संवेदन केंद्र ही संस्था गेली तीन वर्सा, गोयात रावपी कातकरी समाजातल्या भुरग्यांचे उदरगतीक लागून सातत्यान मातसुद्दा विसव घेय नासतना आशिल्ली गोयाक पळोवंक मेळटा. कातकरी समाजाच्या भुरग्यांचो शिक्षणीक आनी समाजिक मळाचेर विकास करून तांका समाजाचे मुखेल प्रवाहात हाडपाचे प्रयत्नांचो एक भाग म्हूण संवेदन केंद्राचे वतीन येता ते मे म्हयन्यात कुडणे हांगा एक व्यक्तिमत्त्व विकास शिबीर आयोजित केल्ले आसा.
हे निवासी शिबिराचे आयोजनाक लागून समाजातल्या घटक, सामाजिक संस्था, सामाजिक बांधिलकी आशिल्ले उद्देग समूह, सर्वसामान्य नागरिक आनी हेर घटकांनी अर्थिक मजत करची, अशे आवाहन संवेदन केंद्र आनी केंद्राचे वांगडी हाणी केल्ले आसा.
हे ७ दिसांचे निवासी व्यक्तिमत्त्व विकास शिबीर सरकारी प्राथमिक विद्यालय, कुडणे हांगा १ ते ७ मे २०२५ हे काळात जातले. निरंकाल, बेतोडा हे फोंडे वाठारातली मेळून ३५ कातकरी समाजाचे विद्यार्थी आनी हेर समुदायातल्या २० विद्यार्थ्यांचो हे शिबिरात आस्पाव आसतलो. केंद्राचे १० स्वयंसेवक हातभार लावपाक सहभागी जातले.
शिबिराचो उद्देश्य किते?
कातकरी समाजाचे भुरग्यांक हेर समुदायातल्या भुरग्यांसयत वावुरपाची संद मेळची तशेच व्यक्तिमत्त्वाचो विकास करपाक, आत्मविश्वास निर्माण करपाक आनी शिक्षणीक अणभव वाडवपाक व्यासपीठ दिवचे हो उद्देश हे शिबीर दवरपाचे फाटल्यान आसा. हे शिबिरात जावपी तरेतरेचे सत्रांनी शालेय स्तरावेल्या विद्यार्थ्यांक लागून नाट्य प्रशिक्षण आनी व्यक्तिमत्त्व विकास कार्यशाळा हांचो आस्पाव आसा तशेच प्राथमिक स्तरावयल्या विद्यार्थ्यांक लागून ‘ खेळीमेळीचे वातावरणातल्यान शिक्षण घेवप ‘ हे संकल्पनेचेर आदारील्ले सत्रांचो आस्पाव आसतलो.
हे शिबिराक लागून शक्य आसा ते माध्यमातल्यान अर्थिक वा हेर तरेन मजत करपाचे आवाहन संवेदन केंद्राच्यो प्रकल्प संचालक नमन सावंत धावस्कर हाणी केल्ले आसा. हे पाच मुद्दे सकयल दिल्ले भशेन आसात:
1. किराणा दिवप: संवेदन केंद्राचे वतीन किराणाचे सामानाची वळेरी जाहीर केल्ली आसा. तातूंत हातभार लावन वा किराणाचे सामान दिवन मजत करू येता.
2. जेवण दिवप : शिबिरात सहभागी भुरग्यांक दनपारचे, रातचे जेवण आनी सकाळचो नाश्ता दिवपाक मजत करू येता.
3. येरादारी वा दळणवळणाक वाहनां दिवप: भुरग्यांक निरंकाल आनी पेडणे हांगच्यान कुडणे वाहनांचे मजतीन हाडप आनी परत पावोवप हे खातीर वाहनांची वेवस्था करप वा ते करपाक अर्थिक मजत करू येता.
4. मानधन : शिबिरात येवन भुरग्यांक शिकोवपी १४ प्रशिक्षकांक एकूण २८ हजार रूपये मानधन दिवापाचे आसा. हातुंत इत्सा आशिल्ले नागरिक मजत करूंक शकतात.
5. अर्थिक मजत (हेर कारणांक लागून): अशे तरेचे हेर खर्चाकलागून रोखी, धनादेश वा चेक आनी एनईएफटीचे माध्यमातल्यान देणगी दिवन अर्थिक मजत करू येता. चड म्हायतीक लागून अध्यक्ष माधवी राणे (8788201605), नमन सावंत कातकरी प्रकल्प संचालक (9765031800), दशरथ मोरजकार, प्रकल्प समन्वयक (8999208438) आनी शिबीर निमंत्रक अंगारीका सावंत (7507324197) हांचेकडेन संपर्क सादू येता, अशे केंद्राकडल्यान कळीत केल्ले वयता.
✒️
सनतकुमार फडते
