आपलें मत व्यक्त करूंक भाशा हें म्हत्वाचें साधन. अशी खंयचीच गजाल ना जंय आमी भाशेचो वापर करिनात. दिसपट्ट्या जिवितांत भाशा वापरतनाच, आपली भावना लिखीत स्वरुपांत व्यक्त करूंक आमकां तीच भाशा लिपयेच्या माध्यमांतल्यान मांडची पडटा. संगणकाचें आगमन जाले उपरांत इंग्लीश ही भाशा कम्प्युटराचेर बरोवंक म्हणल्यार टायप करप शक्य जालें. पूण भारतीय भाशांचे बाबतींत टायपिंग आडखळ निर्माण जावंक लागली.
तंत्रगिन्यानाच्या मळार उदरगत जाली तशी देवनागरी लिपी वापरपी भारतांतल्यो भाशा देखीक कोंकणी, मराठी, हिंदी, संस्कृत, नेपाली अश्या भाशां सयत दक्षीण आशियाई वाठारांतल्यो भाशा टायप करूंक मेळची म्हणून जायते सॉफ्टवॅर येवंक लागले. देवनागरी टंकलेखनाची गरज आनी म्हत्व मतींत घेवन हे सॉफ्टवॅर तयार जाले. देवनागरी टंकलेखनाची गरज आनी म्हत्व तशें वेगळावं नजं. कोंकणी आनी हेर भाशांची देख घेवन देवनागरी टंकलेखनाची गरज आनी म्हत्व समजून घेवया.
कोंकणी भाशेचे बाबतींत देवनागरी लिपी बरोवंक वापरतात. हाचे भायर, कन्नड, रोमी (लॅटीन) ह्यो लिपयो वापरतात. पूण प्रशासनांत, शिक्षणांत देवनागरी हीच लिपी कोंकणी भाशा बरोवंक वापरतात. इंग्लीश हे भाशेचो वापर भारतांत मुखेलपणान जाता. सरकारी कामकाजा सयत साहित्यांत आनी दर दिसाच्या उलोवपांत इंग्लीश भाशेचो वापर जाता. ताका लागून, इंग्लीश भाशा ही एक भारतीय भाशा थारल्या. पूण भारतांत शेंकड्यांनी प्रादेशीक भाशा उलयतात आनी वापरतात. देवनागरी लिपी, कन्नड लिपी, तमीळ लिपी, बंगाली लिपी सारकेल्ल्यो लिपयो वापरून कितल्योश्योच भाशा बरयतात. प्रादेशीक भाशा तशेंच आपले आवय भाशेंत आपूण बरे तरेन विचार मांडूंक शकतां हाची जाणविकाय जाल्ल्यान ह्या प्रादेशीक भाशांक खूब म्हत्व आसा आनी येवपाक लागलां.
भाशेचो वापर फकत आपलें मत वा आपली भावना व्यक्त करुंकूच वापरतात अशें न्हय. भाशा संवर्धन आनी सांस्कृतीक दायजाचो सांबाळ करपाकूय तंत्रगिन्यान आनी टंकलेखनाची म्हत्वाची भुमिका आसा. साहित्याच्या माध्यमांतल्यान समाजांतले प्रस्न, समस्या मांडपाक भाशेचो वापर जाता. तशेंच इतिहासीक म्हत्व आशिल्ल्या घडणुकांचें दस्तावेजीकरण करूंक लिखीत साहित्य बरोवपाची गरज उप्रासता. अशा वेळार देवनागरी टंकलेखनाची गरज पडटा. आपले विचार बरोवन काडून मागीर टायप करपांत खूब वेळ वाया वता. ते परस, आपल्याक जें दिसता तें तेन्नाच्या तेन्ना टायप करूंक आनी संपादीत करूंक मेळ्ळ्यार, काम सोंपें जाता.
कोंकणी, बोडो, संस्कृत, नेपाली हे सारकेल्ल्या देवनागरी लिपी वापरपी भाशांचो उपेग हिंदी, मराठी अश्या हेर भाशांचे तुळेंत खूब कमी प्रमाणांत जाता. कारण, ह्यो भाशा वापरपी लोकसंख्या कमी आसा. पूण प्रत्येक भाशा म्हत्वाची आनी एकाद्री भाशा व्हड वा ल्हान आसना हाची समज भाशा अभ्यासकांक आनी तंत्रगिन्यानाच्या मळार वावुरप्यांक आसा. म्हणुनूच दरेक भाशा वापरपी लोकांक ते भाशेंतल्यान लिखीत साहित्य निर्माण करूंक मेळचें हे खातीर देवनागरी वा हेर लिपयांनी टंकलेखनाची सुविधा आसपाची गरज निर्माण जाता. हें साहित्य फकत काल्पनीक साहित्य न्हय तर गिन्यानाचें दिवप-घेवप करपी साहित्य वा संकेतथळां खातीर मजकूर तयार करपी साहित्य आसूं येता.
आमच्या जिवितांत मोबायल आयलो तेन्ना तो समाजांतल्या अमक्याच लोकां मेरेन सिमीत आशिल्लो. मोबायलाचेर सुरवातेक इंग्लीश धरून जगांतल्यो कांय मुखेल भाशाच मेळटाल्यो. पूण ल्हव ल्हव करून मोबायल हो आमचे जिणेंतलो अविभाज्य घटक जालो आनी ताका लागून प्रादेशीक भाशांक म्हत्व येवपाक लागलें. आयज मोबायलाचेर कोंकणी धरून कितल्योश्योच भारतीय भाशा उपलब्ध आसात. कम्प्युटराचे बाबतींत अशेंच घडलें. दरेक व्यक्ती इंग्लीश भाशा समजूंक पावतलीच अशें ना. कितलींशींच जाणां संवाद सादूंक वा आपले विचार योग्य तरेन मांडूंक आपले आवय भाशेचो वापर करतात. ग्रामीण वाठारांत रावपी लोकांक वा सामान्यपणान दरेका नागरिकाक आपले भाशेंतल्यान तंत्रगिन्यानाचो वा डिजिटल सामुग्रींचो वापर करूंक मेळचो हे नदरेंतल्यान देवनागरी लिपयेंतल्या टंकलेखन टुलांची गरज निर्माण जाली.
मायभाशेंतल्यान शिक्षण घेतल्यार भुरग्यांक संकल्पना समजूंक आदार जाता अशें संवसारभरांतले विद्वान सांगतात. भारतांत लेगीत हेंच तत्व मानतात आनी पाळटात. प्राथमीक स्तराचेर शिकपी विद्यार्थ्यांक तांचे आवय भाशेंतल्यान शिक्षण मेळटा. स्वताचे भाशेंतल्यान अभ्यास केल्ल्यान एकाद्रे गजाली विशींची समज घटमूट करूंक विद्यार्थ्याक मजत जाता आनी शिकपाची प्रक्रिया सोंपी जाता. गोंयांत कोंकणी वा मराठी भाशेंतल्यान भुरगीं शिकतात. ह्या भुरग्यां खातीर पाठ्य-पुस्तकां वा आवश्यक सामुग्री तयार करूंक देवनागरी टंकलेखनाची गरज लागता. उंचेल्या पांवड्यार कोंकणी, मराठी, हिंदी, संस्कृत हे विशय शिकपी विद्यार्थ्यांक प्रकल्प वा स्वाध्याय तयार करूंक देवनागरी टंकलेखन साधनां वापरचीं पडटात. बी.ए. वा एम.ए. पांवड्यार गोंयांतल्या प्रादेशीक भाशांनी शिक्षण घेवपी विद्यार्थ्यांक देवनागरी टंकलेखन संबंदीत अभ्यासक्रम आतां लागू जाला तशेंच हीं साधनां शिकपाची सक्ती आसा. हाका लागून, फुडाराक रोजगाराची संदी मेळूंक बर्याक पडटा.
रोजगार म्हणटकच सरकारी नोकरी लक्षांत येता. प्रशासनांत कोंकणी ही राजभाशा आशिल्ल्यान प्रशासकी कामांत कोंकणीचो वापर जाता. देवनागरी लिपयेंत कोंकणी पत्रां, आदेश, टिपण तयार करतना देवनागरी टंकलेखनाची गरज पडटा. लोकांक समजता ते भाशेंतल्यान येवजण्यांची माहिती वा फॉर्मां दिवंक देवनागरी टंकलेखन साधनां आसप गरजेचें थारता. ते खातीर, सरकारी कर्मचार्यांक कोंकणी भाशेच्या प्रशिक्षणा सयत देवनागरी टंकलेखन साधनां शिकोवपाची आनी प्रशिक्षणाची गरज आसा. तशेंच खाजगी कम्पन्यो लेगीत आपल्या वावराची माहिती लोकांक कळची म्हणून कोंकणी भाशेंतल्यान पत्रिका काडटात वा समाज माध्यमांचेर पोस्ट घालतात. वेंचणुके वेळार लेगीत कितलेशेच राजकारणी कोंकणींतल्यान जाहीरनामो आनी प्रसिद्धी पत्रका तयार करतात. अशा वेळार, कोंकणी भाशा आनी देवनागरी टंकलेखना खातीर रोजगार निर्माण जाता.
शिक्षणांत, साहित्यांत वा प्रशासनांत देवनागरी टंकलेखन साधनांचो वापर मोट्या प्रमाणांत जाता. पूण ताचे भायर, समाज माध्यमांचेर आपले विचार कोंकणी भाशेंतल्यान व्यक्त करूंक देवनागरी टंकलेखनाची गरज लागता. फेसबूक, इन्स्टाग्राम अश्या माध्यमांचेर कसलीय माहिती घालतना तशेंच वॉट्सॲपाचेर टॅक्स्ट टायप करूंक वा ई-मेल करूंक देवनागरी टंकलेखन साधनांचो वापर जाता. तशेंच माहिती दिवपी मजकूर तयार करून ब्लॉगांचेर घालूंक देवनागरी टंकलेखन लागता. लग्न पत्रिका, आमंत्रण पत्रिका तयार करूंक देवनागरी टंकलेखनाची गरज पडटा. देवनागरी टंकलेखनाची ही गरज आनी म्हत्व मतींत घेवन देवनागरी टंकलेखनाचीं वेगळीं वेगळीं साधनां तयार जाल्यांत.
मोबायल, कम्प्युटर, स्मार्ट टी.व्ही. हांचेर वापरूंक मेळटात अशें टुल्स वा साधनां तयार जावंक लागल्यांत. देवनागरी टंकलेखना खातीर फोनॅटीक, इन्स्क्रिप्ट अशे देवनागरी किबोर्ड मेळटात. कितलेशेच ऑनलायन टुल्स टायपिंग खातीर मेळटात. हीं साधनां फकत टंकलेखना पुरतीं मर्यादीत नात. कोंकणीचे बाबतींत लिपयेची आडखळ येता. कोंकणी भाशा बरोवंक वेगळी वेगळी लिपी वापरिल्ल्यान, फकत एकेच लिपयेंत साहित्याची निर्मणी जायना. ही आडखळ पयस करूंक konkanverter सारकेलो सॉफ्टवॅर उपेगाक येता. देवनागरी लिपयेंतल्या साहित्याचें लिप्यांतर कन्नड, मलयाळम वा रोमी अश्या लिपयांनी करूंक मेळटा. अणकाराक लेगीत वेगळीं वेगळीं साधनां लागतात. अणकार करतना तंत्रगिन्यानाचो वापर करून गुगल, मायक्रोसॉफ्ट तशेंच अनुवादिनी सारकेल्ले सॉफ्टवॅर वापरून अणकाराची प्रक्रिया सोंपी करूं येता. तशेंच शब्द सोदूंक विंगड विंगड ऑनलायन शब्दकोशांचो वापर करूं येता. हें सगळें करूंक देवनागरी टंकलेखनाची गरज लागता.
ए.आय म्हणल्यार आर्टिफिशियल इण्टेलिजन्साक लागून आतां तंत्रगिन्यानाच्या मळार आनीक विकास जावंक लागला. इंग्लीश भाशे सयत कोंकणी सारकेल्ल्या प्रादेशीक भाशांनी लेगीत हो वावर जावप गरजेचो आसा. विद्यार्थी आसूं वा शिक्षक, वेवसायीक आसूं वा सामान्य मनीस, देवनागरी टंकलेखनाची गरज सगळ्यांकूच पडटा. ताका लागून, टंकलेखन ही एक म्हत्वाची कुशळटाय आनी ती दरेकल्यान शिकपाची गरज आसा.
Dear Sneha, due to age , I am not very tech savvy. Noo one to help me . Is there a simple method by which I can get the Devnagari lipi app? Please let me know . I can send the money required.
Than k you for your help