गर्भाशयाचो कर्करोग हो भारतात बायलांक जावपी दुसरो सगल्यात व्हड प्रमाणांत जावपि कर्करोग जावन आसा. प्राथमिक अवस्थेत जर हे दुयेसाची रोग पारखणी जायत जाल्यार कर्करोग पिडीत बायलमनीस बरी जावपाक शकता, अशे भारतीय वैजकी संघटनेचे (आयएमए ) दिवचल शाखेचे अध्यक्ष वा चेअरमन डॉ. शेखर साळकार हाणी पिळगाव, दिवचल हांगा जाल्ले गर्भाशय कॅन्सर जागृताय हे विशयाचेर आदारील्ले कार्यक्रमात उलयतना सांगले.
पिळगाव, दिवचल हांगा आयडीयल हायस्कूल हे शाळेचे आवारात बायलांक गर्भाशयात जावपि काकराचे दुयेत हे विशी जागृताय व्याख्यान इंडीयन मेडिकल असोसिएशन हे राष्ट्रीय संघटनेचे दिवचल, गोय शाखेन आयोजित केल्ले.
काकराचे दुयेताचे तज्ञ आशिल्ले ओंकोलोजिस्ट तशेच सामाजिक कार्यकर्ते आनी गोयांतल्या तंबाखू निर्मूलन चळवळीचे मुखेली डॉ. शेखर साळकार हाणी हे वेळार मार्गदर्शन केले. हे वेळार उलयतना डॉ. साळकार हाणी म्हटले, गर्भाशयाचो कर्करोग एचपीव्ही (ह्युमन पॅपिलोमा व्हायरस ) हे विषाणूक लागून जाता, जाचेर आयज घडीये वासिन तयार आसा.
हे वासिन बरेच सुरक्षित आसा तशेच पिरायेची ९ ते १४ वर्सा हे वयोगटातली चलीयां ही वासिना घेवंक शकता, जे लागून गर्भाशयाचे कर्करोगापसून तांची प्रतिकारशक्ती पुराय वाडटा. रोग जातकीत वखद दिवचेपरस रोग जावचोच न्हय म्हूण उपाय करप बरे, हें न्यायप्रमाण ही वासीना चलीयांक दिवची, अशे डॉ. साळकार हाणी म्हटले.
ही वासिनां बाजारात २ हजार रुपयांच्या किंमतीचे आसपास मेळटात आनी हे वखदाचे दोन डोस ६ म्हयन्याचे अंतर दवरून घेवचे पडटा, अशी म्हायती हे वेळार डॉ. साळकार हाणी दिली.
९ ते १४ वर्सा पिरायेची १०० चलीयां आपले आवय बापुय हांचे सयत हे काकराचे रोगाचेर आदारील्ले व्याख्यानाक हाजीर आशिल्ली. आपले ९ ते १४ वर्सा पिरायेचे पयल्या भुरग्याक वासिनां दियात अशे आवाहन हे वेळार डॉ. साळकार हाणी सगले पालकांक केले.
हे वेळार आयडीअल स्कूल, पिळगाव शिक्षणसंस्थेचे चेअरमन रामचंद्र गर्दे, वेवस्थापक आनी शिक्षीका श्रीमती अरूंधती साळकार, मुख्याध्यापक ज्ञानेश्वर गावकार, राहुल मळीक, रूजुता मणेरीकर, अनुपा गावस, सायका नायक आनी सुभाष सावईकार हे वेळार हाजीर आशिल्ले.
🖋️
(सनतकुमार फडते)
