आयतरा एकांकी संग्रहाचे प्रकाशन,  नामनेचे सिनेनट नितीन कोलवेकार हांचे पुस्तक, गझलकार साहित्य अभ्यासक दिग्गज वक्त्यांची आसतली हजेरी           

फोंडे हांगा गोयचे नामनेचे सिनेनट, नाट्यकलाकार आनी दिग्दर्शक नितीन शाम कोलवेकर हाणी बरयिल्ल्या “आय लव्ह यू ” हे एकांकी पुस्तकाचो प्रकाशनाचो कार्यक्रम २९ सप्टेंबर हे दिसा राजीव गांधी कलामंदिर हांगा जातलो.

हे कार्यक्रमाक गझलकार, साहित्यिक आनी इन्स्टिट्युट मिनेझिस ब्रागांझा संस्था आनी मराठी अकादमी संस्थेचे मानेस्त पदाधिकारी हाजीर रावपाचे आसल्यान साहित्यिक दर्जो हाचो विचार करून हो कार्यक्रम बरोच रंगतलो, अशी शक्यताय फोंडेचे साहित्यिक वर्तुळात सध्या जावपाक लागल्या.

हो कार्यक्रम गोवा मराठी अकादमी संस्थेचे फोंडे प्रभागाचे वतीन आयोजित केल्लो आसा. फोंडे प्रभागाचे वतीन जो उपक्रम चलयिल्लो वयता, ते ‘ साहित्य अभिवाचन संवाद शृंखला ‘ हे उपक्रमाचो १० वो भाग संवाद शृंखला माळेचे १० वे पुष्प म्हूण ह्या पुस्तकाचे प्रकाशन आनी अभीवाचन जातले. अभिवाचना बराबर कोलवेकार हांचे पुस्तकाचेर चर्चासत्रय बी जातले.

हे कार्यावळीक मुखेल सोयरे म्हूण गोवा मराठी अकादमी, पणजी हे संस्थेचे अध्यक्ष प्राचार्य अनिल सामंत हे हाजीर आसतले. नामनेचे कवी, गझलकार आनी साहित्यिक दत्तप्रसाद जोग हे ह्या एकांकी पुस्तकाचेर हे वेळार भाश्य करतले. कार्यावळीचे सन्माननीय वा आदराचे सोयारे म्हूण इन्स्टिट्युट मिनेझीस ब्रागांझा, पणजे हे संस्थेचे अध्यक्ष दशरथ परब आनी प्रकाशक हे नात्यान संचीत प्रकाशन, पर्वरी हे संस्थेचे संदीप मणेरीकार मानेस्तांचे माणावळीत व्यासपीठाचेर हाजीर आसतले.

कार्यावळीचे सुत्रसंचालन सौ. उर्वशी मनेष कवळेकार हांचे आसतले. राजीव गांधी कलामंदिर हाचे आवारात परिषद सभागृहात सांजे ४.३० वरांचेर हो कार्यक्रम जातलो. गोयचे साहित्य आनी नाटयमोगी रसिकांनी हाजीर रावचे अशे आवाहन गोवा मराठी अकादमीचे फोंडा प्रभागाचे अध्यक्ष निलेश पुंडलिक नायक आनी प्रा. वरदा गाड केरकार (सचिव, फोंडा प्रभाग, गोवा मराठी अकादमी ) हाणी केल्ले आसा.

लेखकाची ल्हानशी वळख

गोयात आनी गोया भायर नाटय अभिनेतो, नाटय दिग्दर्शक आनी सुत्रसंचालक म्हूण वळख निर्माण केल्ले कलाकार नितीन शाम कोलवेकार हे एकांकी पुस्तकाचे माध्यमातल्यान नाटयलेखनाचे क्षेत्रात पाय दवरतात. नाट्य कलाकार, दिग्दर्शक, निवेदक, रेडियो आनी टिव्ही आर्टिस्ट, फिल्म कलाकार, डबिंग आर्टिस्ट, वार्तापत्र वाचक, व्हॉईस ओव्हर अशा कलेचे वेगवेगळ्या क्षेत्रात काम करतना ताणी शंभरापरस चड नाटकांचे प्रयोग गोयांबराबर कर्नाटक, महाराष्ट्र, राजस्थान सारकिल्ले हेर राज्यांनी सादर केल्ले आसा. फोंडे वाठारात विविध गावांनी जावपी उत्सवी नाटकांनी दिग्दर्शक म्हूण ७० परस चड नाटकांनी ताणी नाटक उबे करपाक योगदान दिला. नाटयछटा, एकलनाट्य, एकांकी, दीर्घांकी, मुक्तनाट्य, महानाट्य, बालनाट्य वा भुरग्यांची नाटकुली, विनोदी फार्सीकल नाटकां, ऐतिहासिक नाटक, सामाजिक नाटक, संगीत नाटक अशे नाटकाचे तरेतरेचे प्रकार ताणी आयजमेरेन हाताळील्ले आसात. एक आस अंतरीची, रक्तयुग, ओ मारिया सारके कोकणी – मराठी सिनेमा, एनिमी, पाद्रीक नाव ना? सारके आंतरराष्ट्रिय स्तराचेर गाजिल्ल्या कोकणी फिल्मांनी ताणी काम केला तशेच तांच्यो ल्हान व्हड भुमिका आशिल्ले हिंदी सिनेमा, वेब सीरिज, शॉर्ट फिल्मां वा लघुपट आनी डॉक्युमेंटरी फिल्मां प्रदर्शित जाल्ली आसात. स डॉक्युमेंटरी फिल्मांचे लेखन ताणी केल्ले आसा. हंस, फोंडा हांची निर्मिती आशिल्ल्या “कोहम” नाटकातल्या “ययाती”.हे तांचे भूमिकेक महाराष्ट्र राज्य नाट्यसर्तीचे निमाणे फेरीत रूप्या पदक फावो जाल्ले आसा. हंस संस्थेच्याच “जैत आता पैस ना” हे नाटकातले “कॅप्टन” हे ताणी साकारिल्ले भूमिकेक रंगभूमी, उडुपी, कर्नाटका हांगा अभिनयाचे बक्षीस मेळील्ले आसा. नाटकां आनी सिनेमांनी भरीव योगदान दिवन आता ते साहित्याचे मळार मार्गक्रमण करपाक सज्ज जाल्यात.     

🖋️
(सनतकुमार फडते)