कोकणी भाशा मंडळ, हे संस्थेन म्हापसा हांगा आशिल्ल्या सेंट झेवियर म्हाविद्यालयात २३ वे शणेय गोंयबाब कथामाळ सर्तीचे आयोजन केल्ले. म्हाविद्यालयाचे परिशद सभाघरात जाल्ले हे सर्तीचे कार्यावळीत कोकणी भाशेचो प्रचार आनी उत्सव कला आनी कथाकथनाचे माध्यमातल्यान कोकणी साहित्यमोगी हाणी मनयलो. शालेय थारातल्या भुरग्यांमदी कोकणी साहित्य आनी भाशेचो प्रचार करपाक हे वर्सुकी सर्तीच्या कार्यावळीचो हेतू आशिल्लो. सहभागी विद्यार्थ्यांक तांचे शिक्षणीक थरांप्रमाण तीन विभागांनी घातलेले. पयलो गट यत्ता पयली ते चौथी, दुसरो गट यत्ता ५ वी ते ७ वी आनी तिसरो गट ८ वी ते १० वी अशे तरेन विभाजित केल्ले. ह्या गटांचे विभाजन आजुन तीन विभागांनी केल्ले, जे तरेन एकूण ९ गट तयार जाले. बार्देश तालुक्यातलीं १४० भुरगी, वेगवेगळ्या शाळांतली, हे सर्तीनी व्हडा उमेदीन वाटेकार जाली.
उक्तावण कार्यावळीचे सुरवातेक कोकणी साहित्यिक शणेय गोंयबाब हांचे तसबिरीक फुलांचो हार घालून कोकणी साहित्य विश्वात ताणी दिल्ले योगदानाची याद करतना तांका आर्गा ओपली. हो कार्यक्रम पुराय जाले उपरांत वाटेकार जाल्ले छात्र, आपले पालक आनी शिक्षक हांचे सयत तांका तांचे सर्तीक आखून दिल्लें वर्गांनी गेले. वाटो घेतिल्ल्या भुरग्यांचे सादरीकरण पळोवन तांचे परीक्षण करपाक आयिल्ल्या नामनेच्या २७ परीक्षकांनी हे भुरग्यांची कोकणी भाशेविशी आशिल्लीं झोकून दिवपाची भावना आनी आवड हे वेळार पळयली.
हे कार्यक्रमाचे मुखेल सोयरे म्हूण सेंट झेवियर म्हाविद्यालयाचे कोकणी विभागाचे मुखेली धर्मा चोडणकार हाजीर आशिल्ले. मनाक उभारी दिवपी तांचे संबोधनात कोकणी भाशा तिगोवन दवरपाक तशेच ताचो प्रचार करपाचे यत्न फुडें व्हरपाविशीचे म्हत्व अधोरेखित जाले. कोकणी भाशा मंडळाचे कार्यकारी सदस्य प्राची प्रभावळकार, सेंट झेवियर कॉलेजचे शिक्षकवर्गाचे वांगडी डॉ. पुरुषोत्तम वेंर्लेंकार आनी डॉ. फादर लुईस गोंम्स हांचे सयत कार्यक्रमाचे समन्वयक म्हूण जापसालदारकी सांबाळली. म्हाविद्यालयाचे २६ छात्र हो कार्यक्रम कसलीच आडगळ येनास्तना बेस बरो जावचो म्हूण वावुरलें.
पयले विभागात जी. एस. आमोणकर विद्यामंदिर, म्हापसा हांचो विद्यार्थी समर्थ शेट्टकार जैतीवंत थारलो. दुसरे विभागात जी. एस. आमोणकर विद्यामंदिर संस्थेचोच व्योम पेडणेकार जैतीवंत थारलो. तिसरे विभागाचे पयले बक्षीस हेवूय बी जी. एस. आमोणकर विद्यामंदिर म्हापसा संस्थेचे विद्यार्थिनी आशिल्ल्या प्रियांका परब हाणी जिकले. बाकीचे हेर विभागातलें जैतीवंत शर्वरी कोरगावकार (सेंट अँन प्रायमरी स्कूल), शर्वी नाईक (गणेश हायस्कूल), कृतिका साळगावकार (ग्यानप्रसारक विद्यालय, म्हापसा), वरदा लांजेकार (सेंट फ्रान्सिस स्कूल), श्रेयसी महालकार (श्री शांता विद्यालय, शिवोली) आनी निपीका शेट्टकार (सेक्रेड हार्ट हायस्कूल) अशे जावन आसात.
हे कार्यक्रमात गोंयचो सोबित असो सांस्कृतिक वारसोच न्हय तर नव्या पिळगेचो कोकणी भाशेत कथाकथन परंपरा फुडें व्हरपाची उमेद साजरी जाली. बार्देश तालुक्यातले प्रतिभावंत भुरग्यांक फुडें हाडून तांचो कोकणी भाशेविशी आशिल्लो मोग आनी ती फुडें व्हरपाक झोकून दिवपाचे वृत्तीक सलाम करपी हो कार्यक्रम विद्यार्थी, पालक आनी शिक्षकवर्गाचे योगदानाक लागून २३ वो शणेय गोंयबाब कथामाळ सर्तीचे रूपात जैतीवंत थारलो.
🖋️
(सनतकुमार फडते)
