गोवा कोंकणी अकादेमी, राजभाशा संचालनालय, गोंय सरकार हांच्या जोड पालवान कला स्पर्श, सावड्डें – कुडचडें हांणी “साहित्य सांगाती” साहित्य सादरीकरण ही ज्ञानपीठकार रवीन्द्र केळेकार आनी लोककवी डॉ. मनोहरराय सरदेसाय हांच्या जल्मशताब्दी वर्सा निमतान आयोजीत केल्ली कार्यावळ व्हडा उमेदीन जाली.
कार्यावळीचे अध्यक्ष म्हण साहित्यिक आनी गोवा कोंकणी अकादेमीचे अध्यक्ष भौ. वसंत भगवंत सावंत, मुखेल सोयरे म्हण साहित्यीक आनी अखिल भारतीय कोंकणी परिशदेचे कार्याध्यक्ष भौ. चेतन आचार्य, मुखेल उलोवपी म्हण लेखक आनी शिक्षक भौ. अनंत अग्नी, साहित्य सादरीकरणाचे अध्यक्ष म्हण लेखक आनी प्रकाशक भौ. दिनेश मणेरकार हाजीर आशिल्ले.
ज्ञानपीठकार रवीन्द्र केळेकार आनी लोककवी डॉ. मनोहरराय सरदेसाय हांकां फुलां ओंपून कार्यावळीची सुरवात जाली. कला स्पर्श संस्थेचे अध्यक्ष परेश च्यारी हांणी सगळ्या मानेस्तांक येवकार दिलो. भौ. वसंत भगवंत सावंत हांणी अध्यक्ष पदाचें उलोवप केलें.
भौ. चेतन आचार्य हांणी कोंकणी कविता कशी आसची आनी ताचें बरोवप आनी सादरीकरण आनीक कशें वाडोवंक येता हाचेर उजवाड घातलो. भौ. अनंत अग्नी हांणी रवीन्द्र केळेकार आनी डॉ. मनोहरराय सरदेसाय हांच्या जिवीत आनी साहित्यीक वावराचेर आपले विचार व्यक्त केले.
साहित्य सादरीकरण कार्यावळीची सुरवात प्रशांत नायक, एन सुहास, कक्षम नायक आनी नम्रता सालेलकार हांच्या संवेदनशील कथांनी जाली. मुखार दिया सांवत, रत्नदीप वस्त, जस्मिता फर्नाडीस, साईशा शेट शिरोडकर, पोब्र फर्नांडीस, ग्लिनीज डायस आनी अमेय नायक हांच्या सुंदर कवितांचें सादरीकरण करून कार्यावळीक आनीक रंग हाडलो.
अंबेश तलवडकर हांणी केपेंचो बाजार हाचेर निबंद सादर करून सगळ्यांक बशिल्ले कडेन बाजाराचो फेरो मारून हाडलो. राधा काकोडकर, आयान भट आनी मेहा विनय नायक हांणी बाल साहित्याचें सादरीकरण केलें. शेवटाक साहित्य सादरीकरण कार्यावळीचे अध्यक्ष भौ. दिनेश मणेरकार हांणी पुराय सादरीकणाचे कार्यावळीचो नियाळ मांडलो.
कार्यावळीचो समारोप सगळ्या मानेस्तांचे आनी जमिल्ल्या सगळ्या प्रेक्षकांचे उपकार मानून जालो. प्रदीप काकोडकार, दिलीप नायक, अशोक नायक, ज्ञानेश्वर नायक, दिपक अवरोलकर आनी मंगलदास भट ह्या थळाव्या कोंकणी म्हालगड्यांचोय फुलां दिवन भोवमान केलो. कार्यावळीचें सुत्रसंचालन स्नेहल नायक हांणी केलें.
