अखिल भारतीय कोंकणी परिशदेचो ह्या वर्साचो माधव मंजुनाथ शानभाग जिवन गौरव पुरस्कार भौ. पुंडलीक नायक हांकां फावो जाला. अखिल भारतीय कोंकणी परिशद आपल्या स्थापना दिसाच्या सुवाळ्याक माधव मंजुनाथ शानभाग हांच्या नांवान पुराय भारतभर कोंकणीचो वावर केल्ल्याक जिवन गौरव पुरस्कार भेटयता.
हाचे पयलीं हो पुरस्कार भौ. उदयबाब भेंब्रे, भौ. सुरेशबाब बोरकार, स. रॉक मिरांद हांकां फावो जाला. साहित्यकार भौ. पुंडलीकबाब नायक हांचें कोंकणी चळवळी खातीरचें योगदान पुराय भारतभर आसा, तांणी केल्ल्या संघठन वावरा खातीर हो पुरस्कार तांकां भेटयतात अशें अखिल भारतीय कोंकणी परिशदेची सरकार्यदर्शी स्नेहा सबनीस हांणी सांगलें. हो निर्णय पुरस्कारा खातीर घडयल्ले खासा समितीन घेतला आनी हे समितीर भौ. गोकुळदास प्रभू, प्रो. किरण बुडकुले आनी भौ. मेल्वीन रोड्रीगस आशिल्ले अशेंय तांणी सांगलें.
अखिल भारतीय कोंकणी परिशद ह्या वर्सा आपलो 88वो स्थापना दीस कर्नाटकांतल्या सागर वाठारांत मनयता. ह्या सुवाळ्याक मुखेल सोयरे म्हण केंद्रीय साहित्य अकादेमी पुरस्कार फावो जाल्ले साहित्यकार भौ. शरतचंद्र शेणय हाजीर आसतले आनी मंगळूरचे कवी भौ. टायटस नोरोन्हा मानाचे सोयरे म्हण हाजीर आसतले.
हे कार्यावळीक गोंयच्यान वचपाक परिशदेन बसीची वेवस्था केल्या. ते खातीर समाज माध्यमांचेर उलो मारिल्लो, तातूंत 70 जाणांनी 2000 रुपया प्रवास खर्च दिवन आपली नांव नोंदणी केल्या. प्रतिनिधींची सागर रावपाची आनी जेवणाची वेवस्था परिशदेन केल्या.
अखिल भारतीय कोंकणी परिशद हालींसाराक जंय जंय कोंकणी लोक शिंपडला थंय थंय वचून कार्यावळी करून तांकां मुखेल प्रवाहांत हाडपाचो यत्न करता. हो सुवाळो घडोवन हाडूंक कॅथोलीक कोंकणी समाज, जीएसबी समाज, दैवज्ञ ब्राह्मण समाज, चोरोडी कोंकणी आचार समाज ह्या संघटणांनी आदार दिला. ह्या सुवाळ्याक बरो प्रतिसाद मेळटलो आनी 500 वयर लोकांची उपस्थिती अपेक्षीत आसा अशें अखिल भारतीय कोंकणी परिशदेची सरकार्यदर्शी स्नेहा सबनीस हांणी परिशदे वतीन उजवाडायिल्ल्या प्रसिद्धी पत्रकांत म्हणलां.
