगळ्या पक्षांनी विभागिल्ल्या भावांक वर्सांची दुस्मानकाय विसरून भाशेच्या प्रस्नाचेर एकठांय हाडूंक शकता जाल्यार मागीर प्रदेश, जाती, धर्म आनी लिपीवादाचे साखळींतल्यान आमी केन्ना मुक्त जातले अशें डॉ. पूर्णानंद च्यारी हांणी विचारलें.

अखिल भारतीय कोंकणी परिशदेच्या स्थापना दिसा निमतान चिंचवाडच्या निगडी हांगा आयतारा, 13 जुलय दिसा आयोजीत केल्ले कार्यावळींत ते उलयताले. कोंकणी ही संघर्शांतल्यान निर्माण जाल्ली भास आनी आमी ज्या राज्यांनी आसात त्या राज्यांनी हे भाशेची आनी पुराय कोंकणी समाजाची प्रगती करपा खातीर आमी यत्न चालू दवरपाक जाय अशें तांणी फुडें स्पश्ट केलें.

साहित्य अकादेमीच्या कोंकणी सल्लागार मंडळाचे निमंत्रक मेल्विन रॉड्रिगीस हांणी सुवाळ्याचे अध्यक्ष ह्या नात्यान उलयतना सांगलें, दरेक मनीस आपले भाशे कडेन आपलीं कर्तव्यां निश्ठेन पाळीत जाल्यार भाशेची आनी परतून त्या समाजाची प्रगती कोणाकूच आडावंक मेळना.

हे कार्यावळीची जोड-आयोजक संस्था सीटी प्रायड स्कूलाची संचालक दीपली सवाई हांणी आपले संस्थेंत ही कार्यावळ घडोवन हाडपाची संद दिल्ले खातीर परिशदेचे उपकार मानले आनी कोंकणी संबंदीत खंयचोय कार्यक्रम घडोवन हाडपाक आपली संस्था सदांच आदार दितली अशें आश्वासन दिलें.

सर्गेस्त रॉकी मिरांद हांकां माधव मंजुनाथ शानभाग जिवनगौरव पुरस्कार फावो जालो. मिरांद हांच्या कुटुंबाचे गैरहाजेरींत एच.एम.पेर्नल हांणी मेल्विन रॉड्रिगीस हांचे कडल्यान हो पुरस्कार स्विकारलो.
ह्या संदर्भांत कोंकणीच्या वेगळ्या वेगळ्या मळार वावुरपी भौ. विजयानंद गायतोंडे, डॉ. वामन नायक, भौ. इजिदोर दांतास, भौ. आल्फी मोंतेरो आनी डॉ. अश्विनी कुलकर्णी हांकां मुखेल सोयऱ्यांनी कुणबी शाल आनी यादस्तीक दिवन भोवमान केलो.

दिवली पेटोवन कार्यावळीची सुरवात जाली. उक्तावण कार्यावळी उपरांत ‘भारतीय कोंकणी मनशांचो एकवट’ ह्या विशयाचेर चर्चा जाली आनी तातूंत टायटस नोरोन्हा, अनंत अग्नी आनी रेम्सन वाझ हांणी आपले विचार मांडले. गणाधीश प्रभुदेसाय हांणी ह्या भासाभासाचें संयोजन केलें. कार्यावळी वेळार परिशदेचे कार्याध्यक्ष चेतन आचार्य हांणी येवकाराचें उलोवप केलें.

संगीत कार्यावळींत गायत्री पाटील, लक्ष्मण नायक आनी ऋषभ साठे हांणी कोंकणी पदां सादर केलीं. मनोहर तामणकार हांणी संगीत साथ दिली. कार्यावळीच्या वेगळ्या वेगळ्या सत्रांचें सुत्रसंचालन गोविंद मोपकार, साईशा देसाय आनी अनीश अग्नी हांणी केलें. परिशदेची सरकार्यदर्शी स्नेहा सबनीस हांणी उपकार मानले.

LEAVE A REPLY

Please enter your comment!
Please enter your name here