सरकारी कर्मचार्यां खातीर देवनागरी टंकलेखन प्रशिक्षणाक सुरवात
राजभाशा अधिनेमाची अंमलबजावणी प्रशासनांत जातली जाल्यार देवनागरी टंकलेखनाचें प्रशिक्षण घेवप खूब म्हत्वाचें थारता. राजभाशा संचालनालयान आयोजीत केल्ल्या देवनागरी टंकलेखन प्रशिक्षणाचो लाभ सरकारी कर्मचार्यांक जातलोच, पूण प्रशासनांत राजभाशेची अंमलबाजवणी करूंक ताचो चड आदार जातलो अशें विद्या प्रबोधिनी म्हाविद्यालयाचे प्राचार्य डॉ. भूषण भावे हांणी सांगलें. राजभाशा संचालनालयान आयोजीत केल्ल्या देवनागरी टंकलेखन प्रशिक्षणाच्या उक्तावण सुवाळ्या वेळार ते उलयताले. राजभाशा संचालनालयान सरकारी कर्मचार्यां खातीर तीन दिसांचें देवनागरी टंकलेखन प्रशिक्षण पर्वरेच्या विद्या प्रबोधिनी म्हाविद्यालयांत आयोजीत केलां.
10 ते 12, 13, 14, 17 आनी 18 ते 20 फेब्रुवारी 2025 मेरेन तीन बॅचांनी हें प्रशिक्षण जातलें. ह्या प्रशिक्षणांचो लाभ सुमार 140 सरकारी कर्मचार्यांक जातलो अशें राजभाशा संचालक प्रशांत शिरोडकर हांणी सांगलें. कोंकणी, मराठी, हिन्दी ह्या भाशांनी टंकलेखन करूंक देवनागरी टंकलेखनाची संवकळ सरकारी कर्मचार्यांक जावची म्हणून हें प्रशिक्षण आयोजीत केलां अशें तांणी मुखार सांगलें.
देवनागरी टंकलेखन प्रशिक्षणांत सॉफ्टवॅरांची वळख, इन्स्क्रिप्ट किबोर्डाची वळख तशेंच देवनागरी लिपयेची वळख, अक्षर वळख अश्या विशयांचेर वेग-वेगळीं सत्रां दवरल्यांत अशें प्रशिक्षणाचे संयोजक आनी उपसंचालक अनिल सावंत हांणी सांगलें.
सुशांत नायक, उर्वशी नायक, जयेश राऊत आनी दिवाकर गुरव ह्या सहाय्यक प्राध्यापकांचीं विंगड विंगड सत्रां आयोजीत केल्यांत. प्रशिक्षणाचें सह-संयोजन स्नेहा सबनीस हांणी केलां.
