“कोंकणी वरवीं गोंयकारांची राजकीय आनी संविधानीक अस्मिताय सुगूर उरल्या. ती मुखार तिगोवन दवरपाची जबाबदारी आयच्या कोंकणी विद्यार्थ्याच्या भुजांचेर आसा.” अशें वक्तव्य गोंय विधापिठाच्या शणै गोंयबाब भाशा आनी साहित्य महाशाळेचे उपाधिश्ठाते आनी कोंकणी अध्ययन शाखेचे प्राध्यापक डॉ. हनुमंत चोपडेकार हांणी केलें. मुखार तांणी कोंकणी भास, तिचो सघर्श आनी ह्या संघर्शांतल्यान निर्माण जाल्लो कोंकणी संवसार हांचेर भाश्य करतनाच विद्यार्थ्यांनी कोंकणी कडेन वळून तिचो विकास करपाचे नदरेंतल्यान वावर करपाक जाय अशें आवाहन केलें.
सरकारी कला विज्ञान आनी वाणिज्य महाविद्यालय सांखळेच्या कोंकणी विभागान उच्च माध्यमीक विद्यालयाचे विद्यार्थी आनी शिक्षकां खातीर घडोवन हाडिल्ल्या कोंकणी चळवळ आनी कोंकणीचें म्हत्व ह्या विशया वयल्या व्याख्यानांत ते मार्गदर्शक ह्या नात्यान उलयताले.
हें व्याख्यान आनी कोंकणी वक्तृत्व सर्त 16 सप्टेंबर 2025 ह्या दिसा महाविद्यालयाच्या परिसंवाद कक्षांत जाली. व्याख्यानाक उच्च माध्यमीक विद्यालयाचे शिक्षक, विद्यार्थी आनी महाविद्यालयाच्या कोंकणी विभागाचे विद्यार्थी आनी प्राध्यापक हाजीर आशिल्ले.
कार्यावळीच्या उकतावण सुवाळ्याक महाविद्यालयाचे प्राचार्य प्रो. डॉ. नामदेव गांवस हांणी येवकाराचें उलोवप केलें. तांणी आपल्या उलोवपांत “आमी आमचे भाशेक मान दिवपाक जाय आनी आवयभाशेंतल्यान शिक्षण घेवन तिचो विकास करपाचे नदरेंतल्यान कार्य करपाक जाय.” अशे विचार व्यक्त केले.
कार्यावळीचें प्रास्तावीक करतना प्रा. सुशांत नायक हांणी सर्तीचें आनी व्याख्यानांचें म्हत्व पटोवन दितना वेगवेगळ्या सर्तीं वरवीं भुरग्यांचे कलेक पोसवण दिवप आनी तांचे भितर जबाबदारेन काम करपाची वृत्ती निर्माण करप होच हेतू आसता हें स्पश्ट करून दिलें. उक्तावण सुवाळ्याचें सुत्रसंचालन वेलेन्सिया फेर्नाडीस, मानेस्तांची वळख हृशभ देसाय, श्रृती नायक आनी ज्योती थोंडूर हांणी केली जाल्यार उपकाराचें उलोवप कोंकणी विभागाच्यो प्रभारी प्रा. उर्वशी नायक हांणी केलें.
उपरांत उच्च माध्यमीक विद्यालयाच्या विद्यार्थ्यां खातीर कोंकणी भास आनी तिची अस्मिताय ह्या विशयाचेर कोंकणी वक्तृत्व सर्त जाली. हे सर्तीक सत्तरी आनी दिवचल म्हालंतल्या वेगवेगळ्या उच्चमाध्यमीक विद्यालयांतल्या विद्यार्थ्यांनी वांटो घेतिल्लो.
सर्तीचें पयलें इनाम सरकारी उच्च माध्यमीक विद्यालय, सांखळीचो विद्यार्थी सार्थक परब हाका फाव जालें जाल्यार कृतिका परब, श्री शांतादुर्गा उच्च माध्यमीक विद्यालय, दिवचल आनी आयुषी उसपकर, भुमिका उच्च माध्यमीक विद्यालय, पर्यें हांकां अनुक्रमान दुसरें आनी तिसरें इनाम फाव जालें. सर्तीचीं उत्तेजनार्थ पयलें आनी दुसरें इनामां डेनिका डिसोझा, सरकारी उच्च माध्यमीक विद्यालय, सांखळी आनी साची गांवस, भुमिका उच्च माध्यमीक विद्यालय, पर्यें हांकां फाव जालीं.
सर्तीचे परिक्षक म्हूण नामनेचे साहित्यीक आनी उद्देजक श्री. अजय बुवा आनी श्री सरस्वती उच्च माध्यमीक विद्यालयाच्या इंग्लीश विभागाच्यो शिक्षिका सौ. उर्वशी कवळेकार हांणी कार्यभार सांबाळ्ळो. सर्तींत वांटेकार जाल्ल्या आनी इनामां जोडिल्ल्या विद्यार्थ्यांक परिक्षकांचे हस्तुकीं इनामां आनी प्रमाणपत्रां भेटयलीं.
कार्यावळीचें संयोजन प्रा. सुशांत नायक हाणी केलें. सर्तीचें सुत्रसंचालन कोंकणी विभागाच्यो प्रभारी प्रा. उर्वशी नायक हांणी केलें जाल्यार प्रा. बालकृष्ण चोपडेकार हांणी सगल्यांचे उपकार आठयले.
