फोंडे म्हटल्यारच अंत्रुज म्हालात होळीयेचो दिस फोंडेकारांनी व्हड उमेदीन रंगांची उधळण करत मनयलो. खासकरून फोंडे शारांत मुखेल वा मध्यवर्ती भाग आशिल्ल्या दादा वैद्य चौक, पोलिस स्थानकाचो वाठार, क्रांती मैदान, कुर्टी, नागझर, खडपाबांध, जामा मशिदीचे परीसरात हिंदु समुदायाच्या लोकांकडल्यान व्हड उमेदीन होळीयेचे रंग खेळत होळीयेचो दिस उमेदीन आनी खोशियेन मनयलो. एकमेकांक रंग लावन, रंगांची उधळण करत आनी रंगान खेळत होळीयेचो आनंद लुटलो.
फोंडेचे ग्रामीण भागातय बी जशे म्हार्दोळ, प्रियोळ, मंगेशी, कोने, नगरान (प्रियोळ), मडकई, भोम, बाणस्तारी हे भागातय बी तरणाटे, भुरगे, युवावर्ग, चले, चलीयां हांचे सयत मध्यम पिरायेचे दादलेय बी होळीयेचे उत्सवात वाटेकार जावन होळीयेच्या रंगान न्हावून गेले. वेगवेगळे वाठारात जाणटे – नेणटे होळीयेच्या रंगान वाटेकार जावन पिराय आनी सदाचे ताण-तणाव विसरून होळी खेळपाक दंग जाल्ले पळोवंक मेळे.
फोंडे शारांत विश्व हिंदु परिषदेचे सभाघराकडे आशिल्ले सुवातेर भाजपचे नेते विश्वनाथ दळवी हेवूय बी स्थानिक तरणाट्यांसयत वाटेकार जाल्ले पळोवंक मेळे. होळीयेच्या आदले काय दिस फोंडेच्या काय भागांनी उदकाची खर समस्या चालू आसली. जायते भागांनी उदकूच नाशिल्ले. या लागून लोकांनी भौशिक बांधकाम खात्याचे कार्यालयात मोर्चा व्हरून उदक दिवपाचो आग्रो करून आक्रमक रूप घेतले.
अशा तरेन फोंडेचे होळीयेत साबार तरेचे रंग पोळोवंक मेळे आनी मातसो राजकीय धुळवडीचो रंग सुद्दा पळोवंक मेळो, अशे मुजरत नमूद करचे पडटले. फोंडे शिगमोत्सवान भरलो उत्सवाचो रंग शुक्रारा होळीयेचे उपरांत शेनवार दिसा रातचे जाल्ले शिगम्याचे मिरवणुकीत फोंडेकारांच्या सप्तकाचे नीमाणे वेळार उत्सवाचो एक रंग भरलो.
फोंडेच्या पोरणे बस स्थानकासावन दादा वैद्य चौकाचे वयर आशिल्ले सुवातेर मेरेन तरेतरेचे पंगडानी आपले चित्ररथ फोंडेचे आनी हेर ग्रामीण वाठारांतल्यान आयिल्ले लोकांफुडल्यान दवरले. पौराणिक कथा आशिल्ले चित्ररथ, घोडेमोडणी पथकां अशे साबार लावजमो विद्युत प्रकाशाच्या उजवाडात लोकांक पळोवंक मेळे. जायते तरणाटे हे, काश्टी, धोतर अशे गोयचे कुणबी , धनगर समाजाच्या पारंपरिक पेहराव वा पोशाकात पळोवंक मेळे. काय जाण हनुमान, जांबुवंत हांचे सारके पौराणिक आनी हिंदु धर्मग्रंथात आशिल्ल्या पात्रांची वेशभूषा करून आयिल्ले. काय ल्हान भुरगे नारदमुनी, शिवाजी म्हाराज हांचे सारके प्राचीन काळासावन मध्ययुगीन इतिहासातल्या व्यक्तिमत्त्वाचे पेहरावात आशिल्ले.
फोंडेचे वेगवेगळे भागांतले महिला बचत गट समूह, युवा क्लब, सांस्कृतिक मळावेल्यो संस्था हाणी चित्ररथ, रोमटामेळ, पारंपरिक नृत्य, धनगर नृत्य, कुणबी नृत्य अशे गोयचे मातीयेची वळख करून दिवपी सांस्कृतिक प्रकार करून फोंडा शिगमोत्सव हे सप्तकातलो चर्चेचो विशय करून दवरलो. थळाव्या लोकांचोय हे शिगमो मिरवणुकीक बरो प्रतिसाद मेळो. हजार ते दोन हजार लोक हे वेळार शिगमो मिरवणुकीक प्रेक्षक म्हूण हाजीर आशिल्ले.
✒️
सनतकुमार फडते
