गोंय सरकाराच्या राजभाशा संचालनालयान 2022-2023, 2023-2024 आनी 2024-2025 वर्सांचे भाशा पुरस्कार जाहीर केल्यात.
2022-2023 वर्साचो ‘ज्ञानपीठकार रविंद्र केळेकार कोंकणी भाशा पुरस्कार’ श्री. माणिकराव राम नायक गावणेकार हांकां, 2023-2024 वर्साचो ‘ज्ञानपीठकार रविंद्र केळेकार कोंकणी भाशा पुरस्कार’ श्री. सुरेश रामचंद्र पै हांकां 2024-2025 वर्साचो ‘ज्ञानपीठकार रविंद्र केळेकर कोंकणी भाशा पुरस्कार’ श्री. भिकू बोमी नायक हांकां जाहीर जाला.
2022-2023 वर्साचो ‘बा. द. सातोस्कार मराठी भाशा पुरस्कार’ श्री. शंभू भाऊ बांदेकार हांकां जाहीर जाला. 2023-2024 ‘बा. द. सातोस्कार मराठी भाशा पुरस्कार’ श्री. अनिल गजानन सामंत हांकां जाहीर जाला. 2024-2025 वर्साचो ‘बा. द. सातोस्कार मराठी भाशा पुरस्कार’ श्री. रमेश दत्ताराम वंसकर हांकां जाहीर जाला.
सरकारान नियुक्त केल्ल्या पांच वांगडी तज्ञांचे निवड समितीन प्राप्त जाल्ल्या कितल्याशाच नामांकनांतल्यान कोंकणी, मराठी भाशेचें संवर्धन आनी उदरगती खातीर भरीव योगदान दिल्ल्या वयल्या व्यक्तींची निवड ह्या पुरस्कारां खातीर केल्या.
राजभाशा संचालनालया मार्फत भाशांच्या विकासा खातीर ही भाशा पुरस्कार येवजण राबयता. कोंकणी, मराठी भाशां खातीर पुराय जीणभर समर्पीत रितीन कार्य केल्ल्या व्यक्तींक हो पुरस्कार दितात. हाचे वरवीं अश्या म्हान व्यक्तींचो आदर्श लोकां मुखार दवरचो तशेंच साहित्यिकांक मान-सन्मान दिवन तांणी भाशेचे वृद्धी खातीर केल्ल्या कार्याची दखल घेवप हो सरकाराचो हे येवजणे फाटलो हेतू आसा.
कांपाल हांगासल्ले गोवा कला अकादमींत एके खासा कार्यावळींत मानादीक मुख्यमंत्री डॉ. प्रमोद सावंत हांचे हस्तुकीं तारीख 30 मे 2025 दिसा सकाळीं 10:00 वरांचेर वयले पुरस्कार भेटयतले अशी माहिती राजभाशा संचालनालयान दिल्या.
