कोंकणी भाशा मंडळान धेंपो उच्च माध्यमिक विद्यालय, कुजीरा हांच्या जोडपालवान आयोजीत केल्ली राज्य पांवड्यावेली राधा मुकूंद नायक वक्तृत्व सर्त ह्या वर्साक मंगळार, 22 ऑगस्ट 2023 दिसा धेंपो उच्च माध्यमिक विद्यालय, कुजिरा हांगा घडून येतली.
फकत उच्च माध्यमीक विद्यालयीन विद्यार्थ्यां खातीर उकती आशिल्ली ही सर्त सकाळीं 9.00 वरांचेर सुरू जातली. ह्या सर्तीखातीर दरेका उच्च माध्यमीक विद्यालयान चडांत चड दोन सर्तक सर्ती खातीर धाडचे अशें आयोजकानी कळीत केलां. सर्तींत दरेका सर्तकाक उलोवंक 5 ते 6 मिनटां वेळ मेळटलो आनी ताका कोंकणींतल्यान उलोवचें पडटलें. सर्तकांक 1- राश्ट्रीय शिक्षण धोरणाची अंमलबजावणी: म्हजी अपेक्षा…
2- रस्त्यावेले अपघात: कारणां आनी उपाय
3- आर्टिफिशीयल इंटेलिजन्स- तारक काय मारक?
4- वसाहतवादी इतिहास- कितलो स्मरचो कितलो विसरचो?
5- गोंयाक परतून एकदां गरज- क्रांतीची… हातूंतल्या खंयच्याय एका विशयाचेर उलोवंक मेळटलें.
सर्तींत सहभागी जाल्ल्या दरेका सर्तकाक आयोजक प्रमाणपत्र भेटयतले. तशेंच सर्तींत पयल्या क्रमांकाक 2000/- रुपया आनी घोळटो करंड, दुस-याक 1500/- रुपया आनी तिस-याक 1000/- रुपयांची इनामां मेळटलीं.
सर्तीचें परिपत्रक मंडळान सगल्या शाळांक ईमेल केलां. उच्च माध्यमीक विद्यालयांनी सर्तींतलो आपलो सहभाग निश्चीत करूंक 20 ऑगस्ट 2023 मेरेन आयोजकांक कळीत करपाक जाय. सर्तक विद्यार्थी आनी तांच्या वांगडा आयिल्ले पालक/ शिक्षक हांच्या दनपारच्या जेवणाची वेवस्था आयोजकांनी केल्या. चडावत म्हायती खातीर डॉ. वेदिका वाळके (8698387747) ह्या क्रमांकाचेर संपर्क करचो.
