गोयात लघुपटाचे माध्यमातल्यान तरेतरेच्या सामाजिक विशयांचेर भाश्य करपाची व्हड परंपरा आसा. तेच अनुषंगान फुडें वयतना सहित स्टुडिओन “घर” हे आपले येवपी लघुपटात एका म्हत्वाचे समाजिक विशयाक सामके कलात्मक दृष्टीन हात घातला. कोकणी सिनेमांनी अशे विविधतायेचे प्रयोग आयज मेरेन जाल्ले आसात. ही परंपरा सहित स्टुडिओ राखतलो असो आमका विश्वास आसा, अशे जेश्ठ साहित्यिक आनी कोकणीचे लढवय्ये नेते उदय भेंब्रे हाणी निकतेच उक्तायला.
गोयचे कोकणी लेखक आणि सहित स्टुडिओचे मुखेली किशोर अर्जुन हाणी बरंयल्ली पटकथा आनी दिग्दर्शन आशिल्लो “घर” हे लघुपटाचो मुहूर्त मडगावात जालो. भेंब्रे हांचे हस्तुकी मुहूर्ताचो क्लॅप जातकी ते उलयताले. हे वेळार रवींद्र केळेकार विद्यालयाचे मुख्याध्यापक आनी नामनेचे कोंकणी साहित्यिक प्रा. अनंत अग्नी, गोवा मनोरंजन सोसायटीचे आदले वांगडी विशाल पै काकोडे आनी हाय फ्लाय ट्रॅव्हल्स सर्वेसर्वा जितेंद्र प्रभूदेसाय हाजीर आशिल्ले.
हे वेळार साहित्यिक आनी नट अनंत अग्नी हाणी बी आपले मनोगत उक्तायले. गेले काय वर्सांनी कोकणीत सामके म्हत्वाचे अशे सामाजिक विशयांचेर बऱ्यात बरे लघुपट आनी माहितीपट हांची निर्मिती सहित स्टुडिओ करत आसा. लघुपट, म्हायतीपट, सिनेमा आनी साहित्य हांचे माध्यमातल्यान कोकणी भास संसाराचे सगल्या भागात व्हरपाक “सहित” सदाच प्रयत्नशील राविल्ले आसा. तांचे ह्या यत्नाक आयज मेरेन बेस बरो प्रतिसाद मेळील्लो आसा. तसोच प्रतिसाद हेवूय लघुपटाक मेळचो, अशी सदिच्छा अग्नी हाणी उक्तायली.
विशाल पै काकोडे हाणी आपले मत व्यक्त करतना, गोयातल्या लघुपट आनी सिनेमांक राज्य सरकारान योग्य ते सहकार्य दिवप गरजेचे आशिल्ल्याचे सांगले. तेच बराबर थळाव्या सिनेमांक ऊर्बेभरीत अवस्था मेळपाक लागून सरकारचे सिनेमाक लागून आशिल्ल्या अनुदान येवजणेत सुसूत्रता हाडप आनी थळावे कलाकारांक सगले बाजूनी प्रोत्साहन दिवप गरजेचे आसा, अशेय बी ताणी नमूद केले. जितेंद्र प्रभूदेसाय हाणी उलयतना ‘घर’ लघुपटाच्या पंगडाक परबी दिली.
सहित स्टुडिओचो पाचवो लघुपट प्रकल्प जावन आसा. हे कोकणी भाशेत आशिल्ले लघुपटाचे चित्रीकरण प्रामुख्यान दक्षिण गोयात सुरू जाल्ले आसा. झीरो माईल्सस्टोन फिल्म हे लघुपटाचे सादरकर्ते जावन आसा. कथा संकल्पना माधुरी अशीरगडे हांची आसा तर कथा, पटकथा, संवाद आनी दिग्दर्शन आनी प्रकाशक किशोर अर्जुन हांचे आसा. रवींद्र हांचे छायाचित्रणात योगदान दितले. लघुपटात रावी किशोर, गौरी कामत, शार्दुल बोरकार, विकास कासलीवाल, समृद्धी पानसे, गंधाली सतिश, सई बोरकार, डॉ अपूर्वा, अभय जोशी, दिग्विजय वासकर आनी मार्क फर्नांडिस हांच्यो भूमिका आसात. सुनंदा काळुसकार ह्यो कार्यकारी निर्मात्यो आसात तर किशोर अर्जुन आनी रश्मी नर्से हांची निर्मिती आसा.
✒️
सनतकुमार फडते
