कोंकणी कार्यकर्ता अँथनी वाझ हांकां 2024 वर्साचो मोहिनी स्मृती पुरस्कार जाहीर जाला. ज्येश्ठ साहित्यीक आनी सुटके झुजारी स्मृतीशेश नागेश करमली हांचे घरकान्नेच्या उगडासान हो पुरस्कार दवरला. कोंकणी भास, साहित्य, चळवळ, शिक्षण अश्या साबार मळांचेर निश्ठेन वावर केल्ल्या कोंकणी फुडार्यांक हो पुरस्कार भेटयतात.
अँथनी वाझ कोंकणी नाट्यक्षेत्रांत मळार वावर केला. गोंय तशेंच मुंबयंत तांणी 15 परस चड तियात्रांनी काम केलां. तशेंच कोंकणी नाटकांनी आनी चलचित्रांनी अभिनय केलां. कोंकणी राजभास जावची म्हणून जाल्ले 555 दिसांचे राजभास चळवळींत तांणी सक्रीय वांटो घेतला. साहित्याच्या मळार तांणी ‘सुख आनी दुख’ आनी ‘कीड’ हीं दोन तियात्रां बरयल्यांत तशेंच ‘राखणो’ ही कादंबरी रचल्या. तांकां एकांकिका, कविता बरोवपाचीय आवड आसा.
लोककलेचो प्रसार करपा खातीर तांणी नीज कला केंद्र संस्था स्थापन करून गोंयभर कोंकणी लोककलेच्यो कार्यावळी घडोवन हाडल्यो. कोंकणी भाशा मंडळ, कला अकादमी गोवा ह्या संस्थां खातीर तांणी वावर केला. तांकां लाभिल्ल्या पुरस्कारा मदीं कोंकणी भाशा मंडळाचो पुरस्कार, कोंकणी भाशा सेवा सन्मानाचो आसपाव आसा.
नागेश करमली हांच्या घरच्यांनी दवरिल्लो हो मोहिनी स्मृती पुरस्कार भेटोवपाची कार्यावळ बेगिनूच घडोवन हाडटले, अशें आयोजक संजना पब्लिकेशन्साचे दिनेश मणेरकार हांणी सांगला.
