“थॉमस स्टीफन्स कोकणी केंद्र हांच्या सारकिल्ल्यो संस्था खंयच्याय राज्याची सांस्कृतिक आनी सामाजिक भलायकी समृद्ध करतात. आनी ते करपाची चडान चड गरज आसा कारण खंयच्याय राज्याची उदरगत हे ते राज्याची अर्थीक वाड आनी विकासाचे परिमाणाचेर वा पायाभूत सुविधांचे परिमाणाचेर मेजपाक जावची ना. ते राज्याची सांस्कृतिक, सामाजिक भलायकी किते आसा, हे मुद्द्याचेरय बी ते राज्याची उदरगत थारता. आयज जागतिक मळाचेर कितल्योशोच भाशा आसात, ज्यो ना जायत वयतात, नामशेष जायत चल्ल्यात आनी ही एक हुस्क्याची गजाल जावन आसा. ह्यो भाशा उलोवपी आनी बरोवपी भाशिक समूह ना जायत वा नामशेष जायत चल्ल्यात आनी ते लागून भाशा नामशेष जायत चल्ल्या. हे लागून कोकणी भाशेचो हुस्को दिसता. गोयचे बदलपाचे प्रमाण वा “रिप्लेसमेंट रेशिओ ” हो १-३ आसा जो निर्धारित केल्ल्या २.१ चे परस खूबच उणो आसा. कोकणी भास वाडची, वृद्धिंगत जावची आनी फुलची हे गरजेचे आसा. ते लागून कोकणीक लागून वावूरपी स्टीफन कोकणी केंद्रासारखे संस्थांक तेको दिवप गरजेचे आसा, ” असे हुसक्याचे मत शिक्षण खात्याचे सचिव प्रसाद लोलयेकार हाणी हालीच पर्वरी जाल्ले एका कार्यावळीत उक्तायले.
पर्वरी हांगा थॉमस स्टीफन्स कोकणी केंद्रात अंतोनियो कोकणी पुरस्कार सुवाळ्यात मार्कुस आंद्राद, डॉ. ग्लेनिस मेंडोन्सा, सिस्टर अमलिन फर्नांडीस, पाद्री फादर विटल मिरांडा, अशोक चोडणकार हांका कोकणी साहित्य आनी बरोवपाचो वावर केल्ल्यान पुरस्कार दिवन तांका मान दिलो. शिष्यवृत्ती गेबिली सिक्वेरा, श्लोक हलागी, उषा हरिजन, कसिल्डा राजू, जेसिंग शेस हांगा भेटयलो. मार्कुस कोस्मे आंद्राद (जॅक सिक्वेरा पुरस्कार), सिस्टर अमलिन फर्नांडीस (मारिया अफोन्सो कोकणी पुरस्कार २०२४), पाद्री विटल मिरांडा (फादर कॉस्मिरो डिमेलो कोकणी पुरस्कार २०२०-२४), डॉ. ग्लेन मेंडोंसा (वोलेरिया कार्व्हालो कोकणी पुरस्कार) आनी अंतोनियो परेरा कोकणी पुरस्कार फावो जाल्ले अशोक चोडणकर (कोकणदिवो म्हयनाळ्याचे संपादक) हाणी भाषणात उलयतना आपली कृतज्ञताय उक्तायली.
व्यासपीठाचेर मुखेल सोयरे लोलयेकार आनी सत्कार जाल्ले मानेस्त हांचे बराबर थॉमस स्टीफन्स कोकणी केंद्राचे संचालक डॉ. पांडुरंग फळदेसाय हाजीर आशिल्ले. रोझ डिमेलो हाणी मुखेल सोयरे लोलयेकार हांची वळख करून दिली. जुझे सिक्वेरा हाणी उपकाराचे उलोवप केले. प्रेक्षकांमदी सत्कार जाल्ले पुरस्कार जैतिवंत लेखकांचे घरचे लोक, फामिल तशेच शास्त्रज्ञ नंदकुमार कामत, व्यक्तिमत्त्व विकास प्रशिक्षक प्रवीण सबनीस आनी हेर मानेस्त हाजीर आशिल्ले.
🖋️
सनतकुमार फडते
