गोंय सरकाराच्या राजभाशा संचालनालयान आयोजीत केल्ल्या राजभाशेच्या प्रशिक्षणाचे चवथे बॅचीक 8 सप्टेंबराच्यान सुरवात जाल्या. ह्या प्रशिक्षणाच्या उक्तावण सुवाळ्याक पशू संवर्धन आनी पशू वैजकी सेवा संचालनालयाची संचालक डॉ. वीणा कुमार मुखेल सोयरी म्हणून हजर आशिल्ली. आपले मायभाशेचें म्हत्व दरेकल्यान समजून घेवचें, ताचो अभिमान बाळगुचो आनी प्रशासनांत राजभाशेचो चडांत चड वापर करचो अशें डॉ. वीणा कुमार हांणी सांगलें.
सप्टेंबर म्हयन्यांतलें पयलें प्रशिक्षण 8 ते 11 सप्टेंबर 2025 ह्या दिसांनी पणजेच्या ईडीसींत आयोजीत केलां. ह्या प्रशिक्षणाच्या उक्तावण सुवाळ्याक राजभाशा संचालक मेघनाथ परब, उपसंचालक आनी प्रशिक्षणाचे मुख्य संयोजक अनिल सावंत हजर आशिल्ले. ह्या प्रशिक्षणांत 29 सरकारी कर्मचारी वांटेकार जाल्यात.
प्रशासनांत राजभाशा कोंकणीचो चडांत चड वापर जावचो म्हणून राजभाशा संचालनालयान सरकारी कर्मचार्यां खातीर राजभाशेचें प्रशिक्षण आयोजीत केलां. ह्या प्रशिक्षणाच्या तीन बॅचीं खातीर ऑगस्ट म्हयन्यांत प्रशिक्षणां जाल्यांत. सप्टेंबर म्हयन्यांत 5 प्रशिक्षणां पणजे आनी मडगांवां जातलीं. दरेका बॅचींत चडांत चड 30 सरकारी कर्मचार्यांचो आसपाव केला.
राजभाशा अधिनेमाची माहिती तशेंच कोंकणीचें मुळावें व्याकरण समजावन, प्रशासनांत लागपी पत्रवेव्हार म्हणल्यार पत्रां, आदेश, अधिसुचोवण्यो, जाणपत्र, शुद्धीपत्रक आनी हेर तशेंच टिपण लेखन हाचेर प्रशिक्षणांत भर दितात. तेच वांगडा, प्रशासनांतले विंगड विंगड हुद्दे, सरकारी खात्यांचीं नांवां, प्रशासकी उतरावळ हांची वळख सरकारी कर्मचार्यांक करून दितात.
मजगतीं, 9 ते 12 सप्टेंबर 2025 ह्या दिसांनी मडगांवच्या जिल्लोधिकारी कार्यालयांत जावपी प्रशिक्षणाची सुवात बदलून जिल्लो वाचनालय, नावेली, साश्ट केल्या. सगळ्या प्रशिक्षणार्थ्यांनी हाची नोंद घेवची, अशें आयोजकांनी कळीत केलां.
