गोंयसारके राज्याचेर आयज मेरेन १३ राज्यकर्ते राज्य करून गेले. मागीर पोर्तुगीज आयले आनी तांचे उपरांत राज्य म्हूण आमी स्वतंत्र भारतात विलीन जाले. आपले राज्याचो इतिहास आयचे तरणाट्यान शिकोवन समजून घेवचो. जो इतिहास शिकना, ताचो फुडार घटमुट जावंक शकना. गोय ही कलाकारांची जशी भूमी आसा तशीच ती विचारवंतांचीय बी भूमी आसा. हे भूमीत बरेच विचारवंत जावन गेल्ले आनी ते लागून आयचे पिळगेकडल्यानय बी आमी तशीच आशा आनी अपेक्षा दवरून आसा, अशें मत मुखेल मंत्री प्रमोद सावंत हाणी गोवा मराठी अकादमीच्या वतीन आयोजित केल्ल्या सृजन संगम २०२५ हे कार्यक्रमात उलयतना उक्तायले.
हे वेळार व्यासपीठाचेर अनिल सामंत, अध्यक्ष, गोवा मराठी अकादमी, उपाध्यक्ष चंद्रकांत गावस, इन्स्टिट्युट मिनेझिस ब्रागांझा संस्थेचे उपाध्यक्ष दशरथ परब, दैनिक नवप्रभा हे दिसाळ्याचे संपादक परेश प्रभू, रवींद्र भवन संस्थेचे उपाध्यक्ष दत्ताराम चिमुलकर, कार्यक्रमाच्यो संयोजिका पौर्णिमा केरकर आनी समन्वयक विठ्ठल शेळके हे मानेस्त हाजीर आशिल्ले.
मुखेलमंत्री महोदयान फुडें अशेय म्हटले, मराठी हो विषय घेवन आपणेन प्राथमिक शिक्षण घेतले आनी उपरांत बारावी मेरेन मराठी शिकलो पूण करियर करपाविशी हेराभशेन खयच केन्ना काय अडून उरले ना. पैशे आसले म्हूण जायना, संस्कार आनी मनाची शांती ही खूब म्हत्वाची आसा. गोयान कोकणी मराठी हो वाद आयज उरलेलो ना. केंद्र सरकारच्यो नोकऱ्यो जेन्ना गोयात येतात तेन्ना महाराष्ट्रातले भुरगे गोयात येवन ते सगले जागे पुराय काबीज करतात. गोयचे भूरगे बी अर्ज करतात. ते लागून उमेदवाराक कोकणी येता हाची खात्री करपाक आमी तांका कोकणी प्रमाणपत्र दिवपाक कोकणी अकादमीची मजत घेवन सुरूवात केली, अशे सावंत हाणी नमूद केले.
महाराष्ट्राचो अपवाद सोडलो जाल्यार भायले राज्यातल्यान येवपी खयच्याय भुरग्यांक कोकणी उलोवपाक १० ते १५ वर्सा लागतात. पुण तोच दुसरे शेजारचे राज्यातल्यान आयिल्लो मनीस गोयकार भुरग्यांपरस बरी मराठी उलयता. देखून गोयचे भुरग्यांचेर अन्याय जावचो न्हय म्हूण आमी हो निर्णय घेतिल्लो आसा, अशे सावंत हाणी म्हटले. गोयाक मराठीची खूब व्हड परंपरा आसा आनी ती तिगोवन दवरपाक वाचन करप हे खूब म्हत्वाचे आसा, अशेय ताणी नमूद केले.
गोवा मराठी अकादमीचे अध्यक्ष प्रा. अनिल सामंत हाणी म्हटले की गोयात ह्यानफुडे सगळ्यो भाशा बरे भशेन जगच्यो आनी फुडें वयच्यो, विशेश म्हटल्यार मराठी आनी कोकणी हांका समान स्थान मेळचे. एका वटेन कोकणी फुलची आनी दुसरें वटेन आमची भारतीय संस्कृती जगोवपी, तिगोवपी मराठी भाशा जगची, टिकोन उरची अशी इत्सा उक्तायली ते लागून मराठी शिकपी भुरग्यांक अडचण वा आडकाठी जातले, अशे निर्णय जावचे नात अशी आशा व्यक्त केली.
तशेंच मराठीक लागून मुखेलमंत्री आनी सरकारान आधारवड जावन उबे रावचे, अशे सामंत हाणी मुखेलमंत्री सावंत हांचेकडेन मागणे दवरले. मराठी खंयच्यान दुसरे कडल्यान येवंक ना, तर आमचे पूर्वजांनीच ती तिगोवन दवरल्या. ह्यानफुडे गोयान एक नवयुग निर्माण जावचे आनी मराठीक सरकारान आधार दिवचो आनी अशे तरेन फुडें पावल घालतना हे सगले मावळे, मर्द मराठे तुमचे फाटल्यान खंबीरपणे उबे रावतले, अशे सामंत हाणी सावंत हांका आश्वासन दिले. कार्यक्रमाक विद्यार्थी आनी युवावर्ग व्हड प्रमाणांत हाजीर आशिल्ले. हे वेळार सांस्कृतिक कार्यक्रमांचे सादरीकरण जाले.
✒️
सनतकुमार फडते
