गोय विद्यापीठात येता ते १३ आनी १४ फेब्रुवारी हे दिसांनी गोयचे ज्ञानपीठ पुरस्कार जिकलेले साहित्यिक, नाटककार आनी विचारवंत सर्गेस्त रवींद्र केळेकार हांचेर दोन दिसांचो परिसंवाद कार्यक्रम जातलो.
२०२४-२५ हे वर्स रवींद्र केळेकार जल्म शताब्दी वर्स म्हूण गोय सरकार आनी कोकणी समाज मनयता. ह्याच समयाचे अवचीत सादून गोय विद्यापीठाच्या शणै गोयबाब भाशा आनी साहित्य महाशालेची, कोकणी अध्ययन शाखा, अतिथी संशोधन प्राध्यापक कार्यक्रमांनी गोवा कोकणी आकादेमी, राजभास संचालनालय, गोय सरकार हांच्या जोडपालवान “कोकणी साहित्य आणि चळवळींतलों चिरंतन दिशादर्शक: रवींद्र केळेकार” विशयाचेर दोन दिसांचो राश्ट्रीय परिसंवाद १३ आनी १४ फेब्रुवारी २०२५ हे दिसा गोय विद्यापीठाच्या परिशद सभाघरात घडोवन हाडटात.
ह्या परिसंवादाच्या उक्तावण सुवाळ्याक मुखेल सोयरे म्हूण गोंय राज्याचे मुखेलमंत्री, डॉ. प्रमोद सावंत हाजीर आसतले. तशेच शणे गोंयबाब भाशा आनी साहित्य महाशालेची अधिश्टाती प्रो. अनुराधा वागळे, गोवा कोकणी अकादमीचे अध्यक्ष भौ. वसंत भगवंत सावंत, कोकणी अध्ययन शाखेचे संचालक डॉ. हनुमंत चोपडेकार, संयोजक प्रा. कृपाली नायक आनी सहसंयोजक प्रा. सोनिया गडकर हाजीर आसतली.
मूळस्वर उलोवपी म्हणून गांधी विचार आनी राममनोहर लोहिया हांचे विचार मुखार व्हरपी आनी जेश्ठ पत्रकार भौ. शशी कुमार झा उर्फ अव्यक्त उलोवप करतले. ‘ रायटर आनी फायटर : रवींद्र केळेकार ‘ ह्या पयल्या चर्चासत्राचे अध्यक्षपण भौ. राजू नायक जाल्यार तांच्या जिवीत वावराचेर चर्चा करपाक भौ. हेमा नायक, भौ. दिलीप बोरकार आनी भौ. रोहिणी केळेकार हाजीर आसतली. दुसरें सत्र ‘ भारतीय संस्कृताय आनी तत्वगिन्यान : एक विचारमंथन ‘ अशे आसतले ज्याचे अध्यक्षपण डॉ. नारायण देसाय करतले. प्रदीप गोखले, अरविंद मोहन प्रपत्र सादर करतले. ज्ञानपीठ पुरस्कारप्राप्त साहित्य साधक रवींद्र केळेकार : एक चर्चा हे फुडल्या सत्रात अध्यक्ष पूर्णानंद च्यारी हांचे अध्यक्षपणाखालां गोयचे शिक्षकाकडल्यान प्रपत्रां सादर जातली. रवींद्र केळेकार हांची साहित्य साधना : एक विश्लेषण हे चवथ्या सत्राची अध्यक्ष डॉ. सुनिता उम्रसकार आसतली.
१४ फेब्रुवारी २०२५ हे दुसरें दिसा रवींद्र केळेकार लिखित ‘ मुक्ति ‘ हे एकांकिकेचे सादरीकरण जातले. ताचे उपरांत ‘ कोकणी चळवळीचे दिशादर्शक : रवींद्र केळेकार ‘ हे सत्रात डॉ. भूषण भावे, जयंती नायक, डॉ. हनुमंत चोपडेकार, परेश प्रभू हे मानेस्त प्रपत्र सादर करतले. मुखावयल्या सत्रात डॉ. प्रकाश पर्येकार हांच्या अध्यक्षतेखालां ‘ रवींद्र केळेकार हांचे वेचीक बरपाचें अभिवाचन ‘ हे सत्र जातले.
परिसंवादाच्या समारोप सूवाळ्याक मुखेल सोयरे म्हणून अभिषेक रंजन सिंह हाजीर आसतले. विद्यापीठाचे कुलसचिव प्रो. सुंदर धुरी, अनुराधा वागळे, गोवा कोकणी अकादमीचे सचिव पराग नगर्सेकार, प्रकाश पर्येकार, हनुमंत चोपडेकार, प्रा. कृपाली नायक हाजीर आसतली. सगळ्या कोकणी मोग्यांनी, संशोधक, लेखक, साहित्यिक आनी विद्यार्थ्यांनी हाजीर रावचे, अशे आवाहन गोय विद्यापीठ आनी गोवा कोकणी अकादमीन केला.
