डॉ न्यायमूर्ती फेर्दीन रिबेलोचे हस्तुकी “अजब गोंयचें गजब राजकारण” ह्या पुस्तकाचें सोमारा प्रकाशन

0

गोयंच्या वेंचणुकांचो दृष्टोकोनात्मक नदरेन नियाळ घेवपी “अजीब गोंयचें गजब राजकारण” हें इंग्लीश पुस्तक सावित्रीबाई फुले हांच्या 191 व्या जयंती दिसा, सोमारा प्रकाशीत जातलें.

गोंयचे पत्रकार संदेश प्रभुदेसायान बरयल्ल्या ह्या 364 पानांच्या पुस्तकाचें प्रकाशन अलाहाबाद उच्च न्यायालयाचे निवृत्त मुखेल न्यायाधीश डॉ न्यायमूर्ती फेर्दीन रिबेलो करतले. डॉ रिबेलो हे आणिबाणीउपरांत 1977 वर्सा जाल्ले वेंचणुकेंत गोंय विधानसभेचे आमदारय आशिल्ले.

पुस्तक प्रकाशनाउपरांत परिचर्चेची कार्यावळ जातली. तातूंत डॉ रिबेलो वांगडा गोंय विद्यापीठाचे डी डी कोसंबी प्राध्यापक डॉ पीटर रोनाल्ड डिसोझा, राजकी विश्लेशक ऍड क्लिओफात आल्मेदा कुतिन्हो आनी स्वता लेखक संदेश प्रभुदेसाय वांटेकार जातले. गोवन वार्ता लायव्हाचे संपादक किशोर नाईक गावकर हे परिचर्चेचें संचलन करतले.

गोंयच्या वेंचणुकांचो इतिहासिक नियाळ घेवपी गोंयांतले हें पयलेंच इंग्लीश पुस्तक. हातूंत 1963 सावन 2017 मेरेन जाल्ल्या विधानसभा वेंचणुकांवांगडाच ख्रिस्तपूर्व 12000 वर्सांपयलीं जाल्ल्या कोंकण दर्यादेग वाठाराचे निर्मणेसावन आजमेरेनचो इतिहास, भुगोल आनी संस्कृतायेंतल्यान गोंयची खाशेली राजकी संस्कृताय कशी घडल्या हाचें वस्तुनिश्ठपणान विश्लेशण केलां. तशेंच प्राचीन काळासावन आजमेरेन फकत जमीन हे एके गजालीभोंवतणी पुराय राजकारण कशें घुंवत आसा आणि तातूंतल्यान आज तें खंयच्या पावंड्यार पावलां हाचेरय ह्या पुस्तकांतल्यान उजवाड घातला.

या पुस्तकाचो प्रकाशन सुवाळो सोमारा 3 जानेवारी दिसा पणजेच्या सेंट्रल लायब्ररी इमारतींतल्या संस्कृती भवनांत सांजे 4.30 वरांचेर जातलो. उपरांत सुवाळ्याचे सुवातेर आनी गोंयच्या पुस्तक विक्री केंद्रांचेर, ऑनलायन आनी ई-बूक स्वरुपांतय हें पुस्तक मेळटलें.

LEAVE A REPLY

Please enter your comment!
Please enter your name here