” संस्कृतीचे संवर्धन करप ही कलाकारांसयत शिक्षित नागरिकांची बी जबाबदारी जावन आसा. संस्कृताय वाडपाक कलाकारांबराबर समाजाची भूमिकाय तितकीच व्हड म्हत्वाची आसता” अशे प्रतिपादन धारवाड, कर्नाटक हांगा आशिल्ले ललित कला अकादमी स्थानिक केंद्र हें संस्थेचे निमंत्रक श्रीनिवास शास्त्री हाणी फोंडे हांगा उलयतना केले.
बांबोळकर आर्ट गॅलरी हे संस्थेचे वतीन स्थापन जाल्ले डी डी दलाल कला शिक्षण केंद्राचो ८ वो स्थापना दिन व्हडा उमेदीन साजरो जालो. हे वेळार ललित कला अकादमीचे शास्त्री हाणी मुखेल सोयरे म्हूण आपले विचार उक्तायले. गोंयची खरी संस्कृताय आदिवासी गावांनी दाखोवची आनी ते लागून अशो सुवाती तयार करपाची गरज शास्त्री हाणी हे वेळार उलयतना उक्तायली.
हे वेळार व्यासपीठाचेर जेश्ठ कलाकार निरूपा नायक, संगीत नाटक अकादमीचो पुरस्कार फावो जाल्ले लोक कलाकार कांता गावडे आनी माधवराव ढवळीकर ट्रस्टाचे विश्वस्त मिथील ढवळीकर हाजीर आशील्ले. निरुपा नायक हाणी प्रेरणादायी विचार उक्तायतना युवा कलाकारांनी मनीसपणाचे मार्गार चलपाचें आवाहन केले.
लोक कलाकार कांता गावडे हाणी कलेचे क्षेत्रांत वावुरतनाचो आपलो अणभव सांगतना आयचे जगांत कलेचें मार्केटिंग कितले म्हत्वाचे जाल्ले आसा हें तत्वाचेर जोर दिल्लो. मिथिल ढवळीकर हाणी आपले भाषणात उलयतना केंद्राचे उदरगतीक आपल्या क्षमतेन हातभार लावपाची इच्छा उक्तायली. कलेचे क्षेत्रांन उच्च शिक्षण घेवपाचे ध्येय दवरिल्ल्या गरजवंत विद्यार्थ्यांक आदार दिवपाचे वचन ढवळीकार हाणी उलयताना केले.
राष्ट्रीय पावंड्याचेर नामनां जोडिल्ल्या आर्चीस कवळेकर हे डी डी दलाल कला शिक्षण केंद्राचे शालेय विद्यार्थ्याचो हे वेळार सत्कार जालो. इमेज आर्ट चॅलेंज हे संस्थेन आयोजित केल्ल्या राष्ट्रीय कला सर्तीत पुराय देशात दुसरे इनाम मेळेयल्ल्या कारणान आर्चीस हाजो सन्मान मानेस्तांनी केलो. कलेतलो अभ्यासक्रम पुराय केल्ल्या हेर भुरग्यांक प्रमाणपत्रांचे वाटप जाले.
कला केंद्र आनी बांबोळकर आर्ट गॅलरीचें मुखेली श्रीधर कामत बांबोळकार हाणी येवकाराचे उलोवप केले. तन्वी कामत बांबोळकार हाणी सुत्रनिवेदन केले. नामनेची व्यक्तिमत्त्वां आशिल्ली संदीप निगळयें (उद्देग वेवसाय) आनी जितेंद्र शिकेरकार (सिनेमा) हें वेळार हाजीर आशिल्लें.
🖋
(सनतकुमार फडते)
