अखिल भारतीय कोंकणी परिशदेच्या साबार मंडळाची बसका शेनवार, 11 ऑक्टोबर 2025 दिसा सांजेच्या 3.30 वरांचेर कोंकणी भाशा मंडळ, कोंकणी भवन, विद्यानगर, मडगांवां जातली. परिशदेची पुनर्नोंदणी करतना आयिल्ल्या अडचणींचेर हे बसकेंत निर्णय जातलो. 26वे साहित्य संमेलन 22 आनी 23 नोव्हेंबर 2025 दिसांनी केरळांतल्या एर्णाकुळमांत जातलें. साहित्य संमेलना खातीर वेंचिल्ली येवकार समिती साबार मंडळाचे बसकेंत मानून घेतले आनी संमेलनाच्या अध्यक्षाची वेंचणूक जातली. 3.30 वरांचेर जर कोरम जालो ना जाल्यार बसका, थारिल्ल्या वेळाच्या अर्द वरा उपरांत म्हणल्यार 4.00 वरांचेर सुरू जातली.
अखिल भारतीय कोंकणी परिशदेच्या वांगड्यांनी हे बसकेक हाजीर रावचे आनी पयसुल्ल्या वाठारांतल्यान बसकेक हाजीर रावपी वांगड्यांनी आपल्या राबित्याचे वेवस्थे खातीर 5 ऑक्टोबर 2025 दिसा मेरेन कळीत करचें अशी विनवणी परिशदेचे कार्याध्यक्ष चेतन आचार्य हांणी केल्या.
मजगतीं, 11 ऑक्टोबराक जावपी साबार बसके वेळार संमेलनाच्या अध्यक्षाची निवड जातली. ते खातीर, परिशदे कडेन जोडिल्ल्या संस्थांनी कोंकणी ज्येश्ठ साहित्यिकांचें ज्येश्ठत्व आनी श्रेश्ठत्व मतींत दवरून अध्यक्ष पदाक सोबशीं नांवां काडून तीं साबार बसकेक येतना हाडचीं वा 5 ऑक्टोबर 2025 दिसा मेरेन परिशदेक पत्र बरोवन कळोवचीं अशी विनवणी परिशदेची सरकार्यदर्शी स्नेहा सबनीस हांणी केल्या.
