डी.डी. दलाल मेमोरियल आर्ट एज्युकेशन सेंटर आनी बांबोळकार आर्ट गॅलरीचो आठवो स्थापना दीस 30 मे 2024 दिसा राजदीप गॅलरी, फोंडें, गोंय हांगा सकाळीं 9.30 वरांचेर मनयतले. नामनेचो कलाकार आनी नाट्य अभिनेतो श्रीधर कामत बांबोळकार हांणी 2016 वर्सा दूरदर्शी कलाकार दीनानाथ दलाल हाच्या सन्मानार्थ हें केंद्र स्थापन केल्लें.
स्थापना दिसा निमतान कला प्रदर्शनाचेंय आयोजन केलां. हे कार्यावळीक, नामनेचे कलाकार आनी प्रादेशीक केंद्र ललीत कला अकादमीचे धारवाड संयोजक श्री. श्रीनिवास शास्त्री मुखेल सोयरे म्हणून हाजीर आसतले. समाजीक वावुरपी आनी श्री माधवराव ढवलीकार ट्रस्टाचे ट्रस्टी श्री. मिथिल ढवळीकार मानाचे सोयरे म्हणून हाजीर आसतले. गोंयची ज्येश्ठ कलाकार श्रीमती निरुपा नायक हांकां ह्यो कार्यावळीक खासा आमंत्रीत म्हणून हाजीर आसतली. डॉ. तन्वी बांबोळकार सुत्रसंचालन करतली.
बांबोळकार आर्ट गॅलरी सुरू जाले उपरांत सावन दृश्य कले सयत हेर साबार कला क्षेत्रां खातीर विंगड विंगड कार्यावळी ह्या केंद्रांत आयोजीत जाल्यात अशें बांबोळकार आर्ट गॅलरीचे अध्यक्ष श्रीधर बांबोळकार हांणी सांगलें. विंगड विंगड सांस्कृतीक कार्यावळींचें एक समृद्ध केंद्र जावन ताची उदरगत जायत आसा. कविता वाचन ते नाट्य सादरीकरण तशेंच कला अभिव्यक्तीचें एक समृद्ध वातावरण दिवपी ही संस्था आसा. स्थापना दिसाचे हे कार्यावळीक मोटे संख्येन हाजीर रावचें अशें आवाहन श्रीधर बांबोळकार हांणी केलां.
बांबोळकार हांच्या प्रेरणादायी फुडारपणा खाला गॅलरींत समाजाचो सांस्कृतीक दृश्टीकोण वाडोवपी वेग-वेगळ्यो कार्यावळी घडोवन हाडल्यात. सुदिन ढवळीकर, दत्ता नायक, गिरीधर रायकर, ॲड. मनोज बांदोडकर, गिरीश केळेकार, संदिप निघळे आनी हेर मानेस्तांनी गॅलरीच्या यत्नांक उदार मनान आदार दिला.
