गोयचें कला अकादमी संस्थेचे वतीन आयोजित केल्ले गोय राज्य नाट्य सर्तीत पयले इनाम फावो जाल्ले फादर हे नाटक येत्या ते २८ फेब्रुवारी २०२४ हे दीसा महाराष्ट्र नाट्य सर्तीत चंद्रपूर (महाराष्ट्र) हांगा सादर जातले. फादर हे नाटक फ्लोरीयन जेलर हांणी बरयला मराठी अणकार डॉ. समीर मोने हांणी केला. ह्या नाटकाची संकल्पना आनी दिग्दर्शन दक्षा प्रदिप शिरोडकर हांचे आसा. जाल्यार ह्या नाटकाची निर्मिती मांगिरीश युथ क्लब मंगेशी ह्या संस्थेन केला.
चडशे फावटी नाटक पळयतना कांय मिनटां उपरांत वा पयल्या देखाव्या उपरांत प्रेक्षक नाटकाकडे एकरूप जावंक लागता. माचयेर घडपी कृतींचो प्रेक्षक सहज अर्थ लायता. पूण फ्लोरियन झेलराचे हे नाटक वेगळ्या शैलीत मांडिल्ले आसा. स्मृतिभ्रंश (डिमेंशिया) आशिल्लो आपलो जाण्टो बापुय आंद्रे, हाचेर आशिल्लो मोग, ताची काळजी आनी स्वताच्या जीणेतलो तणाव आनी तिचो मोगी पियेर हांचेवांगडा आशिल्लो संबंध ह्या सगल्या गजालीचो तोल सामाळपाक ॲनीन केल्ली धडपड ह्या नाटकांत दिश्टी पडटा. ह्या नाटकांत दिसपी पिशेंपण , बापूय – धूयेचें नाते हें किंग लियराचे जबरदस्त प्रतीबिंब दाखयता. मोग ह्या भावनेतली क्रूर आनी सहनशीलतेच्या मर्यादेविशीं त्याचबराबर जाणट्यापणाक लागून आवय बापुय आनी भूरगी हांचे मदी येवपी नात्यातलो संघर्श दाखयता.
नाटकांत वर्धन कामत, शेफाली नाईक, शशी पवार, आनी प्राजक्ता कवळेकर हांच्यो मुखेल भुमिका आसात. पार्श्वसंगीत दिलीप वझे जाल्यार उजवाड येवजणेची जापसालदारकी तेजस खेडेकर हांणी सामाळां.प्राजक्ता कवळेकर हांची भेसवण , रंगवण समिर नाईक त्याचबराबर नेपथ्य मोहनदास च्यारी आनी श्रीगणेश करंडे हाची आसा. नेपथ्य वेवस्थापनाची जापसालदारकी फरहाद शेख हांणे घेतल्या.
“काय व्यक्तिगत कारणांक लागून या सर्तीत वाटो घेवपाचे बंद करचे, अशे हावे पयली थारायल्ले. दक्षा (शिरोडकर) नाटक बसयतले आनी ताणें राष्ट्रीय नाट्य विद्यालयांत घेतिल्या शिक्षणाचो म्हाका अभिनेतो म्हूण फायदो जातलो या एकाच कारणाक लागून हावे फादर हे नाटक करपाचे थारायले. हे नाटकाची प्रक्रिया म्हज्या लागून तणावान भरलेली आशिल्ली. पुण हेच तणावाचो हावे आव्हान म्हूण स्वीकार केलो. आज मेरेन केल्ल्या नाटकांचो अनुभव कामाक आयलो आनी फादर हे पात्र दर एका प्रवेशात आसा जेच्या लागून हे नाटक उबे जाताना खूब लागीच्यान पळोवंक मेळे. फादर आता महाराष्ट्र राज्य नाटय सर्तीचें निमाणे फेरीयेक खातीर चंद्रपूर वयता हाची उमेद आसा. कला अकादमी पणजे हांगा हे नाटक सादर करपाची संद मेळी जाल्यार जावपी खोस दुपटीन आसतली. जे वास्तूकडे पळोवन नाटक करपाची प्रेरणा मेळी तेच वास्तूत म्हज्या जीवितातल्या निमाणे सर्तीचे नाटकाचो प्रयोग संपन्न जावचो, ही मनासावन इत्सा आसा,” वर्धन कामत, कलाकार, फादर.
“राष्ट्रीय नाटय विद्यालयातल्यान पदवी घेवन भायर पडल्या उपरांत हे म्हजे पयले नाटक जावन आसा. दिग्दर्शनाच्या पयल्याच प्रयत्नाक पुरस्कार मेळो हाची खोस आसा. गोयचे प्रतिनिधिपण हावे थय (एनएसडी ) केल्ले जेच्या लागून म्हजे काम लोकांमुखार हाडतना ते तितकेच परिपूर्ण आनी वेवसायीक थरावेलें आसतलें हाची हाव जतनाय सदाच बाळगिता. ” फादर ” चे निमतान ती संद म्हाका मेळी. नाटकाची टीम बरी उबी जाली. महाराष्ट्र सर्तीचे निमाणे फेरीयेत जावपी प्रयोग आमी मनासावन, प्रामाणिकपणान करतले. नाटकान आतामेरेन जें मेळेयला, ते तिगोवन धरतले आनी पुराय संघ एक बरो प्रयोग दिवपाचो यत्न करतलें. गोयाक अभिमान जातलो, अशी कामगिरी करपाचो यत्न करतलो, हो आमचो आत्मविश्वास आसा,” दक्षा शिरोडकर, दिग्दर्शक, फादर.
🖋
(सनतकुमार फडते)
